រថយន្ត
អន្តរជាតិ
អេស្ប៉ាញគ្រោងហាមឃាត់ការលក់យានយន្តប្រើសាំង និងម៉ាស៊ូត ចាប់ពីឆ្នាំ២០៤០
× បន្ទាប់ពីបារាំង និងអង់គ្លេស រដ្ឋាភិបាលអេស្ប៉ាញ បានរៀបចំសេចក្តីព្រាងច្បាប់មួយស្តីពីបន្លាស់ប្តូរថាមពល ដោយហាមឃាត់ការលក់យានយន្តដែលប្រើសាំង និងម៉ាស៊ូត ចាប់ពីឆ្នាំ២០៤០ តទៅ។ នេះបើយោងតាមការផ្សាយរបស់ AFP។
នៅឆ្នាំ២០៣០ អេស្ប៉ាញ មានគម្រោងផលិតថាមពលអគ្គិសនី៧០ភាគរយ ដែលចេញពីថាមពលព្រះអាទិត្យ ខ្យល់ និងទឹកជាដើម ហើយនៅឆ្នាំ២០៥០ ប្រទេសសេដ្ឋកិច្ចលំដាប់ទី៥នៅអឺរ៉ុបមួយនេះ គ្រោងពឹងផ្អែកទាំងស្រុងលើថាមពលកកើតឡើងវិញ សម្រាប់ប្រព័ន្ធអគ្គិសនីរបស់ខ្លួន។
សម្រាប់គម្រោងលើកកម្ពស់បរិស្ថាននេះ អេស្ប៉ាញ នឹងអភិវឌ្ឍន៍ទីតាំងសម្រាប់យានយន្តដែលមានការបំពុលតិចតួច ជាពិសេសការតម្លើងស្ថានីយ៍បញ្ចូលចរន្តសម្រាប់រថយន្តអគ្គិសនី។
ទាក់ទងនឹងផែនការហាមឃាត់រថយន្តប្រើប្រេង និងម៉ាសូត ចាប់ពីឆ្នាំ២០៣០ អេស្ប៉ាញនឹងធ្វើតាមដំណាក់កាល តាមរយៈការដាក់បណ្តាទីក្រុងដែលមានពលរដ្ឋប្រមាណ៥០ ០០០ ជា «តំបន់ដែលមានការបំភាយកម្រិតទាប» នៅមុនឆ្នាំ២០២៣ រីឯក្រុងម៉ាឌ្រីត និងបាសេឡូណា នឹងមានការកំហិតលើចរាចរណ៍យានយន្ត។
ក្រសួងបរិស្ថានអេស្ប៉ាញ បានអះអាងថា នៅពេលដែលច្បាប់ចូលជាធរមាន រដ្ឋាភិបាលនឹងចាត់វិធានប្រឆាំងសកម្មភាពរុករករ៉ែផ្សេងៗ ដែលគ្មានច្បាប់អនុញ្ញាតទាំងដែនគោក និងដែនទឹក។ អេស្ប៉ាញចង់បង្ហាញពីឆន្ទះខ្ពស់របស់ខ្លួនក្នុងការគោរពគោលការណ៍បរិស្ថានរបស់សហភាពអឺរ៉ុប៕
© រក្សាសិទ្ធិដោយ thmeythmey.com