ពលរដ្ឋខ្មែរជិត៣០០០នាក់ កំពុងជាប់ពន្ធនាគារនៅថៃ

ជាតិ

ពលរដ្ឋខ្មែរជិត៣០០០នាក់ កំពុងជាប់ពន្ធនាគារនៅថៃ

07, Dec 2018 , 9:39 pm

រូបភាព

ដោយ: ភួង វ៉ាន់ថា

អ្នកទោសខ្មែរចំនួន២,៩១០នាក់ កំពុងជាប់ពន្ធនាគារនៅក្នុងប្រទេសថៃ ក្នុងចំណោមអ្នកទោសទាំងនោះ អ្នកទោស បុរសមានចំនួន ២៦៤១នាក់ និងស្ត្រីចំនួន២៦៩នាក់។ នេះបើយោងតាមសេចក្តីជូនដំណឺងរបស់ស្ថានទូតខ្មែរប្រចាំនៅប្រទេសថៃ។

ស្ថានទូតខ្មែរ ក៏បានពន្យល់ពីការផ្ទេរទណ្ឌិតមកជាប់ឃុំខ្លួន នៅកម្ពុជាវិញ គឺត្រូវអនុវត្តតាមកិច្ចព្រមព្រៀង ស្តីពី ការផ្លាស់ប្តូរអ្នកទោស រវាងកម្ពុជា និងថៃ ដែលមានដូចជា៖ ទី១-បទល្មើស ដែលអាចផ្ទេរអ្នកទោស បានលុះត្រាបទល្មើសនោះ ត្រូវជាប់ពន្ធនាគារចាប់ពីមួយឆ្នាំទ្បើងទៅ , ២- ទណ្ឌិតដែលអាចផ្ទេរបាន លុះត្រាទណ្ឌិតនោះ ត្រូវជាប់ទោស២/៣ នៃទោសរួម និងទី៣-ទណ្ឌិតដែលអាចផ្ទេរបាន លុះត្រាសាម៉ីខ្លួនស្នើសុំជាលាយលក្ខអក្សរ។

«មានអ្នកទោសខ្លះសុំផ្ទេរមកជាប់ពន្ធគារនៅកម្ពុជា ដោយផ្ទាល់មាត់លុះដល់ស្ថានទូតឲ្យធ្វើពាក្យស្នើសុំផ្ទាល់មាត់ ដើម្បីបញ្ជាក់ថា ខ្លួនស្ម័គ្រចិត្តមកបន្តជាប់ពន្ធនាគារនៅកម្ពុជាវិញ បែជាគាត់មិនព្រមធ្វើលិខិតស្នើសុំទាល់តែសោះ។ ស្ថានទូតមិនអាចបង្ខិតបង្ខំទណ្ឌិតឲ្យផ្ទេរមកកម្ពុជាបានទេ បើសាម៉ីខ្លួនមិនស្ម័គ្រចិត្តផ្ទេរមកកម្ពុជា»។ នេះបើតាមសេចក្តីជូនដំណឹងដដែល។

ក្នុងសេចក្តីជូនដំណឹង បានបន្ថែមថា កន្លងមកក៏មានអ្នកទោសជនជាតិវៀតណាមដែលកំពុងជាប់ពន្ធនាគារក្នុងប្រទេសថៃ បានស្នើសុំមកជាប់គុកនៅកម្ពុជាផងដែរ។ ប៉ុន្តែក្នុងករណីនេះស្ថានទូតមិនអាចដោះស្រាយបានទេ ព្រោះមិនមែនជាជនជាតិខ្មែរ។

ស្ថានទូតខ្មែរប្រចាំប្រទេសថៃ អះអាងថា ខ្លួនបានទៅចុះសួរសុខទុក្ខទណ្ឌិត តាមមន្ទីរឃុំឃាំងជារៀងរហូត។ ហើយស្ថានទូតក៏បានចេញលិខិតអនុញ្ញាតឲ្យសាច់ញាតិទណ្ឌិត ទៅជួបសួរសុខទុក្ខអ្នកទោសនៅក្នុងពន្ធនាគារប្រទេសថៃ សរុបចំនួន២២ច្បាប់ទៀតផង៕