អន្តរជាតិ
រដ្ឋមន្ត្រីសន្តិសុខបច្ចេកវិទ្យាជប៉ុន អះអាងថា លោកមិនធ្លាប់ប្រើកុំព្យូទ័រទាល់តែសោះ
× លោក Yoshitaka Sakurada ទើបត្រូវបានតែងតាំងជារដ្ឋមន្ត្រីសុខសុខបច្ចេកវិទ្យា (Cybersecurity) ក្រោយការជាប់ឆ្នោតសារជាថ្មីរបស់លោកនាយករដ្ឋមន្ត្រី Shinzo Abe។ ប៉ុន្តែអ្វីដែលគួរឲ្យភ្ញាក់ផ្អើលនោះ លោក Sakurada បានអះអាងថា លោកមិនដែលធ្លាប់ប្រើប្រាស់កុំព្យូទ័រនោះឡើយ។
«ចាប់តាំងពីខ្ញុំអាយុ២៥ឆ្នាំមក ខ្ញុំតែងតែធ្វើការជាមួយបុគ្គលិក និងលេខារបស់ខ្ញុំ ពោលគឺខ្ញុំមិនធ្លាប់ប្រើប្រាស់កុំព្យូទ័រទាល់តែសោះ»។ នេះសំដីរបស់លោក Sakurada ដែលដកស្រង់ដោយ Kyodo News ខណៈលោកឆ្លើយទៅកាន់សមាជិកសភា ទាក់ទងនឹងជំនាញរបស់ខ្លួន។
លោក Sakurada អាយុ៦៨ឆ្នាំ ក៏មានតួនាទីផងដែរជាទេសរដ្ឋមន្ត្រីទទួលបន្ទុកព្រឹត្តិការណ៍អូឡាំពិក និងប៉ារ៉ាឡាំពិកក្រុងតូក្យូឆ្នាំ២០២០ ដោយលោកត្រូវដឹកនាំការត្រួតពិនិត្យសុវត្ថិភាពកុំព្យូទ័រ និងបញ្ហាផ្សេងៗផ្នែកព័ត៌មានវិទ្យា។
តំណាងរាស្ត្រម្នាក់អស់សំណើច នៅពេលដែលឮថា មន្ត្រីដែលទទួលបន្ទុកផ្នែកសុវត្ថិភាពកុំព្យូទ័រ ប៉ុន្តែជាមនុស្សដែលមិនធ្លាប់ប្រើប្រាស់កុំព្យូទ័រ។ លោក Sakurada បានឆ្លើយតបវិញថា នេះមិនមែនជាបញ្ហាចោទអ្វីនោះឡើយ ហើយលោកមានជំនឿចិត្តលើខ្លួនឯងថា នឹងមិនមានបញ្ហាអ្វីនោះឡើយក្នុងការអនុវត្តការងារខ្លួន។
អ្នកខ្លះបានលើកឡើងបែបលេងសើចថា ក្រុម Hackers មិនអាចលួចទិន្នន័យអ្វីឡើយពីលោក Sakurada ព្រោះលោកមិនមានអ្វីដែលឲ្យគេលួច។ ករណីនេះមានន័យថា លោក Sakurada ជារដ្ឋមន្ត្រីដែលមានសុវត្ថិភាពខ្ពស់ជាងគេ៕
Tag:
ជប៉ុន
Cybersecurity
© រក្សាសិទ្ធិដោយ thmeythmey.com