រូបថតមួយសន្លឹក ដែលបង្ហាញពីអ្នកលក់តាមដងផ្លូវម្នាក់ កំពុងធ្វើនំក្រឡាន ដែលជានំប្រពៃណីរបស់ខ្មែរ ធ្វើពីអង្ករដំណើប ហើយដុតនៅក្នុងបំពង់ឫស្សី ត្រូវបានជ្រើសរើសជារូបភាពឈ្នះគេ ក្នុងការប្រកួតថតរូប ដើម្បីអបអរ«ឆ្នាំនៃបេតិកភ័ណ្ឌវប្បធម៌អឺរ៉ុប» ដែលត្រូវបានរៀបចំដោយ ប្រតិភូសហភាពអឺរ៉ុបប្រចាំកម្ពុជា។
ម្ចាស់ស្នាដៃជ័យលាភីនេះ គឺ លោក លាង វីល្លី បានទទួលរង្វាន់ធំ ជាម៉ាស៊ីនថតរូបដេលមានតម្លៃ៧០០ដុល្លារ ពីឯកអគ្គរដ្ឋទូតសហភាពអឺរ៉ុប លោក George Edgar នៅក្នុងកាលពីថ្ងៃតី ៧ ខែធ្នូ នៅស្ថានទូតសហភាពអឺរ៉ុបប្រចាំនៅកម្ពុជា។
លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានមានប្រសាសន៍ ក្នុងពិធីប្រគល់រង្វាន់នោះថា គណៈកម្មការបានកោតសរសើរ ចំពោះគុណភាព និងអារម្មណ៍ ដែលមាននៅក្នុងរូបថតមួយសន្លឹកនេះ ក៏ដូចជាសេចក្តីពណ៌នាប្រកបដោយភាពច្នៃប្រឌិត អំពីនំក្រឡានដែលជាផ្នែកមួយសំខាន់ នៃបេតិកភ័ណ្ឌវប្បធម៌របស់កម្ពុជា ហើយជាអាហារដែលគេនិយមចូលចិត្តខ្លាំងទៀត។
បើតាម លោក George Edgar រូបថតជាង៥០០សន្លឹក ត្រូវបានផ្ញើមកដើម្បីចូលរួមក្នុងការប្រកួតនេះ ដែលភាគច្រើនជារូបថតដែលបង្ហាញពីបេតិកភណ្ឌផ្នែកស្ថាបត្យកម្មដ៏អស្ចារ្យរបស់កម្ពុជា ពោលគឺរូបថតស្ដីពីប្រាង្គប្រាសាទ ក៏ដូចជាទីវត្តអារាមនានាទូទាំងប្រទេស។ ក្នុងនោះក៏មានដែរ រូបថតស្ដីពីម្ហូបអាហារ ជីវិតរស់នៅប្រចាំថ្ងៃ ក៏ដូចជាសិល្បៈសម្ដែងផ្សេងៗ។ លោក George Edgar បញ្ជាក់ដូច្នេះថា៖ «យើងពិតជារីករាយណាស់ ដែលបានឃើញប្រតិកម្មតបរបស់ប្រជាជន ចំពោះកម្មវិធីប្រកួតនេះ ហើយពិតជារីករាយ បន្ទាប់ពីបានឃើញនូវទិដ្ឋភាពផ្សេងៗ នៃបេតិកភណ្ឌវប្បធម៌ទាំងអស់នោះតាមរយៈរូបថត ដែលជាទឹកដៃរបស់ប្រជាជនរបស់ប្រទេស ដែលសម្បូរទៅដោយបេតិកភណ្ឌវប្បធម៌មួយនេះ»។
សមាសភាពនៃគណៈកម្មការវាយតម្លៃរួមមាន វិចិត្រករដ៏ល្បីល្បាញរបស់កម្ពុជាគឺលោក ឈឹម សុធី និងកញ្ញា ចាន់ ឌីណា រួមជាមួយអ្នកដឹកនាំរឿង អ្នកស្រី សុទ្ធោ គូលីកា ហើយនិងអ្នកថតរូបអាជីព គឺលោក ម៉ក់ រេមីសា លោក John McDermott លោក Roberto Traina និងលោក Laurent Dambies។
