ជាតិ
បទយកការណ៍ / បទសម្ភាសន៍
«ផាសិន» ខ្មែរ និងវៀតណាម កំពុងប្រជែងគ្នានៅលើទីផ្សារកម្ពុជា
× មណ្ឌលគីរី៖ បច្ចុប្បន្ន កម្ពុជា កំពុងនាំចូលផ្លែ«ផាសិន ឬផ្លែក្រូចវល្លិ» ពីប្រទេសវៀតណាម៥តោនក្នុងមួយថ្ងៃ ដើម្បីយកមកផ្គត់ផ្គង់ទីផ្សារក្នុងស្រុក ខណៈកម្ពុជាអាចផ្គត់ផ្គង់បានតែ៥តោន។ ការនាំចូលផ្លែ«ផាសិន» ពីប្រទេសជិតខាងច្រើននេះ វាជារឿងមួយដែលត្រូវយកចិត្តទុកដាក់ផងដែរ។
លោក យ៉ង សាំងកុមារ ដែលជាអ្នកជំនាញកសិកម្ម និងជាស្ថាបនិកអង្គការសេដាក បាននិយាយថា កម្ពុជាមានតម្រូវការផ្លែ«ផាសិន» ចំនួន១០តោនក្នុងមួយថ្ងៃ ខណៈកសិកម្មនៅកម្ពុជា អាចផ្គត់ផ្គង់តម្រូវការនេះ បានតែ៥តោនប៉ុណ្ណោះ។ នេះគឺជាមូលហេតុដែលនាំឲ្យកម្ពុជា ត្រូវការនាំចូលផ្លែផាសិន ពីវៀតណាមមកផ្គត់ផ្គង់តម្រូវការក្នុងស្រុកបន្ថែម។
ស្តាប់សំឡេងលោក យ៉ង សាំងកុមារ
ថ្លែងចំពោះមុខអ្នកកាសែត ក្នុងចម្ការផ្លែផាសិន របស់ពលរដ្ឋជនជាតិដើមភាគតិចព្នង ក្នុងឃុំដាក់ដាំ ខេត្តមណ្ឌលគីរី អ្នកជំនាញកសិកម្មរូបនេះ បាននិយាយថា៖«បើតាមយើងដឹង យើងយកតាមតួលេខនាំចូលពីខាងក្រៅ ពីវៀតណាមក្នុងមួយថ្ងៃ គឺ៥តោន ។ ប៉ុន្តែបើយើងនិយាយតាមតម្រូវការ ប្រហែលជា១០តោន»។
ដោយសារតែមើលឃើញពីបញ្ហានាំចូល ទើបស្ថាបនិកអង្គការសេដាករូបនេះ ជំរុញឲ្យពលរដ្ឋជនជាតិដើមភាគតិចខេត្តមណ្ឌល បង្កើនរបរកសិកម្មដាំផ្លែផាសិនសរីរាង្គឲ្យបានច្រើន ដើម្បីបំពេញតម្រូវការក្នុងស្រុក និងអាចនាំចេញទៅក្រៅប្រទេស នាពេលអនាគត។
«ទីមួយ នៅមណ្ឌលគីរីនេះ ក្រៅពីការដាំ(ផ្លែផាសិន)របស់ពលរដ្ឋជនជាតិដើម ក៏មានកសិករយើងមកវិនិយោគជាឯកជនផងដែរ ។ ណាមួយនៅតំបន់ផ្សេងៗទៀត ខ្ញុំក៏បានជំរុញឲ្យមានការដាំកាន់តែច្រើន ឧទាហរណ៍នៅតំបន់ថ្មបាំង ខេត្តកោះកុង ឲ្យដាំនៅខាងកំពង់ស្ពឺ ខាងបាត់ដំបង និងកំពត ហើយយើងបានរៀបចំឲ្យមានជាសហគមន៍ដាំក្រូចវល្លិ៍ (ផាសិន)នេះ ឲ្យទៅជាបណ្ដាញហើយ។ ដូច្នេះក្រៅពីជំរុញជនជាតិដើមភាគតិច យើងក៏បានពង្រីកឲ្យមានការដាំ ជាមួយកសិករយើងផ្សេងទៀតដែរ»។ នេះជាការបញ្ជាក់របស់លោក យ៉ង សាំងកុមារ ដែលបានបន្ថែមថា ការជំរុញឲ្យកសិករដាំផ្លែផាសិននេះ ជាការទប់ស្កាត់ការនាំចូលពីប្រទេសជិតខាងមួយផ្នែកផងដែរ។
បច្ចុប្បន្ននេះ មានពលរដ្ឋជនជាតិដើមភាគតិច២០គ្រួសារ នៅខេត្តមណ្ឌល កំពុងធ្វើកសិកម្មលើផ្លែផាសិននេះ ដែលអាចផ្គត់ផ្គង់តម្រូវការក្នុងស្រុក បានចំនួនតែ១តោនប៉ុណ្ណោះ។ បើតាមអ្នកជំនាញរូបនេះ កម្ពុជានឹងអាចមានទីផ្សារផ្លែផាសិន សម្រាប់ផ្គត់ផ្គង់នៅក្នុងស្រុកគ្រប់គ្រាន់តាមតម្រូវការ ហើយក៏អាចនាំចេញទៅក្រៅប្រទេសបានផងដែរ នៅក្នុងរយៈពេល៥ឆ្នាំខាងមុខ។
© រក្សាសិទ្ធិដោយ thmeythmey.com