ជាតិ
បុណ្យអុំទូក
សេដ្ឋកិច្ច
អ្នកជំនាញ៖ កម្ពុជានៅខ្វះខាតទាំងសេវាកម្ម និងផលិតផល ដើម្បីទទួលគំហុកទេសចរពេលបុណ្យទាន
× ភ្នំពេញ៖ ចំនួនពលរដ្ឋចេញដើរកម្សាន្តនៅតាមតំបន់គោលដៅទេសចរណ៍សំខាន់ៗ នឹងមានសន្ទុះខ្លាំង ក្នុងឱកាសពិធីបុណ្យអុំទូកឆ្នាំនេះ ប៉ុន្តែអ្នកក្នុងវិស័យនេះមើលឃើញថា កម្ពុជានៅខ្វះខាតសេវាកម្ម និងផលិតផលទេសចរណ៍ ដើម្បីទទួលគំហុកទេសចរទាំងនោះ ក្នុងពេលបុណ្យទានម្ដងៗ។
លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជា (CATA) បានឲ្យដឹងថា ពលរដ្ឋ នឹងមានសន្ទុះដើរកម្សាន្តនៅខេត្តគោលដៅ ដែលលោកស្រីសង្កត់ធ្ងន់នៅតំបន់ឆ្នេរ និងភូមិភាគឦសាន។ តែអ្នកស្រីបន្ថែមថា តំបន់ទេសចរណ៍ខេត្តមណ្ឌលគិរី និងរតនគិរី មិនទាន់អាចទទួលភ្ញៀវបានគ្រប់គ្រាន់ ដោយនៅខ្វះខាតសេវាកម្ម និងផលិតផលទេសចរណ៍។
ប្រធាន CATA រូបនេះ បានមើលឃើញពីនិន្នាការពលរដ្ឋទៅកម្សាន្តនៅខេត្តកំពត និងកែបកាន់តែច្រើន ដោយសារខេត្តព្រះសីហនុ ខ្វះខាតសេវាកម្មស្នាក់នៅ។
លោកស្រី ស៊ីវលីន ហាក់បារម្ភពីនិន្នាការធ្លាក់ចុះពលរដ្ឋទៅលេងខេត្តព្រះសីហនុ ដោយសារបញ្ហាដែលកើតឡើងកន្លងមក ទាក់ទងនឹងគំហុកភ្ញៀវចិន និងបញ្ហាសណ្ដាប់ធ្នាប់។ «កាលណាមានបរទេសមកច្រើនពេកទៅ ហើយការរៀបចំ សណ្ដាប់ធ្នាប់ មិនទាន់បានល្អជាដើម ក៏មានការប៉ះពាល់ដែរ ពលរដ្ឋក៏អត់ចង់ទៅលេងដែរ»។ តែទន្ទឹមនឹងនេះលោកស្រីបានរំពឹងពីការចាប់អារម្មណ៍របស់ពលរដ្ឋ ទៅកម្សាន្តនៅបណ្ដាកោះនានាក្នុងខេត្តព្រះសីហនុ ដែលជួយបំពេញការថមថយណាមួយនៅតំបន់ឆ្នេរ។
ពលរដ្ឋ នាពេលសព្វថ្ងៃ មាននិន្នាការចង់ដើរកម្សាន្តទៅតំបន់ថ្មីៗ ស្របពេលពួកគាត់មានប្រាក់ចំណូលកាន់តែប្រសើរ។ នេះបើតាមការអះអាងរបស់លោកស្រី ឆាយ ស៊ីវលីន ដែលលោកស្រីជំរុញអ្នកពាក់ព័ន្ធត្រូវរៀបចំសេវាកម្ម ផលិតផលទេសចរណ៍ និងសណ្ដាប់ធ្នាប់ បន្ថែមទៀតដើម្បីទាក់ទាញចលនាដើរកម្សាន្តក្នុងស្រុកកាន់ច្រើន ជាជាងការចំណាយទៅក្រៅប្រទេស៕
Tag:
អុំទូក
ឆាយ ស៊ីវលីន
© រក្សាសិទ្ធិដោយ thmeythmey.com