សភា៖ ការរកច្រកឲ្យអ្នកជាប់បម្រាមចូលធ្វើនយោបាយវិញ ជាការលើកកម្ពស់ស្មារតីបង្រួបបង្រួមជាតិ

ជាតិ

នយោបាយជាតិ

សភា៖ ការរកច្រកឲ្យអ្នកជាប់បម្រាមចូលធ្វើនយោបាយវិញ ជាការលើកកម្ពស់ស្មារតីបង្រួបបង្រួមជាតិ

03, Dec 2018 , 6:03 pm

រូបភាព

លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា

ដោយ: ភួង វ៉ាន់ថា

រដ្ឋសភា កំពុងសិក្សាមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ ដើម្បីបើកផ្លូវឲ្យអ្នកដែលត្រូវហាមឃាត់ក្នុងការធ្វើនយោបាយ អាចត្រឡប់មកធ្វើនយោបាយឡើងវិញ។ តំណាងរាស្ត្រ៨៧រូប ជាអ្នកស្នើឡើង។

អត្ថបទទាក់ទង

សភាសិក្សាពិនិត្យច្បាប់ដើម្បីអនុញ្ញាតឲ្យបុគ្គលជាប់បម្រាម អាចផ្តើមសកម្មភាពនយោបាយឡើងវិញ

មាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ បានចែងថា៖«ក្នុងករណី ដែលគណបក្សនយោបាយ ត្រូវបានរំលាយ តុលាការអាចសម្រេចហាមឃាត់ការធ្វើសកម្មភាពនយោបាយរបស់ថ្នាក់ដឹកនាំនៃគណបក្សនយោបាយនោះ សម្រាប់រយៈពេល ៥ឆ្នាំ»។

ហេតុដូច្នេះ អ្នកដែលត្រូវហាមឃាត់ នឹងអាចត្រឡប់មកធ្វើនយោបាយវិញ លុះត្រាតែផុតកំណត់ដែលមានរយៈពេល៥ឆ្នាំ។ ប៉ុន្តែ ពេលនេះ រដ្ឋសភា កំពុងតែសិក្សាត្រង់ចំណុចនេះ ដែលអាចបញ្ចូលនូវខ្លឹមសារថ្មី ដោយកំណត់ថា នាយករដ្ឋមន្ត្រី អាចថ្វាយសំណើទៅព្រះមហាក្សត្រ ដើម្បីទូលសុំព្រះឲ្យផ្តល់នីតិសម្បទាដល់អ្នកជាប់បម្រាម ហើយអាចធ្វើនយោបាយវិញ មុនការកំណត់របស់តុលាការ។

នៅចំពោះមុខក្រុមអ្នកកាសែតក្នុងសន្និសីទ នាល្ងាចថ្ងៃទី៣ ខែធ្នូ ឆ្នាំ២០១៨ ស្តីពីគម្រោងនៃការធ្វើវិសោធនកម្មលើមាត្រានេះ លោក ឡេង ប៉េងឡុង អ្នកនាំពាក្យរដ្ឋសភា បានថ្លែងយ៉ាងដូច្នេះថា៖«ពីមុន យើងដូចជាខ្វះចន្លោះ ដោយមិនបានគិតគូរដល់ពួគគាត់ (អ្នកដែលត្រូវហាមមិនឲ្យធ្វើនយោបាយ)។ ឥឡូវ យើងគិតដល់ពួកគាត់ គឺថា បើអ្នកនោះ ត្រូវនាយករដ្ឋមន្ត្រីវាយតម្លៃថា មិនបានធ្វើឲ្យប៉ះពាល់ប្រយោជន៍ជាតិទេ នាយរដ្ឋមន្ត្រីអាចស្នើសុំព្រះមហាក្សត្រផ្តល់នីតិសម្បទា ហើយធ្វើនយោបាយឡើងវិញបាន»។

លោក ឡេង ប៉េងឡុង បានធ្វើសន្និសីទពីរឿងនេះ បន្ទាប់ពីរដ្ឋាភិបាល ចេញសេចក្តីថ្លែងការណ៍។ សេចក្តីថ្លែងការណ៍របស់រដ្ឋាភិបាល បានញ្ជាក់ថា ការចាប់ផ្តើមសិក្សានិងគម្រោងកែប្រែច្បាប់នេះ គឺដើម្បីលើកកម្ពស់លទ្ធិប្រជាធិបតេយ្យ និងនីតិរដ្ឋ ជាពិសេសស្មារតីបង្រួបបង្រួមជាតិ។

សូមបញ្ជាក់ថា ថ្នាក់ដឹកនាំនិងមន្ត្រី១១៨នាក់នៃអតីតគណបក្សសង្គ្រោះជាតិ ត្រូវបានតុលាការកំពូល ដកសិទ្ធិនយោបាយរយៈពេលឆ្នាំ៥ឆ្នាំ៕