ជាតិ
ស.ស.យ.ក រៀបចំមហាសន្និបាតតំណាងទូទាំងប្រទេសរយៈពេល ២ថ្ងៃ ដែលមានយុវជនចូលរួមប្រមាណ ១៣០០នាក់ រូបភាពពីសហភាពសហព័ន្ធយុវជនកម្ពុជា
× ភ្នំពេញ៖ សហភាពសហព័ន្ធយុវជនកម្ពុជា នឹងរៀបចំមហាសន្និបាតតំណាងទូទាំងប្រទេសលើកទី៤ ដែលស្របនឹងខួបទី៤០ឆ្នាំរបស់ខ្លួន នៃការប្រមូលផ្តុំយុវជនគ្រប់ទិសទី ក្នុងការរួមចំណែកកសាងបន្ថែម និងលើកកម្ពស់ប្រទេសកម្ពុជា។ ព្រឹត្តិការណ៍មហាសន្និបាតតំណាងទូទាំងប្រទេសលើកទី៤នេះ ប្រព្រឹត្តទៅរយៈពេលពីរថ្ងៃ ចាប់ពីថ្ងៃទី២៦ ដល់ថ្ងៃទី២៧ ខែវិច្ឆិកា ឆ្នាំ២០១៨ នៅសណ្ឋាគារ សុខាភ្នំពេញ។
មហាសន្និបាតតំណាងទូទាំងប្រទេសនេះ នឹងផ្តោតការយកចិត្តទុកដាក់លើការបូកសរុបការងារឆ្នាំ២០១២–២០១៨ និងទិសដៅការងារឆ្នាំ២០១៨–២០២៣ ព្រមទាំងការបោះឆ្នោតជ្រើសតាំងសមាជិកគណៈកម្មាធិការកណ្តាល ។ ក្នុងមហាសន្និបាតនេះ នឹងមានកិច្ចពិភាក្សា និងការអនុម័តលើការកែប្រែលក្ខន្តិកៈនៃសហភាពសហព័ន្ធយុវជនកម្ពុជា។
ក្នុងពិធីបើកមហាសន្និបាតលើកទី៤នេះ នឹងមានការចូលរួមពីសម្តេច សាយ ឈុំ ប្រធានព្រឹទ្ធសភា, លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា, ថ្នាក់ដឹកនាំសហភាពសហព័ន្ធយុវជនកម្ពុជា រាជធានី ខេត្ត និងវិស័យ រួមទាំងសមាជិក សមាជិកា សហភាពសហព័ន្ធយុវជនកម្ពុជា សរុបទាំងអស់ចំនួន ១៣០០នាក់។ ដោយឡែក ពិធីបិទមហាសន្និបាតនេះ នឹងមានអញ្ជើញចូលរួមពីសម្តេច ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមដោយវត្តមានឥស្សរជនជាន់ខ្ពស់ជាច្រើនរូបទៀត។
សូមបញ្ជាក់ថា សហភាពសហព័ន្ធយុវជនកម្ពុជា ជារណសិរ្សទូលំទូលាយនៃយុវជនកម្ពុជា ដែលបានបន្តបេសកកម្មពីសមាគមយុវជនសាមគ្គីសង្គ្រោះជាតិកម្ពុជា និងសមាគមយុវជនកម្ពុជា ដែលបានបដិសន្ធិនៅថ្ងៃទី០២ ខែធ្នូ ឆ្នាំ១៩៧៨ ក្នុងគោលដៅសំខាន់បំផុតដើម្បីប្រមូលផ្តុំយុវជនគ្រប់ទិសទី ជាមហាកម្លាំងសាមគ្គី ក្នុងការរួមចំណែកកសាងប្រទេសកម្ពុជាជាមួយឯករាជ្យ សន្តិភាព សេរីភាព ប្រជាធិបតេយ្យ និងវឌ្ឍនភាពសង្គម៕
Tag:
ស.ស.យ.ក
សន្និបាត
© រក្សាសិទ្ធិដោយ thmeythmey.com