ជាតិ
បុណ្យអុំទូក
ជាងធ្វើទូក បារម្ភខា្លច ទូកង បាត់បង់ក្នុងថ្ងៃអនាគត ព្រោះខ្វះដើមគគីរ
× កណ្ដាល៖ លោក ទ្រី ប៊ុនហួរ ជាងធ្វើទូកជាង៣០ឆ្នាំ បានត្អូញត្អែរពីការពិបាករកឈើគគីរ ដែលជាឈើល្អបំផុតសម្រាប់ធ្វើទូក។ លោក បានឲ្យដឹងថា ដើមគគីរ ដែលអាចយកមកធ្វើទូកបានទាល់តែមានអាយុកាលច្រើនឆ្នាំ។ បើអស់ដើមគគីរ ទូក«ង»វែង ក៏បាត់បង់ដែរ។ លោក ទ្រី ប៊ុនហួរ បញ្ជាក់ប្រាប់សារព័ត៌មានថ្មីៗ យ៉ាងដូច្នេះថា៖«គគីរឥឡូវ មិនសូវមានទេ ព្រោះគេកាប់ច្រើនពេក បាត់បង់ទៅៗ។ បើតាមខ្ញុំប៉ាន់ស្មានមើល ប្រហែល៤ ទៅ៥ឆ្នាំទៀត អាចថាអស់ឈើគគីរធ្វើទូកវៃងហើយ ប្រហែលយកទូកចាស់ៗ ទៅកែកុនថ្មីហើយ ដោយសារគគីរគេត្រូវការច្រើន ជាពិសេសគេយកទៅធ្វើផ្ទះ តុ ទូ និយាយឲ្យចំកន្លែងសិប្បកម្ម»។
ជាងធ្វើទូកដែលចេះពីឪពុកខ្លួនរូបរូបនេះ បានសម្ដែងក្តីបារម្ភថា ក្នុងថ្ងៃអនាគត អាចនឹងបាត់បង់ដើមគគីរសម្រាប់ធ្វើទូកងវែង។ លោក បន្ថែមថា សព្វថ្ងៃ ដើមគគីរ មានតែនៅតំបន់ព្រៃអភិរក្សព្រះរកា នៅខេត្តព្រះវិហារ។ លោកអះអាងថា ដើមគគីរមួយដើមមានប្រវែងចាប់ពី ២៩ ទៅជាង ៣០ម៉ែត្រ។ ហើយទូកមួយ ត្រូវចំណាយដើមគគីរមួយដើម ប៉ុន្តែបើធ្វើទូកពីរ ត្រូវចំណាយដើមគគីរបីដើម។
លោក លើកឡើងថាបែបនេះថា៖«ចំពោះគគីរ ដែលយកមកធ្វើទូកក្នុងមួយឆ្នាំ ចំណាយអស់ប្រហែល ៤ ទៅ១០ដើមទេ ហើយទូកមួយអាចប្រើបានរយៈពេល ៥០ឆ្នាំ ប៉ុន្តែអ្នកកាប់យកទៅធ្វើសិប្បកម្មប្រមាណ១០០ ទៅ១០០០ដើម មិនតិចទេ ខ្ញុំឃើញជាក់ស្ដែង»។
លោក ប៊ុនហួរ ដែលកំពុងត្រួតពិនិត្យមើលកូនជាង ធ្វើទូកថ្មី នៅខាងក្រោយវត្តពិជ័យរង្សី ស្ថិតនៅក្នុង ភូមិអញ្ជែង ឃុំពុកឫស្សី ស្រុកខ្សាច់កណ្ដាល ខេត្តកណ្ដាល បានបន្ថែមថា៖«ដើម្បីបានទូកមួយ ម្ចាស់ទូកសុំច្បាប់ពីអាជ្ញាធរថ្នាក់មូលដ្នាន រហូតថ្នាក់ខេត្ត រាជធានី។ ពេលស្នើសុំរួច ម្ចាស់ទូកត្រូវឲ្យលិខិតអនុញ្ញាតមកខ្ញុំ។ ខ្ញុំយកលិខិតនោះទៅជួបមេព្រៃ ដើម្បីសុំការអនុញ្ញាត។ ពេលកាប់ ត្រូវមើលដើមគគីរណា ដែលមិនប៉ះពាល់ដល់ដើមឈើដទៃ។ មិនចេះតែកាប់ផ្ដេសផ្ដាសនោះទេ»។
លោក បានអរគុណរាជរដ្ឋាភិបាល ដែលបានជួយអភិរក្សព្រៃឈើនាពេលកន្លងមក។ លោកបានស្នើដល់រាជរដ្ឋាភិបាល ឲ្យជួយការពារដើមគគីរបន្ថែមទៀត៕
© រក្សាសិទ្ធិដោយ thmeythmey.com