ក្រុមកីឡាបាល់ទាត់ជម្រើសជាតិកម្ពុជា ឈ្នះឡាវ ៣-១ សម្រាប់ការប្រកួតក្នុងពូល A នៃព្រឹត្តិការណ៍ AFF Suzuki Cup 2018 នាពហុកីឡដ្ឋានជាតិអូឡាំពិក។ នេះជាជ័យជម្នះលើកដំបូងក្រោមការដឹកនាំផ្ទាល់ និងមិនផ្ទាល់របស់អ្នកចាត់ការទូទៅជប៉ុន Keisuke Honda។ ទោះបីជាយ៉ាងណាក៏ដោយ កម្ពុជាមិនបានពិន្ទុគ្រប់គ្រាន់ក្នុងការឈានទៅវគ្គបន្តឡើយ ដោយសារមីយ៉ាន់ម៉ា និងវៀតណាម បញ្ចប់ការប្រកួតដោយគ្មានការស៊ុតបាល់បញ្ចូលទី ដើម្បីទទួលបានពិន្ទុសរុប៧រៀងៗខ្លួន។
នៅនាទី១៨ ខ្សែការពារ សាត រ៉ស៊ីប បានបញ្ជូនបាល់ទៅឲ្យ ចាន់ វឌ្ឍនាកា តែតបាល់បញ្ចូលទីគ្រាប់ទីមួយ។ បន្ទាប់មក អ្នកចាំទីឡាវ Saymonolinh Paseuth បានធ្វើឲ្យ សារ៉េត គ្រីយ៉ា ដួលនៅតំបន់គ្រោះថ្នាក់ ហើយ ប្រាក់ មុនីឧត្តម បានទាត់បាល់ប៉េណាល់ទីជួយឲ្យកម្ពុជានាំមុខ ២-០ នៅនាទី៣៦។
នៅនាទី៧៦ Somxay Keohanam វាយបកបាន១គ្រាប់សម្រាប់ក្រុមឡាវ ប៉ុន្តែមួយនាទីក្រោយមក កែវ សុខផេង បន្ថែមបាន១គ្រាប់ទៀតសម្រាប់ម្ចាស់ផ្ទះ។
ទោះបីជាយ៉ាងណាក៏ដោយ កម្ពុជាមិនអាចឈានទៅវគ្គបន្តឡើយ ដោយសារតែមីយ៉ាន់ម៉ា និងវៀតណាម បានបញ្ចប់ការប្រកួតដោយគ្មានការស៊ុតបាល់បញ្ចូលទី។ កម្ពុជានៅសល់ជំនួបចុងក្រោយនៅទឹកដីវៀតណាម នាថ្ងៃទី២៤ ខែវិច្ឆិកា។
ជម្រើស១១នាក់ដំបូងកម្ពុជា៖ អ៊ុំ វិចិត្រ (អ្នកចាំទី), សាត រ៉ស៊ីប, ហុង ផេង (សរ ពិសិដ្ឋ), សារ៉េត គ្រីយ៉ា (ឆេង ម៉េង), សឿយ វិសាល, សុះ ស៊ូហាណា, អូន ច័ន្ទប៉ូលីន (គួច ដានី), គួច សុគម្ភៈ, កែវ សុខផេង, ប្រាក់ មុនីឧត្តម, ចាន់ វឌ្ឍនាកា។
ជម្រើស១១នាក់ដំបូងឡាវ៖ Saymanolinh Paseuth (អ្នកចាំទី), Vanna Bounlovongsa, Thinnakone Vongsa, Lathsay Lounlasy, Aphixay Thanakhanty, Phithack Kongmathilath, Kaharn Phetsivilay, Thotnilath Sibounhuang, Phatthana Phommathep, Phouthone Innalay, Somxay Keohanam៕