ភ្នំពេញ៖ ក្រសួងអប់រំ យុវជន និងកីឡា គ្រោងចំណាយថវិកាសរុប ៩២,៥លានដុល្លារ សម្រាប់ដាក់ឱ្យដំណើរការ គម្រោងកែលម្អប្រព័ន្ធអប់រំថ្នាក់ឧត្តមសិក្សាចំនួន ៥កន្លែង ដើម្បីពង្រឹងគុណភាព និងកែលម្អប្រព័ន្ធអប់រំថ្នាក់ឧត្តមសិក្សា និងធានាគុណភាពអប់រំនៅកម្ពុជា។ នេះបើយោងតាមទីភ្នាក់សារព័ត៌មានជាតិ(AKP)។
ថវិកានេះ បានទទួលការគាំទ្រពីធនាគារពិភពលោកចំនួន៩០លានដុល្លារ និង២,៥លានដុល្លារទៀត ជាថវិការបស់រាជរដ្ឋាភិបាលកម្ពុជា។ គម្រោងនេះ នឹងត្រូវអនុវត្តន៍ នៅគ្រឹះស្ថានសិក្សាចំនួន៥ គឺនៅសាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទកសិកម្ម វិទ្យាស្ថាន បច្ចេកវិទ្យាកម្ពុជា សាកលវិទ្យាល័យស្វាយរៀង និងសាកលវិទ្យាល័យបាត់ដំបង។
AKP បានស្រង់សម្តី លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ថា គម្រោងកែលម្អការអប់រំឧត្តមសិក្សានេះ ផ្ដោតសំខាន់លើការលើកកម្ពស់ការពង្រឹងគុណភាព,សមត្ថភាពបង្រៀន និងការរៀន, ការធ្វើទំនើបកម្មកម្មវិធីសិក្សា និងបង្កើតគុណវុឌ្ឍិគ្រូបង្រៀន, ការសាងសង់អគារសិក្សា,អន្តេវាសិដ្ឋាន,ការកែលម្អធនធាន សម្ភារ ដើម្បីគាំទ្រដល់ការបណ្តុះបណ្តាល និងការពង្រឹងប្រព័ន្ធធានាគុណភាពអប់រំផ្ទៃក្នុង។
លោក បានបញ្ជាក់ថា គម្រោងនេះ បានចាប់ផ្ដើមរៀបចំប្រព័ន្ធពិនិត្យតាមដាន និងវាយតម្លៃ ការពង្រឹងប្រព័ន្ធគ្រប់គ្រងហិរញ្ញវត្ថុ ព្រមទាំងធនធានមនុស្ស សម្រាប់គ្រឹះស្ថានឧត្តមសិក្សា។ ក្រៅពីនេះ គម្រោង ក៏នឹងរៀបចំកែលម្អការស្រាវជ្រាវផ្នែក STEM និងផ្នែកកសិកម្មផ្តោតលើការលើកកម្ពស់គុណភាព ព្រមទាំងការឆ្លើយតបនៃការស្រាវជ្រាវ តាមរយៈការផ្តល់ ហិរញ្ញប្បទានដល់គ្រឹះស្ថានឧត្តមសិក្សា ដែលកំណត់ក្នុងគម្រោង សម្រាប់ការសាងសង់បន្ទប់ពិសោធន៍ និងការបំពាក់សម្ភារ បរិក្ខារជាដើម។
លើសពីនេះទៀត គម្រោងនេះក៏នឹងជួយពង្រឹងផ្នែកអភិបាលកិច្ច និងការគ្រប់គ្រងគម្រោង ផ្តោតលើកការពង្រឹងប្រព័ន្ធអនុវិស័យឧត្តមសិក្សា និងការគ្រប់គ្រងសម្របសម្រួលគម្រោង។
យោងតាមរបាយការណ៍របស់ក្រសួងអប់រំ និស្សិតកំពុងសិក្សានៅឧត្តមសិក្សាមានចំនួន២០៧.៤៣៤នាក់ ស្រីជិត៥០ភាគរយ។ ក្នុងនោះ និស្សិតថ្នាក់បរិញ្ញាបត្ររងមាន ២០.៥៧០នាក់ ស្រី៥១ភាគរយ។ និស្សិតថ្នាក់បរិញ្ញាបត្រ មាន១៦៥.៣៥៩នាក់ ស្រីជិត៤៨ភាគរយ។ និស្សិតថ្នាក់បរិញ្ញាបត្រជាន់ខ្ពស់មាន ២១.៤៩៤នាក់ ស្រីជាង២១ភាគរយ និងនិស្សិតថ្នាក់បណ្ឌិតមាន១.២២២នាក់ ស្រី៥.១៦ភាគរយ។ និស្សិតអាហាររូបករណ៍ មានចំនួន២៦.១៩២នាក់ ស្រីជិត៥០ភាគរយ ក្នុងឆ្នាំសិក្សា ២០១៦-២០១៧។
ដោយឡែកគ្រឹះស្ថានឧត្តមសិក្សាទូទាំងប្រទេសមាន១២១គ្រឹះស្ថាន មាននៅក្នុងរាជធានី-ខេត្ដចំនួន២០។ ក្នុងនោះ គ្រឹះស្ថានឧត្តមសិក្សា ស្ថិតក្រោមការគ្រប់គ្រងរបស់ក្រសួងអប់រំ មាន៧៣ គ្រឹះស្ថានឧត្តមសិក្សាសាធារណៈ មាន១៣ និងឯកជនមានចំនួន៦០៕