ជាតិ
អុំទូក៣ថ្ងៃ អ្នកស្រី កុសល លក់នំលំអងចេកបាន៩០ម៉ឺនរៀល
× ភ្នំពេញ៖ អ្នកស្រី សាំង កុសល ជាអ្នកធ្វើនំលំអងចេកជិត១០ឆ្នាំមកហើយ។ នៅក្នុងពិធីបុណ្យអុំទូកមានមនុស្សម្នាជាច្រើនបានមកមើលការប្រណាំងទូក និងមកដើរកម្សាន្តនៅតាមមាត់ទន្លេចតុមុខ និងមានលក់របស់របរជាច្រើន ជាពិសេសឃើញមានលក់នំចំណី។ រយៈពេល៣ថ្ងៃនៃពិធីបុណ្យអុំទូកនេះ អ្នកស្រី សាំង កុសល រកចំណូលពីការនំលំអងចេកបាន៩០ម៉ឺនរៀល។
ជិត១០ឆ្នាំមកហើយដែលអ្នកស្រី កុសល ប្រកបមុខរបរលក់នំលំអងចេក។ បើតាមអ្នកស្រី កុសស ក្នុងមួយថ្ងៃ គាត់អាចរកចំណូលបានពីការធ្វើនំលំអងចេកបាន៣០ម៉ឺនរៀល នៅក្នុងថ្ងៃបុណ្យអុំទូក។ នៅថ្ងៃឈប់សម្រាក ឬថ្ងៃបុណ្យជាតិផ្សេងៗអ្នកស្រី កុសស តែងយកនំមកលក់នៅតាមផ្សារ និងទីកន្លែងកម្សាន្តនានានៅភ្នំពេញផងដែរ។
ព្រឹកព្រលឹមម៉ោង៥ អ្នកស្រី កុសល ចាប់ផ្តើមកិនអង្ករ កូរស្ករត្នោត និងកោសខ្ទិះដូង ដើម្បីធ្វើនំលំអងចេក សម្រាប់ចែកចាយទៅអតិថិជននៅផ្សារទួលទំពូង ផ្សារថ្មី និងផ្សារអូរឫស្សីផងដែរ។ សម្រាប់បុណ្យអុំទូកនេះ អ្នកស្រី កុសល បានធ្វើដំណើរមកលក់នៅទល់មុខព្រះបរមរាជវាំង ពីម៉ោង៩ព្រឹក ដល់ម៉ោង៧ល្ងាច ហើយអាចលក់បានជាង៣០០នំ ក្នុងមួយថ្ងៃ។ មានវ័យ៣៧ឆ្នាំ អ្នកស្រី កុសល ថា ខ្លួនរកចំណូលបាន៩០ម៉ឺនរៀល នៅពិធីបុណ្យអុំទូក៣ថ្ងៃនេះ។
មានស្រុកកំណើតនៅខេត្តបន្ទាយមានជ័យ អ្នកស្រី កុសល និយាយថា របរនេះអាចរកចំណូលបានគួរសម ដែលអាចជួយសម្រួលជីវភាពគ្រួសារ និងទូទាត់ការចំណាយប្រចាំថ្ងៃផងដែរ។ ទោះបីរបរនេះស្រួលរកលុយ និងរកចំណូលច្រើន ប៉ុន្តែអ្នកស្រី កុសល នៅតែឆ្លៀតប្រកបមុខរបរបន្ថែមផងដែរ។ អ្នកស្រី កុសល និយាយដូច្នេះថា៖«ដើម្បីផ្គត់ផ្គង់ជីវភាពគ្រួសារ មីងចេះតែខំរកទៅ ណាមួយមីងសព្វថ្ងៃ ជួលផ្ទះគេផង អ៊ីចឹងមីងខំសន្សំលុយ ដើម្បីឲ្យកូនរៀនផង និងសម្រាប់បង់ថ្លៃផ្ទះ ថ្លៃទឹក និងថ្លៃភ្លើងផង»៕
Tag:
នំលំអងចេក
សាំង កុសល
ភ្នំពេញ
© រក្សាសិទ្ធិដោយ thmeythmey.com