អន្តរជាតិ
៣៦ ឆ្នាំក្រោយមក លោក ទ្រូដូ និងលោកមហាធៀ ជួបគ្នាជាថ្មីក្នុងតំណែងជានាយករដ្ឋមន្ត្រីដូចគ្នា
×![]()
ដោយ: ថ្មីៗ
ក្រៅកិច្ចប្រជុំសហប្រតិបតិ្តការសេដ្ឋកិច្ចអាស៊ីប៉ាស៊ីហ្វិកនាយករដ្ឋមន្ត្រីម៉ាឡេស៊ីលោក មហាធៀ មហាម៉ាត់ បានជួបពិភាក្សាទ្វេភាគីជាលើកដំបូងកាលពីចុងសប្តាហ៍កន្លងទៅជាមួយនាយករដ្ឋមន្ត្រីកាណាដាលោក ចាស្ទីន ទ្រូដូ ដើម្បីពង្រឹងទំនាក់ទំនងទ្វេភាគី។ តាមពិតទៅ ៣៦ឆ្នាំមុនលោក មហាធៀ ធ្លាប់ជួបជាមួយលោក ទ្រូដូ ម្តងដែរ ប៉ុន្តែកាលនោះលោក ទ្រូដូ ទើបតែមានវ័យ ១០ឆ្នាំប៉ុណ្ណោះ។
អាចថាជារឿងមិននឹកស្មានដល់ ៣៦ឆ្នាំក្រោយមកនោះលោក ទ្រូដូ ដែលជាក្មេងតូចរូបនេះបានត្រឡប់មកជួបលោក មហាធៀ វិញក្នុងនាមជានាយករដ្ឋមន្ត្រីវ័យដូចគ្នា។ វ័យ ៩៣ឆ្នាំ លោក មហាធៀ ក្លាយជាមេដឹកនាំចាស់ជាងគេ ខណៈលោក ទ្រូដូ ក្នុងវ័យ ៤៦ឆ្នាំ ស្ថិតក្នុងចំណោមមេដឹកនាំដែលមានវ័យក្មេងជាងគេលោកពិភពលោកផង។
តាមពិតទៅជំនួបលើកមុន គឺកើតឡើងនៅក្នុងឆ្នាំ ១៩៨២ នៅពេលលោក មហាធៀ ជួបជាមួយឪពុកលោក ទ្រូដូ គឺលោក Pierre Trudeau ដែលកាលនោះកាន់តំណែងជានាយករដ្ឋមន្ត្រីកាណាដា។ លោក Pierre Trudeau កាន់អំណាចពីអាណត្តិដោយលើកទីមួយចាប់ពីឆ្នាំ ១៩៦៨ ដល់ ១៩៧៩ ហើយលើកទីពីរចាប់ពីឆ្នាំ ១៩៨០ដល់ឆ្នាំ ១៩៨៤។
ជំនួបនេះត្រូវបានលាតត្រដាងក្នុងរូបភាពមួយសន្លឹកដែលត្រូវបានឧត្តមស្នងការកាណាដាប្រចាំម៉ាឡេស៊ី នាំមកជូនលោក មហាធៀ ជាអំណោយ ក្រោយលោកឈ្នះការបោះឆ្នោតនៅខែឧសភា និងត្រឡប់មកកាន់តំណែងជានាយករដ្ឋមន្ត្រីវិញ។A pleasant gift by H.E. @JuliaGBentley, - a nostalgic picture of the then Prime Minister of Canada, H.E. Pierre Elliott Trudeau and his son, H.E. @JustinTrudeau back in 1982. pic.twitter.com/p3subkitA8
— Dr Mahathir Mohamad (@chedetofficial) July 9, 2018
ត្រឡប់មកផ្តោតលើជំនួបទ្វេភាគីរវាងមេដឹកនាំទាំងពីរនេះវិញ។ លោក មហាធៀ បានជួបជាមួយលោក ទ្រូដូ នៅក្រៅកិច្ចប្រជុំ APEC នៅ ប៉ាពូអាស៊ី នូវែលហ្គីណេ កាលពីថ្ងៃសៅរ៍។ ជំនួបពិភាក្សានេះ មេដឹកនាំទាំងពីរជជែកគ្នាពីទំនាក់ទំនងពាណិជ្ជកម្ម និង បញ្ហាតំបន់មួយចំនួនផង។ កាណាដា ចង់ស្វះស្វែងរកតួនាទីក្នុងក្រុមប្រឹក្សាសន្តិសុខ និងចង់ពង្រឹងចំណងពាណិជ្ជកម្មបន្ថែមជាមួយអាស៊ានផងដែរ។ ដូច្នេះ មហាអំណាចនេះត្រូវការការគាំទ្រពីម៉ាឡេស៊ី។
Tun Dr Mahathir had a bilateral meeting with Right Hon. Justin Trudeau at noon today. Among the topics discussed: efforts of the new Malaysian government in strengthening its institutions, increasing trade and investment cooperation and also discussion on the Rohingya crisis. pic.twitter.com/tZEWtZa5CE
— Dr Mahathir Mohamad (@chedetofficial) November 17, 2018
ក្រៅពីនេះ មេដឹកនាំកាណាដាក៏មានកង្វល់ចំពោះវិបត្តិរ៉ូហ៊ីងយ៉ាដែរ។ លោក ទ្រូដូ មិនពេញចិត្តការនាំជនភៀសខ្លួនរ៉ូហ៊ីងយ៉ា ត្រឡប់ពីបង់ក្លាដែសមកមីយ៉ាន់ម៉ាវិញក្នុងស្ថានភាពបច្ចុប្បន្នឡើយ។
ការលើកឡើងពីបញ្ហារ៉ូហ៊ីងយ៉ាពីសំណាក់កាណាដា កើតឡើងបន្ទាប់ពីលោក មហាធៀ បានទិតៀនលោកស្រី អ៊ុងសាន ស៊ូជី នៅកិច្ចប្រជុំកំពូលអាស៊ានលើកទី ៣៣ នៅសិង្ហបុរី ដ្បិតលោកស្រីព្យាយាមការពារចំណាត់ការក្រុមយោធា និងមិនខ្វាយខ្វល់នឹងការសម្លាប់រង្គាលប្រជាជនរ៉ូហ៊ីងយ៉ានោះ៕
© រក្សាសិទ្ធិដោយ thmeythmey.com
