ភ្នំពេញ៖ ទូកងដែលមកចូលរួមប្រណាំងក្នុងឱកាសព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នៅរាជធានីភ្នំពេញ មួយចំនួនមានអ្នកឧបត្ថម្ភគ្រប់គ្រាន់ តែមួយចំនួនទៀត មានការខ្វះខាតច្រើន ព្រោះមិនមានអ្នកដែលជាជំហរឧបត្ថម្ភ។ ទូកដែលខ្វះខាតអ្នកឧបត្ថម្ភ ច្រើនតែជាទូកនៅតាមបណ្ដាខេត្ត។ ដោយសារតែងតែជួបការលំបាកលើបញ្ហាស្បៀង ទូកដែលខ្វះខាតទាំងនោះ អាចនឹងមិនមកចូលរួមប្រកួតនៅឆ្នាំក្រោយៗទៀតឡើយ។
ដើម្បីបានជ្រាបច្បាស់សូមស្ដាប់បទយកការណ៍ដែលរៀបចំដោយកញ្ញា ប៉ូ សាគុន ដូចតទៅ៖
ក្នុងឆ្នាំ២០១៨នេះទូកងដែលមកចូលរួមប្រណាំងប្រជែង ក្នុងពិធីបុណ្យអុំទូក បណ្ដែតប្រទីព សំពះព្រះខែ និងអកអំបុក នៅរាជធានីភ្នំពេញ មានចំនួនជិត៣០០គ្រឿង ដែលមកពីរាជធានីភ្នំពេញ និងនៅតាមបណ្ដាលខេត្តនានា។ ក្នុងចំណោមទូកទាំងនោះ ទូកខ្លះមានឯកឧត្តម លោកជំទាវ មន្ត្រីរាជការ អ្នកមានទ្រព្យច្រើន ឬ ក្រុមហ៊ុនជួយឧបត្ថម្ភ ការចំណាយ និងស្បៀងអាហារគ្រប់បែបយ៉ាង ប៉ុន្តែមានទូកខ្លះទៀត មិនមានអ្នកជួយឧត្ថម្ភឡើយ។ ទូកដែលគ្មានអ្នកឧបត្ថម្ភទាំងនោះ ត្រូវស្វះស្វែងដើររកសុំស្បៀងនិងទឹកឬភេសជ្ជះពីតាមវត្តនានា នៅរាជធានីភ្នំពេញ បន្ថែមពីជំនួយរបស់អ្នកភូមិរបស់ពួកគេអស់។ ទូកខ្វះអ្នកឧបត្ថម្ភខ្លះ បាននិយាយថា ឆ្នាំក្រោយអាចនឹងមិនមានវត្តមានវត្តមានទូករបស់ពួកគេ ចូលរួមប្រកួតទៀតឡើយ បើនៅតែខ្វះខាតបែបនេះ។
លោក ផ្លេក ភារុន គឺជាកីឡាករទូកងមកពីខេត្តកំពង់ចាម ក្នុងស្រុកបាធាយ បានត្អូញត្អែរថា ទូករបស់លោកមិនមានអ្នកមានទ្រព្យ ឬ ក្រុមហ៊ុនណាជួយឧបត្ថម្ភឡើយ រាល់ការចំណាយផ្សេងៗ និងស្បៀងផង លោកបានពីវត្ត និងអ្នកភូមិរ៉ៃគ្នាជួយតែប៉ុណ្ណោះ។ លោក ភារុន បញ្ជាក់៖ «ដើរសុំតាមវត្ត សុំគ្រប់សព អង្ករ ទឹកសុទ្ធ មី ឱ្យតែសប្បុរសជនឱ្យទទួលទាំងអស់»។
