អាមេរិក និងសម្ព័ន្ធមិត្តប្តេជ្ញានាំអគ្គិសនីទៅផ្គត់ផ្គង់ពលរដ្ឋនៃកោះប៉ាពូអាស៊ី នូវែលហ្គីណេ ឲ្យកាន់តែសម្បូរបែប

អន្តរជាតិ

អាមេរិក និងសម្ព័ន្ធមិត្តប្តេជ្ញានាំអគ្គិសនីទៅផ្គត់ផ្គង់ពលរដ្ឋនៃកោះប៉ាពូអាស៊ី នូវែលហ្គីណេ ឲ្យកាន់តែសម្បូរបែប

19, Nov 2018 , 10:14 am

រូបភាព

ដោយ:

ក្នុងឱកាសនាកិច្ចប្រជុំកំពូល កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) អាមេរិក ជប៉ុន អូស្ត្រាលី និងណូវែលហ្សេឡង់ បានប្តេជ្ញារួមគ្នាក្នុងការនាំយកអគ្គិសនីដើម្បីឲ្យប្រជាជន ប៉ាពូអាស៊ី នូវែលហ្គីណេអាចប្រើប្រាស់បានតាមតម្រូវ។ ការប្តេជ្ញាចិត្តរួមគ្នារវាងសម្ព័ន្ធមិត្តទាំងបួននេះ ក៏ជាគោលនយោបាយមួយទប់នឹងឥទ្ធិពលចិនក្នុងតំបន់ផងដែរ។

រដ្ឋាភិបាលអាមេរិក ជប៉ុន អូស្ត្រាលី និងណូវែលហ្សេឡង់ នៅថ្ងៃ១៨ វិច្ឆិកា បានចុះហត្ថលេខាលើកិច្ចព្រមព្រៀងអគ្គិសនីជាមួយរដ្ឋាភិបាលប៉ាពូអាស៊ី នូវែលហ្គីណេ ។ កិច្ចព្រមព្រៀងនេះ នឹងផ្តល់លទ្ធភាពឲ្យប្រទេសទាំងបួន អាចនាំអគ្គិសនីសម្រាប់ប្រជាជន៧០ភាគរយនៅលើប្រទេសកោះមួយនេះបានកាន់តែសម្បូរបែបនៅត្រឹមឆ្នាំ២០៣០។

តាមការចុះផ្សាយរបស់សារព័ត៌មានអូស្ត្រាលី Miami Herald នាជំនួបក្រៅផ្លូវការ នៃកិច្ចប្រជុំកំពូល APEC ក្នុងរដ្ឋធានី ព័រម៉ូរេប៊ី លោកអនុប្រធានាធិបតីអាមេរិក ម៉ៃ ផេន បានលើកឡើងថា កិច្ចព្រមព្រៀងនេះ បង្ហាញពីភាពរឹងមាំរបស់អាមេរិក និងសម្ព័ន្ធមិត្តរបស់ខ្លួន ដែលតែងតែមានការប្តេជ្ញាចិត្តចូលអភិវឌ្ឍនៅក្នុងតំបន់។

លោកអនុប្រធានាធិបតីអាមេរិក បានបន្ថែមថា វាជាដ៏គួរឲ្យចាប់អារម្មណ៍មួយ ដែលត្រូវគិតគូរពីកត្តាជះឥទ្ធិពលសម្រាប់ប្រជាជនដែលរស់នៅក្នុងរដ្ឋកោះមួយនេះ។ លោក អះអាងថា អគ្គិសនី មិនត្រឹមតែជួយដល់ការលូតលាស់សេដ្ឋកិច្ចនោះទេ ក៏ប៉ុន្តែ វាក៏នឹងជួយធ្វើឲ្យគុណភាពនៃការរស់នៅរបស់ប្រជាជនប៉ាពូអាស៊ី នូវែលហ្គីណេគ្រប់ជំនាន់កាន់តែល្អប្រសើរទៀតផង។

បន្ថែមពីការលើកឡើងរបស់តំណាងជាន់ខ្ពស់របស់រដ្ឋាភិបាលអាមេរិក លោកស្រីនាយករដ្ឋមន្ត្រីនូវែល សេឡង់ Jacinda Ardern នាឱកាសដដែលនោះ ក៏បានថ្លែងថា ការនាំយកអគ្គិសនីដល់ប្រជាជនប៉ាពូអាស៊ី ណូវែលហ្គីណេ នឹងធ្វើឲ្យប្រទេសមានការផ្លាស់ប្តូរខ្លាំង។ តែយ៉ាងណា ផែនការលម្អិតក្នុងការតភ្ជាប់បណ្តាញអគ្គិសនីទៅកាន់រដ្ឋកោះប៉ាស៊ីហ្វិកដោយរបៀបណា មិនទាន់ត្រូវបានបញ្ជាក់ឡើយ។

បើតាម Miami Herald មកទល់ពេលនេះ មានតែប្រជាជនប៉ាពូអាស៊ី នូវែលហ្គីណេ ២០ ភាគរយ នៃប្រជាជនសរុប ៨ លាន ប៉ុណ្ណោះ ដែលមានអគ្គិសនីប្រើប្រាស់ ហើយកិច្ចព្រមព្រៀងនាំយកអគ្គិសនីមកកាន់រដ្ឋកោះនេះ ក៏ត្រូវបានធ្វើឡើង ក្រោយពីអាមេរិក ជប៉ុន និងអូស្ត្រាលី នៅខែកក្កដាកន្លងទៅ បានប្រកាសរួមគ្នាក្នុងការគាំទ្រការអភិវឌ្ឍហេដ្ឋារចនាសម្ព័ន្ធនៅក្នុងរដ្ឋប៉ាស៊ីហ្វិកមួយនេះផងដែរ៕