Zverev ផ្តួល Djokovic ក្លាយជាជើងឯក ATP ក្មេងជាងគេលើលោក

កីឡាអន្តរជាតិ

អន្តរជាតិ

Zverev ផ្តួល Djokovic ក្លាយជាជើងឯក ATP ក្មេងជាងគេលើលោក

19, Nov 2018 , 5:14 pm

រូបភាព

ដោយ: ទេព ពិទូរ្យ

កីឡាករវាយកូនបាល់វ័យក្មេង Alexander Zverev បានយកឈ្នះកីឡាករលំដាប់ទី ១ ពិភពលោក Novak Djokovic ដើម្បីគ្រងជើងឯកពានរង្វាន់ Nitto ATP Finals ដែលជាជ័យជម្នះដ៏ធំបំផុតក្នុងអាជីពរបស់គេ នាការប្រកួតវគ្គផ្តាច់ព្រ័ត្រ ថ្ងៃទី១៨ ខែវិច្ឆិកា នៅទីក្រុងឡុងដ៍ ចក្រភពអង់គ្លេស។

កំពូលអ្នកវាយកូនបាល់សញ្ជាតិស៊ែប៊ី Djokovic វ័យ ៣១ ឆ្នាំដែលអ្នកគាំទ្រជុំវិញពិភពលោករំពឹងថានឹងអាចឈ្នះពាន ATP នេះក្នុងការប្រកួតវគ្គផ្តាច់ព្រ័ត្រជាលើកទី៦របស់ខ្លួននោះ បែជាត្រូវបរាជ័យក្រោមដៃកីឡាករវ័យក្មេងរបស់អាល្លឺម៉ង់ ក្នុងលទ្ធផល ៦-៤ និង ៦-៣។

Zverev អាយុ២១ឆ្នាំ ដែលជាកីឡាករលំដាប់ថ្នាក់ទី ៥ ពិភពលោក បានក្លាយជាកីឡាករវាយកូនបាល់វ័យក្មេងជាងគេដែលអាចឈ្នះពានរង្វាន់ចុងក្រោយបញ្ចប់រដូវកាលឆ្នាំ២០១៨នេះ។

កីឡាករសញ្ជាតិអាល្លឺម៉ង់កាត់រុស្ស៊ី ដែលបានទទួលទឹកប្រាក់ ២,៥៧ លានដុល្លារអាមេរិកពីការឈ្នះជើងឯកនេះនិយាយថា៖«ពិតជាមិនគួរឲ្យជឿដែលខ្ញុំអាចក្លាយជាម្ចាស់ពានរង្វាន់ធំបំផុតដែលខ្ញុំធ្លាប់បានឈ្នះពីមុន។ ការលេងរបស់ខ្ញុំ និងការទទួលជ័យជម្នះនៅថ្ងៃនេះ សម្រាប់ខ្ញុំវាពិតជាអស្ចារ្យណាស់»។

Zverev ធ្លាប់ចាញ់ Djokovic នៅវគ្គសន្សំពិន្ទុនៃព្រឹត្តិការណ៍នេះ ប៉ុន្តែបន្ទាប់ពីទម្លាក់ Roger Federer នៅវគ្គពាក់កណ្តាលផ្តាច់ព្រ័ត្រហើយនោះ រូបគេរឹតតែមានការជឿជាក់ខ្លាំងក្លាដើម្បីបញ្ចប់កីឡាករសញ្ជាតិស៊ែប៊ី ដែលវាស្មើនឹងការបញ្ចប់រដូវកាលរបស់ Federer ដូចគ្នា៕