កូនលោក ជា យុទ្ធថន គ្រោងដាំបន្លែធ្វើជាមធ្យោបាយជួយកុមារកំព្រា ក្រៅពីសុំជំនួយសប្បុរសជន

ជាតិ

កូនលោក ជា យុទ្ធថន គ្រោងដាំបន្លែធ្វើជាមធ្យោបាយជួយកុមារកំព្រា ក្រៅពីសុំជំនួយសប្បុរសជន

25, Nov 2018 , 8:59 am

រូបភាព

ដោយ: ប៉ូ សាគុន

ភ្នំពេញ៖ លោក ថន ថារិទ្ធសាវភី បានបង្កើតសមាគមអប់រំ និងជួយក្មេងក្រីក្រ នៅខេត្តព្រះសីហនុកាលពីឆ្នាំ២០០៦ ដែលពីដើមឡើយមានឈ្មោះថា សមាគមអប់រំ និងថែទាំក្មេងកំព្រា។ បច្ចុប្បន្នលោកកំពុងស្វះស្វែងសុំជំនួយពីសប្បុរសជនគ្រប់ទិសទី ទាំងក្នុងនិងក្រៅប្រទេស ដើម្បីសាងសង់អាគារ និងផ្គត់ផ្គង់ចំណីអាហារដល់កុមារក្រីក្រជាង១០០នាក់។ ដោយមើលឃើញពីនិរន្តរភាពនៃការជួយកុមារ លោក ថន ថារិទ្ធិសាវភី គ្រោងរៀបចំឱ្យមានកន្លែងដាំបន្លែ និងផលិតទឹកសុទ្ធ ដើម្បីទ្រទ្រង់សមាគមទៅថ្ងៃអនាគត។

ជាកូនប្រុសតែម្នាក់របស់លោក ជា យុទ្ធថន និងអ្នកស្រី សោម វណ្ណស៊ូដានី ដែលជាតារាសម្ដែងដ៏ល្បីក្នុងទសវត្សរ៍ទី៦០ លោក ថន ថារិទ្ធិសាវភី ក្នុងនាមជាស្ថាបនិកសមាគមអប់រំនិងជួយក្មេងក្រីក្រ លោកមាន គោលដៅធំបំផុតមួយ គឺការកសាងសមត្ថភាពចំណេះដឹង ចំណេះធ្វើ និងជំនាញដល់កុមារ។

ដើម្បីសម្រេចគោលដៅនេះ សមាគមលោកបានរៀបចំឲ្យមានថ្នាក់រៀន សម្រាប់កុមារក្រីក្រ ដើម្បីជមរុញឲ្យពួកគេបានរៀនសូត្រដូចកុមារដទៃដែរ។ សមាគមនេះមានបង្រៀនសិស្សពីថ្នាក់ទី១ដល់ទី១២ សម្រាប់ក្មេងដែលបោះបង់ចោលការសិក្សា និងគ្មានលទ្ធភាពរៀនបន្តការសិក្សា ព្រមទាំងបង្រៀនបំប៉នបន្ថែមភាសាខ្មែរ អង់គ្លេស បារាំង ចិន កំព្យូទ័រ រូបវិទ្យា និងគណិតវិទ្យា។ នៅទីនេះក៏មានបង្រៀនអក្ខរកម្មផងដែរ។

ដោយសារការខ្វះខាត លោក ថន ថារិទ្ធសាវភី បានស្វះស្វែងសុំជំនួយពីសប្បុរសជន ទាំងក្នុងនឹងក្រៅប្រទេស តាមរយៈការច្រៀងសុំជំនួយ។ សប្បុរសជនដែលផ្ដល់ជំនួយដល់លោក មានដូចជា អាមេរិក អូស្ត្រាលី បារាំង បែលស្ហិច កាណាដា និងតាមបណ្ដារដ្ឋជាច្រើនទៀត។ សម្រាប់ប្រាក់ដែលលោក ថារិទ្ធសាវភី ទទួលបានពីសប្បុរសជន នឹងយកទៅសាងសងអាគារស្នាក់នៅ បណ្ដាល័យ អាគារសិក្សា ផ្ទះបាយ និងកន្លែងទាត់បាល់ ដែលទើបតែសាងសង់បានប្រមាណ៣០ភាគរយនោះ។

ក្មេងក្រីក្រដែលសមាគមនេះជួយ មានបីប្រភេទ គឺក្មេងដែលមានលទ្ធភាពខ្លះ ពួកគេអាចមកស្នាក់នៅក្នុងមណ្ឌលបណ្ដោះអាសន្ត ថ្ងៃសៅរ៍និងអាទិត្យ ពួកគេអាចទៅផ្ទះដើម្បីយកប្រាក់ ឬអង្ករមករៀនវិញ និងជួយមណ្ឌលខ្លះផង។ ក្មេងដែរមានលទ្ធភាពតែផ្ទះនៅឆ្ងាយពីសាលា ពួកគេអាចនៅក្នុងមណ្ឌលមួយថ្ងៃពេញ ហើយពេលល្ងាចឡើងត្រឡប់ទៅផ្ទះវិញ។ ចំណែកក្មេងដែលក្រីក្រខ្លាំង ដោយសារម្ដាយឪពុកមិនមានលទ្ធភាពឱ្យទៅរៀន ពួកគេអាចមករៀន ទទួលទានអាហារ និងស្នាក់នៅក្នុងមណ្ឌល ហើយថ្ងៃសៅរ៍និងថ្ងៃអាទិត្យ ពួកគេអាចទៅលេងគ្រួសារបាន។

