AFF Suzuki Cup៖ កម្ពុជាត្រូវការឈ្នះឡាវនៅល្ងាចនេះ ដើម្បីបន្តក្តីសង្ឃឹម

កីឡាជាតិ

ជាតិ

AFF Suzuki Cup៖ កម្ពុជាត្រូវការឈ្នះឡាវនៅល្ងាចនេះ ដើម្បីបន្តក្តីសង្ឃឹម

20, Nov 2018 , 11:26 am

រូបភាព

ដោយ:

ក្រុមកីឡាករជម្រើសជាតិកម្ពុជាត្រូវបើកទ្វារពហុកីឡដ្ឋានជាតិស្វាគមន៍ក្រុមភ្ញៀវឡាវ សម្រាប់ជំនួបវគ្គជម្រុះពូល A នៃពានរង្វាន់ AFF Suzuki Cup នៅម៉ោង៦:៣០នាទីល្ងាចថ្ងៃទី២០ ខែវិច្ឆិកា ឆ្នាំ២០១៨។ កម្ពុជាត្រូវការឈ្នះឡាវជាចាំបាច់នៅថ្ងៃនេះ បើពុំនោះទេនឹងអស់ឱកាសឡើងទៅបន្ត ទោះបីនៅសល់មួយប្រកួតទៀតក៏ដោយ។

ទោះបីវាជំនួបបង្គ្រប់កិច្ចសម្រាប់ក្រុមឡាវ តែវាជាការប្រកួតមួយដ៏សំខាន់សម្រាប់កម្ពុជា ពោលគឺកម្ពុជាត្រូវឈ្នះជាចាំបាច់នៅថ្ងៃនេះ ដើម្បីទទួលបាន៣ពិន្ទុសម្រាប់បន្តក្តីសង្ឃឹមក្នុងការឈានទៅវគ្គបន្ត។ ក្នុងករណីចាញ់ឬស្មើឡាវ នោះកម្ពុជានឹងក្លាយជាក្រុមទី២ ដែលធ្លាក់ចេញពីព្រឹត្តិការណ៍ AFF Suzuki Cup បន្ទាប់ពីឡាវ។

សម្រាប់ការប្រកួតកន្លងមកក្រុមទាំងពីរសុទ្ធតែមិនទាន់ស្គាល់ជ័យជម្នះដូចគ្នា ដោយកម្ពុជាបានចាញ់ម៉ាឡេស៊ី ១-០ ក្នុងជំនួបទី១និងបន្តចាញ់មីយ៉ាន់ម៉ា ៤-១ ក្នុងជំនួបទី២ ខណៈឡាវចាញ់វៀតណាម ៣-០ មីយ៉ាន់ម៉ា និងម៉ាឡេស៊ីក្នុងលទ្ធផល ៣-១ ដូចគ្នា។ បច្ចុប្បន្នកម្ពុជាស្ថិតនៅលេខ៤ក្នុងតារាង រីឯឡាវស្ថិតនៅបាតតារាងមាន០ពិន្ទុដូចគ្នា។

បើតាមប្រវត្តិ នេះជាការជួបគ្នាលើកទី១៤រវាងក្រុមទាំងពីរ បើគិតតាំងពីឆ្នាំ១៩៧១។ សម្រាប់ការជួបគ្នាកន្លងមកកម្ពុជាធ្លាប់យកឈ្នះឡាវ៥ ចាញ់៥ និងស្មើ៣។ ការជួបគ្នាពីរលើកចុងក្រោយកម្ពុជាបានបញ្ចប់ក្នុងលទ្ធផលស្មើ ១-១ ក្នុងជំនួបមិត្តភាពអន្តរជាតិនៅខែមិថុនា ឆ្នាំ២០១៥ និងយកឈ្នះ ២-១ ក្នុងវគ្គជម្រុះ AFF Championship ក្នុងអំឡុងខែតុលា ឆ្នាំ២០១៦។

នៅពូល A នេះដែរ ក្រុមមីយ៉ាន់ម៉ាត្រូវបើកទ្វារពហុកីឡដ្ឋាន Thuwanna Youth Training Centre Stadium ស្វាគមន៍វៀតណាមនៅម៉ោង៥:៣០នាទីល្ងាច(ម៉ោងនៅកម្ពុជា)។ នេះជាជំនួបប្រជែងដណ្តើមកំពូលតារាង ខណៈបច្ចុប្បន្នមីយ៉ាន់ម៉ាកំពុងគ្រងតំណែងនេះ និងវៀតណាមឈរលេខ២ដោយមាន៦ពិន្ទុស្មើគ្នា។ បើសិនក្រុមទាំងពីរបញ្ចប់ក្នុងលទ្ធផលស្មើគ្នា នោះកម្ពុជានឹងធ្លាក់ចេញពីព្រឹត្តិការណ៍នេះ ទោះបីកម្ពុជាយកឈ្នះឡាវក៏ដោយ៕