ADB ផ្តល់កម្ចី៧០លានដុល្លារដល់កម្ពុជា សម្រាប់ជួសជុលផ្លូវជាតិលេខ១ និងលេខ៦

ជាតិ

ADB ផ្តល់កម្ចី៧០លានដុល្លារដល់កម្ពុជា សម្រាប់ជួសជុលផ្លូវជាតិលេខ១ និងលេខ៦

13, Dec 2018 , 1:38 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ធនាគារអភិវឌ្ឍន៍អាស៊ី(ADB)បានផ្តល់កម្ចី៧០លានដុល្លារដល់កម្ពុជា សម្រាប់កែលម្អ និងលើកកម្ពស់កំណាត់ផ្លូវជាតិលេខ១ និងលេខ៦ ។ កំណាត់ផ្លូវទាំងពីរនេះ នឹងចាប់ផ្តើមបើកការដ្ឋាន នៅខែមករា ឆ្នាំ២០១៩ ដល់ខែមិថុនា ឆ្នាំ២០២៣។ នេះបើលោក ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន ក្នុងពិធីដាក់ឲ្យដំណើរការជាផ្លូវការ «កម្មវិធីថែទាំផ្លូវROAD CARE Mobile App» នាថ្ងៃទី១៣ធ្នូ។

ចំនួនថវិកាខាងលើ នឹងយកទៅប្រើប្រាស់លើកកម្រិតផ្លូវជាតិលេខ១ ចន្លោះពីអ្នកលឿង ទៅបាវិត (គីឡូម៉ែត្រលេខ ៦៣+៣០០ ដល់គីឡូម៉ែត្រលេខ ១៥៩+០០០) ពីកម្រាលកៅស៊ូ DBST ទៅជាកម្រាលកៅស៊ូAC។ ដោយឡែក ផ្លូវជាតិលេខ៦ ត្រូវជួសជុលចន្លោះពីក្រុងសៀមរាប ទៅក្រឡាញ់ (គីឡូម៉ែត្រលេខ៣១៧+៦៣០ ដល់គីឡូម៉ែត្រលេខ៣៦៧+៥១២) ដោយត្រូវសាងសង់ប្រព័ន្ធលូសង ខាងផ្លូវ ដើម្បីរំដោះទឹកភ្លៀងចេញ។

ប្រភពដដែលបន្តថា តាមរយៈថវិកាកម្ចីនេះ នឹងមានការស្ថាបនាមន្ទីរពិសោធន៍សម្ភារសំណង់ ៤កន្លែងផងដែរ រួមមានខេត្តក្រចេះ កំពត សៀមរាប និងពោធិ៍សាត់ ដែលអាចបង្កលក្ខណៈងាយស្រួលដល់ក្រសួងសាធារណការ និងដឹកជញ្ជូន ត្រួតពិនិត្យបច្ចេកទេសស្ថាបនាផ្លូវថ្នល់ឲ្យកាន់តែមានគុណភាពរឹងមាំល្អ។

ជាមួយគ្នានេះ លោក ស៊ុន ចាន់ថុល បានអំពាវនាវដល់អ្នកប្រើប្រាស់ផ្លូវទាំងឡាយ ពិសេសក្រុមហ៊ុនដឹកជញ្ជូន «សូមកុំដឹកទំនិញលើសទម្ងន់ដែលបានកំណត់ និងកុំកែទ្រង់ឡាន ដែលអាចឲ្យផ្លូវឆាប់ខូចខាតមុនថ្ងៃកំណត់ និងបង្កគ្រោះថ្នាក់ចរាចរណ៍ផ្សេងៗ»៕