ស៊ីម៉ាក់ចាប់ដៃអង្គការការពារសត្វព្រៃប្រឆាំងការលក់និងបរិភោគសត្វឆ្កែ

ជាតិ

ស៊ីម៉ាក់ចាប់ដៃអង្គការការពារសត្វព្រៃប្រឆាំងការលក់និងបរិភោគសត្វឆ្កែ

03, Dec 2018 , 9:59 pm

រូបភាព

ដោយ: ភួង វ៉ាន់ថា

មជ្ឈមណ្ឌលកម្ចាត់មីនកម្ពុជាហៅកាត់ថា ស៊ីម៉ាក់សម្រេចចាប់ដៃសហការជាមួយអង្គការសង្គ្រោះ និងការពារសត្វព្រៃដើម្បីជំរុញការផ្សព្វផ្សាយប្រឆាំងការជួញដូរនិងការបរិភោគសាច់សុនខនៅកម្ពុជា។ វាជាផ្នែកមួយនៃការចូលរួមលើកកម្ពស់វប្បធម៌ ប្រពៃណី និងសីលធម៌ស្រលាញ់សុនខ។

«ខ្ញុំបានជួបពិភាក្សាជាមួយក្រុមជំនាញនៃអង្គការប្រឆាំងការជួញដូរសុនខនៅកម្ពុជា។ អង្គការនេះបានបំពេញការងារនៅកម្ពុជា ដើម្បីជួយផ្សព្វផ្សាយពីការប្រមូលសុនខអនាថា និងជួយព្យាបាលសុនខតាមទីវត្តអារាមជាដើម ព្រមទាំងជួយគិតគូរឲ្យអ្នករកស៊ីលក់សាច់សុនខ ប្តូរមុខរបរថ្មី»។ នេះបើយោងតាមទំព័រហ្វេសប៊ុករបស់លោក ហេង រតនា អគ្គនាយកមជ្ឈមណ្ឌលជាតិកម្ចាត់មីនកម្ពុជា។

ទំព័រហ្វេសប៊ុករបស់លោក ហេង រតនា

ស៊ីម៉ាក់បានចុះកិច្ចព្រមព្រៀងជាមួយលោកស្រីវេជ្ជបណ្ឌិត Kathrine Polak ប្រធានក្រុមសម្ពន្ធ័អន្តរជាតិការពារសត្វ (VIER PFOTEN International) និងលោកស្រីវេជ្ជបណ្ឌិត Martina Mayr នាយក និងស្ថាបនិកអង្គភាពសង្គ្រោះសត្វកម្ពុជា ដើម្បីសហការគ្នាសម្របសម្រួលការងារសត្វសុនខនៅកម្ពជា ក៏ដូចជាជំរុញការផ្សព្វផ្សាយប្រឆាំងនឹងការជួញដូរនិងបរិភោគសាច់សុនខនៅកម្ពុជា កាលពីថ្ងៃទី៣០ខែវិច្ឆិកា ឆ្នាំ២០១៨។

លោកធ្លាប់លើកឡើងថាស្ថានភាពការជួញដូរនិងហូបសាច់សត្វសុនខកម្ពុជា អាចបង្កឲ្យមានបញ្ហា៤សំខាន់ៗដូចជា បាត់បង់វប្បធម៌ទំនៀមទម្លាប់និងប្រពៃណីដ៏ល្អរបស់ប្រជាជនខែ្មរ ដែលផ្តាំតកូនចៅដោយហាមមិនឲ្យបរិភោគសាច់សុនខឡើយ រហូតដល់យល់ថាជាទង្វើនាំឲ្យចង្រៃដល់ខ្លួនឯងនិងគ្រួសារ។ បើគ្មានវិធានការទេ ប្រពៃណីនិងវប្បធម៌ដ៏ប្រពៃថ្លៃថ្នូរនេះនឹងរលាយសាបសូន្យមិនខានឡើយ។

ទំព័រហ្វេសប៊ុករបស់លោក ហេង រតនា

លោកនិយាយថា៖«មានផលប៉ះពាល់ដល់សុខភាពសាធារណ: មានប្រភេទជំងឺឆ្លងផងដែរ (នេះបើយោងតាមការវាយតំលៃមន្ត្រីជំនាញសុខភាពមកពីប្រទេសអូស្ត្រាលី ហើយអង្គភាពស៊ីម៉ាក់នឹងសហការរយៈពីឆ្នាំ២០១៩-២០២០ជាមួយសាស្ត្រាចារ្យមកពីសាកលវិទ្យាល័យមែលប៊នដើម្បីតាមដានជំងឺសត្វសុនខនៃអង្គភាពស៊ីម៉ាក់»។

លោកបន្តថា ភាពអសីលម៌ចំពោះគុណបំណាច់សត្វសុនខបម្រើមនុស្សជាតិ ជាពិសេសសត្វសុនខហិតមីន សុនខរក្សាសន្តិសុខ(សំរាប់សន្តិសុខគ្រួសារ និងសាធារណៈ) សុនខប្រឆាំងភេវរកម្ម សុនខប្រឆាំងគ្រឿងញៀន និងសុនខការពារព្រំដែនជាដើម។

លោកបញ្ជាក់ថានេះជាពេលវេលាយ៉ាងសមស្របសំរាប់ប្រជាជនកម្ពជានិងអ្នកអនុវត្តច្បាប់និងចូលរួមលុបបំបាត់ភាពអសកម្មក្នុងសង្គមខែ្មរនិងរួមគ្នាលើកកំពស់ប្រពៃណី និងសីលធម៌សង្គមខែ្មរយើង៕