លោក គង់ សភា លាងចាន និងចិតបន្លែ ដើម្បីរកចំណូលផ្គត់ផ្គង់ជីវភាព និងសកម្មភាពនយោបាយនៅក្រៅប្រទេស

ជាតិ

បទយកការណ៍ / បទសម្ភាសន៍

លោក គង់ សភា លាងចាន និងចិតបន្លែ ដើម្បីរកចំណូលផ្គត់ផ្គង់ជីវភាព និងសកម្មភាពនយោបាយនៅក្រៅប្រទេស

20, Nov 2018 , 8:59 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ មួយឆ្នាំហើយ ដែលអតីតមន្ត្រីជាន់ខ្ពស់គណបក្សសង្គ្រោះជាតិមួយចំនួន ខំប្រឹងធ្វើចលនានយោបាយក្រៅប្រទេសជាមួយលោក សម រង្ស៊ី អតីតថ្នាក់ដឹកនាំគណបក្ស ក្រោយពីតុលាការសម្រេចរំលាយបក្ស កាលពីឆ្នាំមុន។ អតីតមន្ត្រីជាន់ខ្ពស់គណបក្សសង្គ្រោះជាតិខ្លះ ដែលនៅក្នុងប្រទេសកម្ពុជា រស់នៅដោយភាពស្ងប់ស្ងៀម ដោយសារតែជាប់បម្រាមនយោបាយ៥ឆ្នាំរបស់តុលាការ ខណៈមន្ត្រីខ្លះទៀតនៅក្រៅប្រទេស បន្តសកម្មភាពនយោបាយការបរទេសជាមួយប្រទេសនានា ដើម្បីសុំអន្តរាគមន៍រឿងនយោបាយនៅកម្ពុជា។

ងាកមកនិយាយពីសកម្មភាពនយោបាយនៅក្រៅប្រទេសនេះ លោក គង់ សភា ដែលជាអតីតតំណាងរាស្ត្របក្សប្រឆាំងមួយរូប បានបន្តសកម្មភាពនយោបាយយ៉ាងពុះពោរផងដែរ ។ ប៉ុន្តែដើម្បីអាចឈរជើងតស៊ូនយោបាយនៅក្រៅប្រទេសបាន លោក គង់ សភា ត្រូវរកការងារធ្វើក្រៅម៉ោងនយោបាយបន្ថែម សម្រាប់ផ្គត់ផ្គង់ជីវភាពខ្លួន។ ការងារដែលលោក គង់ សភា កំពុងធ្វើនោះ គឺជាការងារលាងចាន និងចិតបន្លែ នៅក្នុងហាងខ្មែរមួយ នៃប្រទេសកាណាដា។

ជាបន្តសូមលោក-អ្នកនាង ស្ដាប់កិច្ចសម្ភាសរវាងលោក រំដួល ចិត្រា អ្នកសារព័ត៌មានថ្មីៗ ជាមួយលោក គង់ សភា អតីតតំណាងរាស្ត្រគណបក្សសង្គ្រោះជាតិ ដូចតទៅ៖

មូលហេតុដែលលោក គង់ សភា ត្រូវធ្វើការបន្ថែមនេះ ដោយសារតែលោក គ្មានចំណូល ឬថវិកាអ្វី សម្រាប់ផ្គត់ផ្គង់ជីវភាពនៅក្រៅប្រទេសឡើយ ក្រោយពីគណបក្សខ្លួនត្រូវបានតុលាការរំលាយនេះ។ ដូច្នេះដើម្បីអាចយកចំណូលបាន សម្រាប់ផ្គត់ផ្គង់ជីវភាព និងបង់ថ្លៃជួលផ្ទះតម្លៃ ៧៥០ដុល្លារកាណាដា (ជាង៥០០ដុល្លារ) ក្នុងមួយខែនោះ លោក គង់ សភា ត្រូវធ្វើការរយៈពេល៣០ម៉ោង ក្នុងមួយសប្ដាហ៍ ដោយក្នុងមួយម៉ោងអាចរក១២ដុល្លារកាណាដា។

ក្រៅពីរូបលោក ក៏មានកូនប្រុសលោកម្នាក់ទៀត ដែលកំពុងបន្តការសិក្សានៅកាណាដា ជួយធ្វើការក្រៅម៉ោងសិក្សា ដើម្បីរកចំណូលផ្គួបផ្សំគ្នា សម្រាប់ទប់ទល់ការចំណាយផ្សេងៗផង៕