លោក Roberto Traina បានថ្លែងថា៖«គណៈកម្មការ ពិតជាមានការស្ងើចសរសើរយ៉ាងខ្លាំង ចំពោះគុណភាពរបស់រូបថត ដែលបានបញ្ជូនមក ហើយយើងពិតជាពិបាកសម្រេចចិត្តណាស់ ក្នុងការជ្រើសរើសអ្នកដែលជាប់ការជម្រុះចុងក្រោយ និងអ្នកដែលត្រូវឈ្នះក្នុងកម្មវិធីនេះ»។
ស្នាដៃរូបថតដែលទទួលបានចំណាត់ថ្នាក់លេខ ២ ជារូបថតបង្ហាញពីចម្លាក់ព្រះកេសមួយ ដែលរុំព័ទ្ធដោយស្លៃ។ ម្ចាស់ស្នាដៃររូបថតជ័យលាភីនេះ គឺលោក កែវ ដាណេ ដែលទទួលបានរង្វាន់ម៉ាស៊ីនថតរូបមានតម្លៃ ៦០០ដុល្លារ។ ចំណែកឯរូបថតដែលជាប់ចំណាត់លេខ៣ គឺជារូបថតរបស់ លោក រើន រួម ដែលបង្ហាញមនុស្សអុជធូបនៅវត្តអារាម។ ម្ចាស់ជ័យលាភីលេខ ៣នេះ ទទួលបានម៉ាស៊ីណថតរូប មានតម្លៃ ៥០០ដុល្លារ។
ក្រៅពីនេះ ស្នាដៃថតរូប ១០នាក់ផ្សេងទៀត ក៏ត្រូវបានគណៈកម្មការ ជ្រើសរើសសម្រាប់ជុំជម្រុះនោះដែរ ហើយម្ចាស់ស្នាដៃ ក៏បានទទួលរង្វាន់ និងវិញ្ញាបនបត្រសម្រាប់រូបថត ដែលមានការកោតសរសើរខ្លាំង ក្នុងពិធីប្រគល់រង្វាន់នោះដែរ។
សូមបញ្ជាក់ថា រូបថតជ័យលាភី និងរូបថតដែលទទួលបានការកោតសរសើរខ្ពស់ នឹងត្រូវយកទៅដាក់តាំងបង្ហាញជុំវិញប្រទេស ក្នុងរយៈពេលប៉ុន្នានសប្តាហ៍ខាងមុខ នៅតាមទីកន្លែងនានា ដូចជា សាកលវិទ្យាល័យភូមិន្ទភ្នំពេញ សាកលវិទ្យាល័យបាត់ដំបង សាកលវិទ្យាល័យ ជា ស៊ីម កំចាយមារ ក្នុងខេត្តព្រៃវែង និងបណ្ឌិតសភាអាស៊ី-អូស្ត្រាលី ក្នុងខេត្តកណ្ដាល។
សូមរំឭកថា ការប្រកួតរូបថតនេះ ត្រូវបានរៀបចំឡើងដោយ សហភាពអឺរ៉ុបប្រចាំកម្ពុជា ដើម្បីជាការអបអរឆ្នាំ២០១៨ ដែលជា«ឆ្នាំនៃបេតិកភ័ណ្ឌវប្បធម៌អឺរ៉ុប»នេះ ក៏ដូចជាអបអរកម្មវិធីស្រដៀងគ្នានេះរាប់រយកម្មវិធីផ្សេងទៀត ដែលត្រូវបានរៀបចំឡើងក្នុងទ្វីបអឺរ៉ុប និងនៅជុំវិញពិភពលោក។ គោលការណ៍ណែនាំសម្រាប់ការប្រកួតនេះ តម្រូវឲ្យបេក្ខជនផ្ដិតយករូបភាព ដែលពណ៌នាអំពីបេតិកភណ្ឌវប្បធម៌ ក្នុងគ្រប់ទម្រង់ទាំងអស់ រាប់ចាប់ពីសិល្បៈ ស្ថាប្យកម្ម តន្ត្រី សិប្បកម្ម ម្ហូបអាហារ និងប្រពៃណីបុណ្យឈប់សម្រាកជាដើម៕
(អត្ថបទពាណិជ្ជកម្ម)