ត្រូវមកមុនថ្ងៃប្រកួតប៉ុន្មានថ្ងៃ ស្បៀងបម្រុងក៏កាន់តែហោចទៅ លោកត្រូវទៅដើរសុំជំនួយផ្សេងៗ ដូចជា អង្ករ ទឹក និងភេសជ្ជៈផ្សេងៗនៅតាមវត្តនានានៅក្នុងរាជធានីភ្នំពេញ ដើម្បីទ្រទ្រង់កីឡាករបានខ្លះ។ ទូកងមកពីខេត្តកំពង់ចាមដែលបានមកចូលរួមប្រណាំងជិត២០ឆ្នាំមកហើយនេះ រំពឹងទៅលើតែការដើរសុំជំនួយពីវត្ត នៅរាជធានីភ្នំពេញ និងពីទូកដូចគ្នាដែលសំបូរដោយគេចែករម្លែកឱ្យខ្លះ៖ ចំណាយសពមុខអស់ច្រើនណាស់ ខ្វះអ្វីទិញហ្នឹង។ អ្នកភូមិរៃគ្នាមកបាន៣០ម៉ឺន ខ្វះខាតចេះតែដើរសុំគេ»។
ក្នុងមួយថ្ងៃយ៉ាងហោយណាស់ទូកមួយគ្រឿងនេះ ត្រូវចំណាយអង្ករអស់មួយបេកន្លះ និងចំណាយប្រមាណ៥០ម៉ឺនរៀល ទៅលើម្ហូបអាហារ និងទិញសម្ភារៈចាំបាច់មួយចំនួន។ «មួយថ្ងៃចំណាយ៥០ម៉ឺនតូចបំផុត ធ្វើម្ហូបតាមសមរម្យធ្វើពីរមុខ អង្ករអស់ជួនខ្ចីគេ ឬទិញទៅ»។ នេះជាការបញ្ជាក់បន្ថែមរបស់លោក ភារុន។
លោក ភារុន ត្អូញត្អែរពីការពិបាកស្វែងរកជំនួយ និងបានសំណូមពរដល់សប្បុរសជនយ៉ាងដូច្នេះថា៖ «ពិបាកណាស់កំពុងដើរសុំគេខ្វែងជើងខ្វែងដៃ។ អ្វីក៏ដោយឱ្យតែគេឱ្យ យកទាំងអស់។ ព្រឹកមិញមានក្រុមហ៊ុនគេឱ្យទូកផ្សេងៗ តែខ្ញុំទៅគេថាមិនមានឈ្មោះ គេមិនឱ្យ»។
ចំណែកទូករបស់លោក ស៊ឺន យ័ន មកពីកំពង់ចាម ដែលចូលរួមប្រកួត៣ឆ្នាំហើយនោះ ក៏មិនមានអ្នកឧបត្ថម្ភដែរ។ លោកថារាល់ឆ្នាំតែងតែពិបាករកស្បៀង និងខ្វះខាតគ្រប់យ៉ាង ហើយបើនៅតែដូច្នេះទៀតទូករបស់លោកអាចនឹងមិនមានវត្តមាននៅឆ្នាំក្រោយទៀតទេ។
អ្នកដឹកនាំទូករូបនេះថា កីឡាករតែងតែចំណាយប្រាក់ផ្ទាល់ខ្លួន ដើម្បីផ្គត់ផ្គង់ការចំណាយរួម៖ «ជួយបានតែត្រឹមវត្តហ្នឹង បើវត្តអត់ក៏យើងអត់ដែរហ្នឹង អ្នកស្រុកគាត់អត់ដែរ។ គេមិនចង់មកទៀតទេ ព្រោះចេះតែខ្វះខាតចឹង ហើយគេត្រូវចំណាយប្រាក់ខ្លួនឯងបួនប្រាំម៉ឺនទៀត។ ចង់ឱ្យតែគេជួយឱ្យច្រើន បានហូបគ្រប់គ្រាន់គេចេះតែចង់មក»។
មិនខុសគ្នាពីទូកខាងលើឡើយ ទូករបស់លោក ភ្លូ ចូក ដែលមកពីវត្តមេព្រីង ស្ថិតក្នុងខេត្តកមពង់ចាម ក៏ត្រូវដើរសុំជំនួយពីវត្តនានានៅក្នុងរាជធានីភ្នំពេញដែរ។ ទូកនេះបានធូរជាងទូកខាងលើបន្តិច ដោយសារតែខាងខេត្តបានជួយជាអង្ករខ្លះៗ សម្រាប់ផ្គត់ផ្គង់កីឡាករ។ លោក ភ្លូ ចូក បញ្ជាក់៖«តាៗនៅវត្តជួយបាន២០ម៉ឺនជាង ហើយអង្ករ ខាងខេត្តជួយបាន៨បេដែរ»។
