កីឡាអន្តរជាតិ
អន្តរជាតិ
កីឡាវប្បធម៌ប្រពៃណី៣ប្រភេទពីហ្សកហ្ស៊ី អៀរឡង់ និងកូរ៉េ ត្រូវបានចុះក្នុងបញ្ជីយូណេស្កូ
×![]()
ដោយ: ទេព ពិទូរ្យ
ប្រភេទកីឡាចំនួន៣ រួមមានចំបាប់បែបប្រពៃណីរបស់ហ្សកហ្ស៊ី Chidaoba កីឡា Hurling របស់អៀរឡង់ និងចំបាប់ប្រពៃណីរបស់កូរ៉េ Ssireum/Ssirum ត្រូវបានចុះក្នុងបញ្ជីបេតិកភណ្ឌវប្បធម៌អរូបីរបស់អង្គការយូណេស្កូជាផ្លូវការក្នុងចំណោមបេតិកភណ្ឌអរូបីចំនួន៤០ទៀតដែលបានចុះបញ្ចីនាសម័យប្រជុំលើកទី១៣នៃគណៈកម្មាធិការអន្តររដ្ឋាភិបាលសម្រាប់ការថែរក្សាបេតិកភណ្ឌវប្បធម៌អរូបីនៅមជ្ឈមណ្ឌល Swami Vivekananda International Convention Centre (SVICC) ក្រុងព័រល្វី ប្រទេសម៉ូរីស ចាប់ពីថ្ងៃទី២៤ ខែវិច្ឆិកាដល់ថ្ងៃ១ ខែធ្នូ។
កីឡាចំបាប់បែបប្រពៃណីរបស់ប្រទេសហ្សកហ្ស៊ីដែលមានឈ្មោះថា Chidaoba និងមានអាយុកាលរាប់សតវត្សរ៍មកហើយនោះ ត្រូវបានភ្នាក់ងារវប្បធម៌ និងវិទ្យាសាស្ត្ររបស់អង្គការសហប្រជាជាតិប្រកាសនៅក្នុងកិច្ចប្រជុំក្នុងប្រទេសម៉ូរីសថាសិល្បៈក្បាច់គុនរបស់អតីតសូវៀតមួយនេះត្រូវបញ្ចូលក្នុងបញ្ជីបេតិកភ័ណ្ឌវប្បធម៌អរូបីរបស់ខ្លួន។002
ហ្សកហ្ស៊ីជាប្រទេសភ្នំតូចដែលសម្បូរទៅដោយវប្បធម៌ និងប្រវត្តិសាស្ត្រមួយនេះ ក៏បានចុះបញ្ជីបេតិកភណ្ឌអរូបីចំនួនបីរួចមហើយដែលរួមមានរបៀបនៃការសរសេតួរអក្សចំនួនបីរបស់ខ្លួន រួមទាំងចម្រៀង និងបច្ចេកទេសផលិតស្រាពិសេសដោយប្រើពាងធ្វើពីដីហើយរក្សាទុកនៅក្រោមដី។
នៅក្នុងកិច្ចប្រជុំនោះដែរ អង្គការយូណេស្កូក៏បានប្រកាសពីការបញ្ចូលកីឡាចំបាប់ប្រពៃណី Ssireum/Ssirum ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ ក្រោយការស្នើសុំរួមគ្នារបស់កូរ៉េខាងត្បូង និងកូរ៉េខាងជើងផងដែរ។
តាមពិតទៅដំបូងឡើយកូរ៉េទាំងពីរបានប្រើឈ្មោះកីឡាចំបាប់នេះដោយសរសេរជាភាសាអង់គ្លេសខុសគ្នារៀងៗខ្លួន។ កីឡាចំបាប់ដែលសរសេរជាភាសាអង់គ្លេស «Ssirum» គឺប្រើសម្រាប់កូរ៉េខាងជើង និង «Ssireum» សម្រាប់កូរ៉េខាងត្បូង។ ប៉ុន្តែដោយយោងតាមរដ្ឋបាលបេតិកភណ្ឌវប្បធម៌របស់កូរ៉េខាងត្បូង កូរ៉េទាំងពីបានសម្រេចប្រើពាក្យជាភាសារអង់គ្លេសទាំងពីរខាងលើស្នើរួមគ្នាទៅកាន់យូណេស្កូដើម្បីចុះបញ្ចីបេតិកភណ្ឌ។
ដោយឡែកកីឡា Hurling ដែលជាប្រភេទកីឡាបែបវប្បធម៍របស់អៀរឡង់ ក៏ត្រូវបានអង្គការយូណេស្កូបញ្ចូលក្នុងបញ្ជីបេតិកភ័ណ្ឌវប្បធម៌អរូបីនៃមនុស្សជាតិផងដែរ។
កីឡា Huiling គឺមានរបៀបប្រកួតជាក្រុមដែលក្នុងមួយក្រុមមានគ្នា១៥នាក់ ស្រដៀងកីឡាបាល់ទាត់ដែរ ប៉ុន្តែប្រើដំបងឈើដើម្បី វាយកូនបាល់បញ្ចូលសំណាញ់ទី៕
Tag:
បេតិកភណ្ឌ
អរូបី
យូណេស្កូ
© រក្សាសិទ្ធិដោយ thmeythmey.com
