ជាតិ
ព័ត៍មានសុខភាព
អ្នកជំនាញ៖ជំងឺក្រួសក្នុងតម្រងនោម កំពុងតែកើតឡើងច្រើននៅកម្ពុជា
× ជំងឺក្រួសក្នុងតម្រងនោម កំពុងតែមានការកើនឡើងគួរឲ្យកត់សម្គាល់ លើពលរដ្ឋកម្ពុជា។ នេះបើតាមទីភ្នាក់ងារសាព័ត៌មានកម្ពុជា ដែលបានស្រង់សម្តី លោកវេជ្ជបណ្ឌិត ប៊ូ សុភាព អ្នកឯកទេសជំនាញលើការវះកាត់ ជម្ងឺតម្រងនោម និងវះកាត់ទូទៅ។ អ្នកជំនាញរូបនេះបញ្ជាក់ដូច្នេះ៖« «អ្នកជំងឺក្រួសក្នុងតម្រងនោមដែលបានមក ពិនិត្យ និងវះកាត់តាមមន្ទីរពេទ្យ កំពុងតែមានការកើនឡើង»។
ការកើតក្រួសក្នុងតម្រងនោមនេះ គឺបណ្ដាលមកពី មូលហេតុចម្បងៗ ជាច្រើនដូចជាអ្នកជំងឺហូបទឹកតិច បង្កឱ្យទឹកនោមខាប់ ការមិនហាត់ប្រាណ ដើម្បីបញ្ចេញញើស ឬជាតិខ្លាញ់។ នេះបើតាមលោកវេជ្ជបណ្ឌិត ប៊ូ សុភាព ដោយបានពន្យល់ដូច្នេះ៖«ការហូបសាច់ច្រើនសម្រាប់អ្នកធាត់ របបអាហារមិនត្រឹមត្រូវ អាចបង្កឱ្យកើតមានក្រួស ដក់ជាប់ស្អិតកកើតជាដុំ នៅនឹងតម្រងនោម។ ជាពិសេសជំងឺនេះ កើតឡើងលើបុរសច្រើនជាងស្ដ្រី»។
បើតាមវេជ្ជបណ្ឌិតដដែល រោគសញ្ញានៃជំងឺក្រួសក្នុងតម្រងនោម មានដូចជាឧស្សាហ៍ឈឺចុកឆ្អឹងខ្នង ឈឺពោះ ឬឈឺចុងភ្លៅ ឈឺចុកចាប់ពេលនោម ឬនោមចេញឈាម ព្រមទាំងមានអាការៈក្អួតចង្អោរជាដើម។ ដើម្បីចៀសវាងជំងឺក្រួសក្នុងតម្រងនោម វេជ្ជបណ្ឌិតជំនាញបានណែនាំឲ្យហូបទឹកឱ្យបានច្រើន យ៉ាងហោចណាស់២លីត្រកន្លះ ឬ៣លីត្រក្នុងមួយថ្ងៃ,ហាត់ប្រាណជាប្រចាំ,បន្ថយការបរិភោគសាច់ និងប្រភេទអាហារដែលមានជាតិអាស៊ីតខ្លាំង ឬវីតាមីន C ៕
ប្រភព៖ AKP
Tag:
ជំងឺក្រួសក្នុងតម្រងនោម
សុខភាព
កម្ពុជា
© រក្សាសិទ្ធិដោយ thmeythmey.com