លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និង យុវនីតិសម្បទា បានលើកឡើងថា សៀវភៅ ដែលមានចំណងជើងថា «ការតស៊ូរបស់ប្រជាជន៖ កម្ពុជារស់ឡើងវិញ» ដែលរៀបរាប់លម្អិតពីការតស៊ូរបស់សម្តេច ហេង សំរិន ប្រធានរដ្ឋសភា និងជាប្រធានកិត្តិយសគណប្រជជនកម្ពុជា អាចធ្វើឲ្យអ្នកជំនាន់ក្រោយ បានស្គាល់ពីប្រវត្តិសាស្ត្រកម្ពុជា និងការតស៊ូរបស់ឥស្សរជនស្នេហាជាតិ ក្នុងស្រោចស្រង់ប្រទេស ឲ្យរួចផុតពីរបបប្រល័យពូជសាសន៍។
លោក វង សូត បានបញ្ជាក់បែបនេះថា៖«ក្មេងជំនាន់ក្រោយកើតមកចំពេលស្រួល ស្រុកមានសន្តិភាព អ៊ីចឹងមិនដឹងថាចាស់ៗពីមុនលំបាកខ្លាំងប៉ុណ្ណាទេ។ សៀវភៅនេះ បង្ហាញនិងរៀបរាប់ពីសង្គ្រាមនៅកម្ពុជា ដែលអាចឲ្យអ្នកអាននិងប្រជាពលរដ្ឋខ្មែរជំនាន់ក្រោយ ឈ្វេងយល់ពីប្រវត្តិសាស្ត្រ»។
រដ្ឋមន្ត្រីរូបនេះ ក៏បានរៀបរាប់ពីសកម្មភាពតស៊ូនានាក្នុងការកសាងរណសិរ្ស២ធ្នូ រួមទាំងដំណើរការទទួលបានជោគជ័យនៃការរំដោះជាតិពីរបបប្រល័យពូជសាសន៍ផងដែរ។ ការផ្សាយសៀវភៅនេះ ក៏ដើម្បីរម្លឹកខួប៤០ឆ្នាំនៃថ្ងៃបង្កើតរណសិរ្ស២ធ្នូ ឆ្នាំ១៩៩៧ ដែលនឹងប្រារព្ធនៅថ្ងៃទី២ ខែធ្នូ ឆ្នាំ២០១៨ ខាងមុខនេះ។
លោក អះអាងបែបនេះថា៖«សម្ដេច ជា ស៊ីម និយាយថា តោះយើងនាំគ្នាក៏សាងកម្លាំងវាយប៉ុល ពត។ ហេតុអ្វីបានវាយឈ្នះ? ទីមួយគឺ វៀតណាមជួយ ហើយគេជួយក៏មានផលប្រយោជន៍របស់គេដែរ ហើយទី២ គឺមានការគាំទ្រពីប្រជាពលរដ្ឋ ដោយគេដឹងថាប៉ុល ពត ជាអ្នកប្រល័យពូជសាសន៍ អ៊ីចឹងទៅដល់ត្រឹមណាមានប្រជាជនគាំទ្រត្រង់នុ៎ង»។
ការថ្លែងរបស់រដ្ឋមន្ត្រីសង្គមកិច្ច គឺធ្វើឡើងក្នុងពិធីសម្ពោធនិងផ្សព្វផ្សាយសៀវភៅ ស្តីពីប្រវត្តិតស៊ូរបស់សម្តេច ហេង សំរិន ដែលរៀបចំនៅវិមានរដ្ឋសភា នាព្រឹកថ្ងៃទី២៦ ខែវិច្ឆិកា ឆ្នាំ២០១៨នេះ ដោយមានការចូលរួមពីមន្ត្រីរាជការ សិស្ស-និស្សិត បណ្ណារក្ស ភ្ញៀវជាតិនិងអន្តរជាតិ រួមទាំងអ្នកសារព័ត៌មានប្រមាណ១៥០នាក់។
ក្នុងសៀវភៅ «ការតស៊ូរបស់ប្រជាជន៖ កម្ពុជារស់ឡើងវិញ» ដែលបោះពុម្ភជាភាសាអង់គ្លេស បានរៀបរាប់ពីកំណត់ហេតុ និងបេសកកម្មរបស់សម្តេច ហេង សំរិន ក្នុងដំណើររំដោះប្រទេសជាតិចេញពីរបប ប៉ុល ពត រួមទាំងការចូលរួមស្តារនិងអភិវឌ្ឍប្រទេសជាតិឡើងវិញ ក្រោយសង្គ្រាម។
សម្តេច ហេង សំរិន គឺជាប្រធានស្ថាបនិកចលនាមហាជនធំមួយឈ្មោះថា «រណសិរ្សសាមគ្គីសង្គ្រោះជាតិកម្ពុជា» ដែលក្រោយមកបានប្តូរឈ្មោះជា «រណសិរ្សសាមគ្គីអភិវឌ្ឍន៍មាតុភូមិកម្ពុជា» ដែលបានបង្កើតឡើង នៅកាលពីថ្ងៃទី២ ខែធ្នូ ឆ្នាំ១៩៧៨។ ផ្តើមចេញពីខេត្តក្រចេះនោះហើយ ដែលសម្តេច ហេង សំរិន បានប្រកាសផែនការ១១ចំណុច ក្នុងការផ្តួលរំលំរបបប្រល័យពូជសាសន៍។
សៀវភៅ ដែលទើបប្រែជាភាសាអង់គ្លេសថា «The People’s struggle, Cambodia reborn» មានកម្រាស់១៥០ទំព័រ ចែកចេញជា៤ភាគសំខាន់ៗនៃប្រវត្តិរបស់សម្តេច ហេង សំរិន មានមាន កុមារភាពដល់ឆ្នាំ ១៩៧០, ដំណាក់កាលសង្គ្រោះជាតិប្រឆាំងបរទេសឈ្លានពាន, ការភៀសខ្លួនទៅប្រទេសវៀតណាម, និងការខិតខំកសាងប្រទេសឡើងវិញ។
រណសិរ្សសាមគ្គីសង្គ្រោះជាតិកម្ពុជា នឹងប្រារព្ធខួបលើកទី៤០ឆ្នាំ នៃថ្ងៃបង្កើតរណសិរ្សនៅស្តូបអនុស្សាវរីយ៍ នៅស្រុកស្នួល ខេត្តក្រចេះ នាថ្ងៃទី២ ខែធ្នូ ឆ្នាំ២០១៨ ខាងមុខនេះ។
ធ្វើជាអធិបតីនៃពិធីសម្ភោធសៀវភៅនេះ រដ្ឋមន្ត្រីក្រសួងសង្គមកិច្ច បានចែកជូនសៀវភៅប្រវត្តិសាស្ត្រនេះដល់អ្នកចូលរួម។ សៀវភៅ «ការតស៊ូរបស់ប្រជាជន៖ កម្ពុជារស់ឡើងវិញ» ត្រូវបានបោះពុម្ភជាភាសាខ្មែរលើកទីមួយ កាលពីឆ្នាំ២០១៣៕