ជាតិ
×![]()
សៀមរាប៖ សម្ដេច ហ៊ុន សែន នៅព្រឹកថ្ងៃទី៤ ធ្នូ បានចូលរួមបើកពិធីខួប ២៥ឆ្នាំ នៃការបង្កើតគណៈកម្មាធិការអន្ដរជាតិសម្របសម្រួលការគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្ដ្រអង្គរ ហៅកាត់ថា អាយស៊ីស៊ី-អង្គរ នៅសណ្ឋាគារ សុខាសៀមរាប។ នៅចំពោះមុខអ្នកចូលរួមដែលមានទាំងភ្ញៀវជាតិ និងអន្ដរជាតិ ប្រមុខរាជរដ្ឋាភិបាលបានលើកឡើងខ្លាំងៗទៅនឹងអាកប្បកិរិយាមួយចំនួនរបស់អន្ដរជាតិនាពេលកន្លងមក ដែលបានយកបេតិកភណ្ឌ មកលាយឡំនឹងបញ្ហានយោបាយរបស់កម្ពុជា។ 
ក្នុងសន្ទរកថារបស់សម្ដេច ហ៊ុន សែន បានលើកឡើងជាច្រើនចំពោះការខិតខំប្រឹងប្រែងរបស់រាជរដ្ឋាភិបាលកម្ពុជាលើការងារអភិរក្ស និងអភិវឌ្ឍន៍តំបន់អង្គរ ក៏ដូចជាមានការចូលរួមពីស្ថាប័នអន្ដរជាតិមួយចំនួនផងដែរ។ សម្ដេចបន្តថា ក្រោយដាក់អង្គរជាសម្បត្តិបេតិកភណ្ឌពិភពលោកនៅចុងឆ្នាំ ១៩៩២ ខេត្តសៀមរាបនៅពេលនោះមិនទាន់ចប់សង្គ្រាមនៅឡើយ គឺជារឿយៗត្រូវបានទ័ពខ្មែរក្រហមលួចវាយប្រហារ ដូច្នេះគេមិនគួរភ្លេចអតីតកាលរបស់ខេត្តសៀមរាបដែលគ្មានមនុស្សរស់នៅ ប្រែក្លាយជាទីក្រុងទេសចរណ៍មួយដ៏ពេញនិយមរបស់ទេសចរអន្ដរជាតិនាពេលបច្ចុប្បន្ននេះឡើយ។
«យើងពិតជាកម្សត់ណាស់ ព្រោះសូម្បីតែអង្គរវត្ត និងប្រាសាទផ្សេងៗទៀត ក៏ត្រូវជាប់ទណ្ឌកម្មនយោបាយដែរដូច្នេះយើងគ្មានជំនួយពីបរទេសណាយកមកអភិវឌ្ឍន៍ឡើយ ចំណុចនេះគួរត្រូវដកពិសោធន៍មិនគ្រាន់សម្រាប់បញ្ហាកម្ពុជា តែគួរត្រូវដកពិសោធន៍សម្រាប់ពិភពលោកផងដែរ មិនគួរណាទុកឱ្យបេតិកភណ្ឌប្រវត្តិសាស្ដ្ររបស់មនុស្សជាតិតាមប្រទេសផ្សេងៗទៀត លូកឡំទៅនឹងដោយបញ្ហានយោបាយទេ...»។ នេះជាការពន្យល់បន្ថែមរបស់សម្ដេច ហ៊ុន សែន មុននឹងលើកឡើងពីដើមហេតុនៅពេល ព្រោះអង្គការសហប្រជាជាតិបន្តទទួលស្គាល់អាសនៈរបស់ខ្មែរក្រហម។
ទាក់ទងនឹងបញ្ហាបេតិកភណ្ឌនេះដែរ សម្ដេចនាយករដ្ឋមន្ត្រីអះអាងថា វាមិនមែនជារឿងងាយស្រួល។ ជាការកត់សម្គាល់របស់សម្ដេច កន្លងមកមានអ្នកនយោបាយញុះញង់ឱ្យពលរដ្ឋទៅកាន់កាប់តំបន់បេតិកភណ្ឌ ហើយនៅពេលទប់ស្កាត់រាជរដ្ឋាភិបាលទទួលការរិះគន់ថាបានរំលោភសិទ្ធិមនុស្សទៅវិញ។ ទោះយ៉ាងណា សម្ដេច ហ៊ុន សែន សុំឱ្យអន្ដរជាតិយល់ពីបញ្ហានេះ ហើយកម្ពុជាបេ្ដជ្ញាចិត្តខ្ពស់ថា នឹងថែរក្សាតម្លៃបេតិកភណ្ឌជាតិរបស់ខ្លួន មិនឱ្យបាត់បង់ឡើយ។
គួរបញ្ជាក់ថា គណៈកម្មាធិការអន្ដរជាតិអាយស៊ីស៊ី-អង្គរ ត្រូវបានបង្កើតឡើងនៅឆ្នាំ ១៩៩៣ ដែលជាយន្តការអន្ដរជាតិដើម្បីគៀងគរធនធានថវិកា ជំនាញបច្ចេកទេស និងធនធានមនុស្ស ពីសហគមន៍អន្ដរជាតិ ដើម្បីធ្វើការជួសជុល អភិរក្ស និងលើកតម្លៃប្រាសាទនានា ក៏ដូចជាការអភិវឌ្ឍរមណីយដ្ឋានអង្គរ។ គណៈកម្មាធិការនេះ បានរៀបចំកិច្ចប្រជុំបច្ចេកទេសចំនួន ៣១ដង និងកិច្ចប្រជុំពេញអង្គចំនួន ២៥ដងរួចមកហើយ ដែលថវិការាប់រយលានដុល្លារត្រូវបានប្រើប្រាស់ និងអ្នកជំនាញការជាតិរាប់រយនាក់ ទទួលបានការបណ្ដុះបណ្តាល និងបន្ដវេនយ៉ាងរឹងមាំ ដើម្បីធានានូវការអភិរក្សប្រកបដោយចីរភាពនៃតំបន់អង្គរ៕
Tag:
ICC-Angkor
បេតិកភណ្ឌ
© រក្សាសិទ្ធិដោយ thmeythmey.com
