ជាតិ
សេដ្ឋកិច្ច
លោក ប៊ុន បារាំង៖ កម្ពុជា នាំអំបិលពីចិន ព្រោះគុណភាពល្អ ហើយតម្លៃថោក
× ភ្នំពេញ៖ អំបិលដែលកម្ពុជាបាននាំចូលពីប្រទេសចិនចំនួន៥ពាន់តោន កាលពីថ្មីៗនេះ និងគ្រោងនាំចូលសរុប២ម៉ឺនតោន ដើម្បីមកបំពេញតម្រូវការក្នុងស្រុកនាពេលនេះ ព្រោះអំបិលចិន មានគុណភាពល្អដូចអំបិលកម្ពុជាដែរ និងមានតម្លៃថោកជាងអំបិលប្រទេសផ្សេងៗ ពិសេសប្រទេសជិតខាង។
លោក ប៊ុន បារាំង ប្រធានសហគមន៍អ្នកផលិតអំបិលកំពត-កែប បានប្រាប់សារព័ត៌មានថ្មីៗតាមទូរសព្ទថា អំបិលដែលផលិតនៅចិនមានគុណល្អ និងតម្លៃទាបជាងច្រើន បើធៀបគ្នារវាងប្រទេសថៃ និងវៀតណាម។ លោកបានបញ្ជាក់ថា៖ «អំបិលដែលផលិតចេញពីទឹកសមុទ្រដូចគ្នា រវាងចិន និងថៃ មានតម្លៃខុសគ្នា៦០ដុល្លារ ក្នុងមួយតោន។ ដោយអំបិលចិនមានតម្លៃ៩០ដុល្លារ និងអំបិលថៃមានតម្លៃ១៥០ដុល្លារ ក្នុងមួយតោន»។
ប្រធានសហគមន៍រូបនេះ បានបន្តថា «អំបិលប្រទេសថៃក៏យើងនឹងនាំចូល ១ម៉ឺនផងដែរ សម្រាប់បំរើលើវិស័យឧស្សាហកម្មនានា ក្នុងស្រុក។ ដូចជា ការផលិតទឹកកក និងប្រឡាក់ស្បែកគោ-ក្របីជាដើម ប៉ុន្តែមិនប្រើប្រាស់ទៅលើជីវភាពរស់នៅប្រចាំថ្ងៃរបស់យើងបានឡើយ។ អំបិលប្រភេទនេះ មានតម្លៃ៧០ដុល្លារក្នុងមួយតោន ដែលផលិតចេញពីរ៉ែ»។
ការនាំចូលអំបិលជាលើកទី២នេះ សហគមន៍ផលិតអំបិល បានត្រៀមថវិកាមិនក្រោម ៣លានដុល្លារអាមេរិកឡើយ សម្រាប់ការមកដល់កម្ពុជា។ នេះបើតាម លោក ប៊ុន បារាំង។
ជាមួយគ្នានេះ លោក ក៏បានអះអាងផងដែរថា៖ «នៅពេលដែលយើងផលិតអំបិលបានវិញ យើងនឹងបឈ្ឈប់ការនាំចូលពីបរទេស។ គ្មាននរណាម្នាក់ក្នុងសហគមន៍យើងចង់នាំអំបិលគេចូលនោះទេ ប៉ុន្តែការដោយសារតែកម្ពុជាជួបបញ្ហាអាកាសធាតុមិនល្អ ដោយមានភ្លៀងធ្លាក់ច្រើនពេក ក្នុងអំឡុងពេលផលិត និងប្រមូលផល ទើបយើងសម្រេចនាំចូលពីបរទេស ដើម្បីបំពេញតម្រូវការក្នុងស្រុក»។
សូមជម្រាបថា ក្នុងមួយឆ្នាំៗ កម្ពុជាមានតម្រូវការអំបិលប្រើប្រាស់ ប្រមាណ១០ម៉ឺនតោន។ ហើយបច្ចុប្បន្នស្រែអំបិលនៅកំពត-កែប មានផ្ទៃដីជាង៤៦០០ហិកតា។ គួររម្លឹកផងដែរ កម្ពុជាបាននាំអំបិលចូលជាលើកទី១ ក្នុងឆ្នាំ២០០៨ ចំនួន៦ម៉ឺនតោន ពីចិន៕
Tag:
អំបិល
ប៊ុន បារាំង
កំពត-កែប
© រក្សាសិទ្ធិដោយ thmeythmey.com