ពីនេះ ពីនោះ
ព័ត៍មានសុខភាព
×![]()
ដោយ: គី ចំណា
កោសិកាពិសេសម្យ៉ាងរបស់មនុស្សដែលមាននាទីក្នុងការប្រយុទ្ធប្រឆាំងនឹងជំងឺមហារីកមិនអាចធ្វើការ ដោយប្រក្រតីឡើយ បើនៅក្នុងសរសៃឈាមសំបូរទៅដោយជាតិខ្លាញ់។ ដូច្នេះហើយ អ្នកដែលធាត់ងាយប្រឈមនឹងជំងឺមហារីក។
យោងតាមរបាយការណ៍របស់ក្រុមអ្នកស្រាវជ្រាវផ្នែកសុខភាពនៅសាកលវិទ្យាល័យ Trinity នៅឯទីក្រុង Dublin របស់ប្រទេសអៀឡង់ កោសិកាពិសេសនៅក្នុងរូបរាងកាយមនុស្សមានតួនាទីសំខាន់ក្នុងការប្រឆាំងមេរោគមហារីក។ ប៉ុន្តែវាប្រឈមនឹងបញ្ហានៅពេលដែលសារធាតុខ្លាញ់កើនឡើងក្នុងសរសៃឈាមមនុស្សនោះ។
ជាធម្មតា មនុស្សភាគច្រើនបានដឹងច្បាស់ថា ការពិសារបារី ស្រាបៀរ ឬការហូបអាហារដែលមានជាតិគីមីច្រើនអាចជាមូលហេតុចម្បងដែលនាំឲ្យកើតមានជំងឺមហារីក។ ប៉ុន្តែបើតាមការសិក្សាខាងលើដែលចុះផ្សាយដោយសារព័ត៌មានអង់គ្លេស BBC រាង្គកាយមនុស្សដែលធាត់ជ្រុល និងសម្បូរដោយខ្លាញ់ក្នុងសរសៃឈាមអាចប្រឈមនឹងជំងឺមហារីកខ្លាំងផងដែរ។
របាយការណ៍នោះបង្ហាញថា នៅក្នុងប្រទេសអង់គ្លេស មួយក្នុងចំណោមម្ភៃករណីនៃជំងឺមហារីកគឺកើតឡើងដោយសាររាង្គកាយធាត់ជ្រុលនេះ។ ទាក់ទិននឹងបញ្ហានេះ អ្នកជំនាញខាងឱសថសាស្ត្រកំពុងតែសិក្សាស្វែងរកដំណោះស្រាយក្នុងការផលិតឪសថដែលអាចទប់ស្កាត់នឹងបញ្ហានេះបាន។ ឱសថថ្មីដែលគេស្រាវជ្រាវនេះគឺផ្តោតលើតួនាទីជំរុញតួនាទីរបស់កោសិកាប្រឆាំងជំងឺមហារីកឡើងវិញ។
ទោះបីជាយ៉ាងនេះក្តី អ្នកជំនាញខាងផ្នែកសុខភាពតែងផ្តល់ដំបូន្មានដល់មនុស្សឲ្យធ្វើលំហាត់ប្រាណបានទៀតទាត់ រួមជាមួយការកាត់បន្ថយគ្រឿងស្រវឹង បារី និងពិសារអាហារដែលសម្បូរដោយជីវជាតិ។ នេះក៏ដោយសារ វាជាវិធីសាស្ត្រដែលល្អក្នុងការបញ្ចៀសជំងឺមហារីក ដោយមិនចាំបាច់ប្រើប្រាស់ថ្នាំឬឱសថផ្សេងៗដែលមានតាមមន្ទីរពេទ្យនោះ៕
© រក្សាសិទ្ធិដោយ thmeythmey.com
