អន្តរជាតិ
IOC ព្រមានតៃវ៉ាន់ដែលចង់ប្ដូរឈ្មោះក្នុងវិស័យកីឡា រូបភាព AFP
× គណៈកម្មាធិការអូឡាំពិកអន្តរជាតិ (IOC) បានផ្ញើលិខិតមួយទៅកាន់រដ្ឋាភិបាលតៃវ៉ាន់ និងគណៈកម្មាធិការអូឡាំពិកប្រទេសនេះជុំវិញគម្រោងប្ដូរឈ្មោះ។ IOC បានព្រមានតៃវ៉ាន់ថា កោះនេះអាចនឹងបាត់បង់សិទ្ធិក្នុងការប្រកួតប្រជែង ប្រសិនប្ដូរឈ្មោះនៅពេលចូលរួមព្រឹត្តិការណ៍កីឡាអូឡាំពិកឆ្នាំ២០២០ នៅតូក្យូនោះ។ តាមគម្រោងទុក កោះតៃវ៉ាន់នឹងធ្វើប្រជាមតិប្ដូរឈ្មោះដែលកំពុងប្រើក្នុងវិស័យកីឡានៅចុងសប្ដាហ៍នេះ។
ក្នុងលិខិតថ្ងៃទី១៧ ខែវិច្ឆិកា គណៈកម្មាធិការអូឡាំពិកអន្តរជាតិ (IOC) លើកឡើងថា ការផ្លាស់ប្ដូរឈ្មោះណាមួយនៃសមាជិក គឺស្ថិតក្រោមយុត្តាធិការរបស់ខ្លួន។ IOC បានព្រមានគណៈកម្មាធិការអូឡាំពិកឆាយនីសតៃប៉ិ (CTOC) និងរដ្ឋាភិបាលតៃវ៉ាន់ពីផលវិបាកដែលអាចកើតឡើង បើ IOC យល់ថា ការផ្លាស់ប្ដូឈ្មោះនេះ ជារឿងនយោបាយ។
កោះតៃវ៉ាន់នឹងធ្វើប្រជាមតិប្ដូរឈ្មោះរបស់ខ្លួននៅថ្ងៃទី២៤ ខែវិច្ឆិកាខាងមុខ ស្របគ្នានឹងការបោះឆ្នោថ្នាក់មូលដ្ឋាន។ ក្នុងគម្រោងប្ដូរឈ្មោះនេះ អ្នកបោះឆ្នោតនឹងសម្រេចថា តៃវ៉ាន់គួរប្រើឈ្មោះ «តៃវ៉ាន់» ជំនួសឲ្យ «ឆាយនីសតៃប៉ិ» ឬយ៉ាងណា សម្រាប់ការប្រកួតអូឡាំពិកឆ្នាំ២០២០ ដែលជប៉ុនធ្វើម្ចាស់ផ្ទះ និងកម្មវិធីផ្សេងទៀត។ IOC រំឭកតៃវ៉ាន់ថា អាចនឹងត្រូវបានព្យួរសមាជិកភាព បើគេរកឃើញថា សកម្មភាព CTOC មានការលូកដៃពីរដ្ឋាភិបាល។
យ៉ាងណាមិញ IOC ប្រកាសមិនលូកលាន់ដំណើរការក្នុងស្រុកឡើយ និងគោរពយ៉ាងពេញលេញសេរីភាពបញ្ចេញមតិរបស់ប្រជាជនតៃវ៉ាន់ឡើយ។ ស្ថាប័នកីឡាដ៏ធំមួយនេះ នឹងឃ្លាំមើលថា នឹងមានការប៉ុនប៉ងដាក់សម្ពាធលើគណៈកម្មាធិការក្នុងស្រុកឬយ៉ាងណា ហើយបើជាការដាក់សម្ពាធពីឥទ្ធិពលខាងក្រៅនោះ IOC នឹងចាត់វិធាការមិនខាន។ IOC ក៏សង្ឃឹមថា ផលប្រយោជន៍របស់ចលនាអូឡាំពិកនៅឆាយនីសតៃប៉ិ នឹងឈ្នះចរន្តនយោបាយ។ នេះបើតាមការផ្សាយរបស់ AFP ។
តាមពិតទៅ ការប្រើឈ្មោះឆាយនីសតៃប៉ិ ត្រូវចាប់ផ្ដើមពីឆ្នាំ១៩៨១ មក។ ក្រុងប៉េកាំងដែលអះអាងថា ខ្លួនជាតំណាងស្របច្បាប់តែមួយគត់របស់ចិនទាំងអស់ ចាត់ទុកការប្រើឈ្មោះនេះព្រមគ្នានឹងទង់ជាតិ សញ្ញាជាតិរបស់តៃវ៉ាប់ក្នុងព្រឹត្តិការណ៍អន្តរជាតិ ជារឿងរសើបមួយ។ នេះក៏ព្រោះតែចិនយល់ថា វាជាការលើកកម្ពស់អត្តសញ្ញាណរបស់តៃវ៉ាន់ ដែលអាចជំរុញដល់គំនិតផ្ដាច់ខ្លួនរបស់កោះមួយនេះនៅពេលខាងមុខមិនខាន។
រឿងប្រជាមតិនេះ ក្រុងប៉េកាំងក៏មិនពេញចិត្តដែរ។ កន្លងមក មន្ត្រីចិនគ្រប់ថ្នាក់សុទ្ធតែអះអាងដូចៗគ្នាពីការមិនអាចដាច់គ្នាបានរវាងចិន និងទឹកដីតៃវ៉ាន់ ហើយចិនក៏មិនរអានឹងប្រើកម្លាំងយោធាដណ្ដើមតៃវ៉ាន់មកគ្រប់គ្រងដែរ។ ឯរឿងកីឡាវិញ ចិនបានព្រមានរួចហើយថា តៃវ៉ាន់អាចត្រូវកាំបិតចិតដងឯង ហើយអត្តពលិកតៃវ៉ាន់អាចលែងមានមុខក្នុងកម្មវិធីប្រកួតអន្តរជាតិនានា កុំថាឡើយព្រឹត្តិការណ៍អូឡាំពិកបួនឆ្នាំម្ដងនោះ៕
© រក្សាសិទ្ធិដោយ thmeythmey.com