ងាកមកទូកងមកពីខេត្តស្ទឹងត្រែងវិញម្ដង។ ក្នុងចំណោមទូកងដែលខ្ញុំបានសម្ភាសទាំងអស់ ទូកងដែលមានឈ្មោះថា សេកង់សែនជ័យបារមីព្រះអង្គធំ ដែលមកពីខេត្តស្ទឹងត្រែងមួយនេះ ហាក់មានសំណាងជាងគេ ព្រោះមានអភិបាលខេត្តស្ទឹងត្រែងជួយទំនុកបម្រុងយ៉ាងយកចិត្តទុកដាក់។ «គាត់មកមើលការហូបរបស់កីឡាករ គ្រប់គ្រាន់ឬអត់ ក្នុងម្នាក់គាត់ឱ្យចុងភៅចំណាយក្នុងម្នាក់បួនម៉ឺនរៀល ហើយប្រាក់ឧបត្ថម្ភទៅស្រុកវិញផ្សេងទៀត»។ នេះជាកការបញ្ជាក់របស់លោក ឡាប់ពុទ្ធី។
ក្នុងឆ្នាំពី២០១៨នេះ ទូកងដែលមកពីខេត្តស្ទឹងត្រែង មានតែមួយនេះតែប៉ុណ្ណោះដែលមកប្រណាំងក្នុងពិធីបុណ្យអុំទូក នៅរាជធានីភ្នំពេញ។ កីឡាករទាំងអស់ត្រូវបានទំនុកបម្រុងអាហារនិងភេសជ្ជៈយ៉ាងបរិបូរ។
លោក ឡាប ពុទ្ធី ជាអនុប្រធានមន្ទីវប្បធម៌ និងវិចិត្រសិល្បៈខេត្តស្ទឹងត្រែង និងជាសមាជិកគណៈកម្មការគ្រប់គ្រងទូករបស់ខេត្តស្ទឹងត្រែង ដែលដឹកនាំក្រុមកីឡាករទូកង សេកង់សែនជ័យបារមីព្រះអង្គធំ បាននិយាយថា៖ ប្រគល់ឱ្យអ្នកទទួលខុសត្រូវផ្នែកម្ហូបគ្រាន់តែបណ្ដោះអាសន្ន១០លានរៀល មួយពេល២មុន ហើយមានពងមាន់មួយពេល២គ្រាប់បំប៉នទៀត ចំណែកភេសជ្ជៈមានដាក់ទៅតាមទូក បំប៉នកម្លាំងមិនឱ្យខ្វះទេ»។
ក្នុងពិធីបុណ្យអុំទូក បណ្តែតប្រទីព សំពះព្រះខែ និងអកអំបុក នៅរាជធានីភ្នំពេញ ក៏មានទូកងរបស់ខ្មែរកម្ពុជាក្រោមចូលរួមផងដែរ។ លោក ប៊ុន មុនី ជាអ្នកដឹងនាំទូកងរកម្ពុជាក្រោមមានជ័យ ថាទូកងនេះមានខ្មែរក្រោមទូទាំងពិភពលោកជួយឧបត្ថម្ភ។ «ជារៀងរាល់ឆ្នាំពួកខ្ញុំតែងតែមកប្រកួតមិនដែលខានទេ លើកលែងតែឆ្នាំដែលគេមិនអុំ។ ជំនួយគ្មានអ្នកណាឧបត្ថម្ភផ្ដាច់មុខទេ គឺបានបងប្អូនខ្មែរទូទាំងពិភពលោកជួយម្នាក់បន្តិចៗ»។ នេះជាការបញ្ជាក់របស់លោក ប៊ុន មុនី៕