ដោយមើលឃើញពីការជួយកុមារជានិរន្ដរ៍ ស្ថាបនិកសមាគមអប់រំនិងជួយក្មេងក្រីក្រ លោក ថន ថារិទ្ធិសាវភី បានរៀបចំកន្លែងដាំបន្លែ សម្រាប់ផ្គត់ផ្គង់ក្នុងសមាគមផង និងលក់ខ្លះផង ដើម្បីបានចំណូលខ្លះទ្រទ្រង់សមាគម។ ក្រៅពីនោះគម្រោងធ្វើទឹកបរិសុទ្ធ និងបញ្ជូនសិស្សឱ្យទៅបង្រៀនភាសាក្រៅម៉ោងនៅខាងក្រៅសមាគម ក៏ជាចំណែកមួយជួយរកប្រាក់ទ្រទ្រង់សមាគមបានខ្លះដែរ។

លោក ថន ថារិទ្ធិសាវភី បញ្ជាក់៖« យើងបានគិតគូរពីនិរន្តរភាពជួយក្មេងដែរ។ ខ្ញុំបានដាំបន្លែខ្លះហើយ តែដោយសារគ្មានរបង ដូច្នេះសត្វចេះតែមកស៊ីអស់។ ពេលមានលទ្ធភាពយើងនឹងធ្វើរបងឱ្យបានជាប់លាប់ ហើយយើងនឹងរៀបចំការដាំដុះឱ្យបានត្រឹមត្រូវ។ យើងមានគម្រោងផលិតទឹកសុទ្ធលក់ និងការបង្រៀនក្រៅម៉ោងនៅកន្លែងផ្សេងៗ តែយើងយកប្រាក់ពីសិស្សក្នុងតម្លៃតិចតួចបំផុត។ ឥឡូវគម្រោងទាំងនោះមិនទាន់ដំណើរការទេ ព្រោះយើងនៅខ្វះលទ្ធភាពច្រើនណាស់»។

ក្រៅពីជួយកុមារកុមារកំព្រា និងក្រីក្រ សមាគមអប់រំនិងជួយក្មេងក្រីក្រ តាសៅថ្មដា ដែលស្ថិតក្នុងស្រុកវាលរេញ ខេត្តព្រះសីហនុ ក៏មានគម្រោងទទួលចាស់ជរាមកថែទាំផងដែរ។ «ចាស់ជរាដែលគាត់គ្មានទីពឹង គ្មានកូនចៅមើលថែ យើងអញ្ជើញគាត់មកក្នុងមណ្ឌល។ ក្មេងៗកំព្រាដែលគាត់នៅទីនេះ យើងឱ្យគាត់ថែទាំចាស់ជរា ដើម្បីឱ្យគាត់សន្សំបុណ្យផង»។ នេះជាការបញ្ជាក់បន្ថែមរបស់លោក សាវភី។

សមាគមអប់រំនិងជួយក្មេងក្រីក្រ កំពុងតែស្វែងរកម្ចាស់ជំនួយ ដើម្បីគាំទ្រគម្រោងជួយក្មេងបោះបង់ចោលការសិក្សា ដោយសារតែកត្តាជីវភាព ដោយឱ្យជាអង្ករក្នុងមួយខែ១០គីឡូទៅគ្រួសារក្មេង ដើម្បីឱ្យពួកគេមានឱកាសមករៀន។ លោក សាវភី បញ្ជាក់៖«បើផ្ទះគាត់មិនមានអង្ករ មិនមានអ្វីហូប ពួកគាត់មិនអាចទៅរៀនបានទេ។ ពួកគាត់ក្មេងៗ តែគាត់ទៅដាក់អន្ទាក់សត្វនៅលើភ្នំឆ្ងាយៗពីភូមិណាស់ ដូច្នេះវាគ្រោះថ្នាក់ណាស់ ហើយគាត់ក៏គ្មានពេលមករៀនដែរ»។

សព្វថ្ងៃក្មេងក្រីក្រខ្វះលទ្ធភាព និងក្មេងកំព្រា ដែលសមាគមអប់រំ និងថែទាំក្មេងក្រីក្រ បានជួយទំនុកបម្រុងមានចំនួន១១៥នាក់។ ជាគ្រូដែលបង្រៀននៅសាលារដ្ឋផង និងឆ្លៀតពេលបង្រៀននៅក្នុងសមាគមខ្លះផងនោះ លោក សាវភី បានបញ្ជាក់ថា សមាគមរបស់លោកទទួលក្មេងក្រីក្រ និងកំព្រាគ្រប់ទិសទី បើសិនជាពួកគេចង់រៀនបន្ត ហើយគ្មានលទ្ធភាព ដោយគ្រាន់តែមានការបញ្ជាក់ពីភូមិឃុំថាពិតជាក្រីក្រមែន។ លោកក៏បានសំណូមពរដល់សប្បុរសជនគ្រប់ទិសទី សូមមេត្តា ជួយដល់ក្មេងក្រីក្រ ឱ្យបានចូលរៀន ទៅតាមលទ្ធភាពរៀងៗខ្លួនផងដែរ៕