ONE Championship
កីឡាជាតិ
ជាតិ
ជ័យជម្នះដ៏អស្ចារ្យ! រតនា ផ្តួល Abro នៅទឹកទី២ សុវណ្ណារី ធ្វើឲ្យ Iryna តដៃលែងរួចត្រឹមទឹកទី១
× អ្នកលេងគុនខ្មែរជើងខ្លាំង ចាន់ រតនា បានផ្តួលម្ចាស់ខ្សែក្រវាត់កូនកាត់ឥណ្ឌូណេស៊ី-ទីម័រខាង Abro Fernandes ក្នុងទឹកទី២ នាព្រឹត្តិការណ៍ ONE: Destiny of Champions នៅទីក្រុងកូឡាឡាំពួរប្រទេសម៉ាឡេស៊ី។ ចំណែកកីឡាការិនី ឯក សុវណ្ណារី ផ្តួលកីឡាការិនីអ៊ុយក្រែន Iryna Kyselova ឲ្យអាជ្ញាកណ្តាលបញ្ឈប់ក្នុងទឹកទី១។
ទោះបីខកខានឡើងសង្វៀនគុនចម្រុះ MMA ជាង១ឆ្នាំក៏ដោយ តែអ្នកស្នងគុនខ្មែរ ចាន់ រតនា បានធ្វើឲ្យអ្នកគាំទ្ររាប់ម៉ឺននាក់នៅសង្វៀន Axiata Arena ភ្ញាក់ផ្អើលយ៉ាងខ្លាំង ក្រោយរូបគេផ្តួលម្ចាស់ខ្សែក្រវាត់ពីរសាសន៍ឥណ្ឌូណេស៊ី-ទីម័រខាងកើត Abro Fernandes ឲ្យអាជ្ញាកណ្តាលបញ្ឈប់ក្នុងទឹកទី២។ នេះជាជ័យជម្នះលើកទី៣លើសង្វៀន MMA សម្រាប់ ចាន់ រតនា តែវាជាបរាជ័យលើកដំបូងសម្រាប់ Abro ក្នុងចំណោមការប្រកួត៨លើករបស់គេ។
នាការប្រកួត ONE: Destiny of Champions កាលពីយប់ថ្ងៃទី៧ ខែធ្នូ ឆ្នាំ២០១៨ នៅទីក្រុងកូឡាឡាំពួរ ប្រទេសម៉ាឡេស៊ី ម្ចាស់ខ្សែក្រវាត់ឥណ្ឌូណេស៊ី-ទីម័រខាងកើត Abro Fernandes ធ្វើបានយ៉ាងល្អក្នុងទឹកទី១ តាមរយៈការប្រើស្នៀតចាប់ផ្តួលនិងឃ្លេមកលើ រតនា ដែលព្យាយាមរើពីការសន្ធាប់របស់រូបគេ។ ឯ រតនា បានប្រើកណ្តាប់ និងជើងទាត់យ៉ាងល្អមកលើកីឡាកររូបនេះផងដែរ។
ឈានដល់ទឹកទី២កីឡាករទាំងពីរបានព្យាយាមប្រើស្នៀតពិសេសរៀងៗខ្លួន ក្នុងនោះ Abro បន្តព្យាយាមប្រើស្នៀតចាប់ផ្តួល ឯ រតនា ព្យាយាមប្រើកណ្តាប់ដៃនិងជើង។ Abro បានប្រើស្នៀតគ្រោះថ្នាក់មួយមកលើ ចាន់ រតនា តាមរយៈការចាប់ផ្តួលរួចហើយឃ្លេ ក ដែលធ្វើឲ្យអ្នកគាំទ្រកម្ពុជាគិតថា រតនា អាចនឹងចាញ់ដោយសារស្នៀតនេះ។ តែអ្វីៗត្រូវបានប្រសើរឡើងវិញបន្ទាប់ពីអ្នកលេងគុនខ្មែរមកពីបាត់ដំបង អាចបំបែកស្នៀតនេះបាន។
ក្រោយរើរួចពីស្នៀតគ្រោះថ្នាក់ ចាន់ រតនា បានព្យាយាមវាយសន្ធាប់យ៉ាងខ្លាំងមកលើ Abro តាមរយៈការកណ្តាប់ដៃ និងស្នៀតជើងចំៗមកលើកីឡាករឥណ្ឌូណេស៊ី។ នៅចុងទឹកទី២ រតនា ដែលព្យាយាមវាយសន្ធាប់បានប្រើជង្គង់ស្តាំទៅលើផ្ទៃមុខ Abro ធ្វើរូបគេដួលក្តារសង្វៀន បន្ទាប់មក រតនា បានឡើងជិះពីលើ និងប្រើកណ្តាប់ដៃវាយរហូតអាជ្ញាកណ្តាលបញ្ឈប់តែម្តង។
សម្រាប់ការប្រកួតនៅយប់នោះដែរ កីឡាការិនីខ្មែរ-អាមេរិក ឯម សុវណ្ណារី បានផ្ដួលកីឡាការិនីអ៊ុយក្រែន Iryna Kyselova ឲ្យអាជ្ញាកណ្តាលបញ្ឈប់ក្នុងទឹកទី១ តាមរយៈការប្រើកណ្តាប់ដៃវាយលើផ្ទៃមុខធ្វើឲ្យកីឡាការិនីអ៊ុយក្រែនបាត់បង់ការគ្រប់គ្រង។ នេះជាជ័យជម្នះលើកដំបូងលើសង្វៀន MMA របស់ ឯម សុវណ្ណារី ដែលទើបបង្ហាញខ្លួនលើកដំបូង៕
Tag:
ប្រដាល់គុនខ្មែរ
ចាន់ រតនា
NOE Championship
ឯម សុវណ្ណារី
© រក្សាសិទ្ធិដោយ thmeythmey.com