ITF ថ្នាក់ជាតិមិនឲ្យជម្រើសជាតិចូលរួម ខណៈអ្នកឈ្នះអាចក្លាយជាជម្រើសជាតិ

កីឡាជាតិ

ជាតិ

ITF ថ្នាក់ជាតិមិនឲ្យជម្រើសជាតិចូលរួម ខណៈអ្នកឈ្នះអាចក្លាយជាជម្រើសជាតិ

14, Dec 2018 , 7:59 am

រូបភាព

សកម្មភាពប្រកួតក្នុងព្រឹត្តិការណ៍កីឡាជាតិលើកទី២កាលពីពេលកន្លងទៅ

ដោយ:

ដើម្បីលើកទឹកចិត្ត និងផ្តល់ឱកាសដល់កីឡាករកីឡាការិនីមកពីតាមបណ្តាក្លិប-សមាគមទាំង១៨ ការប្រកួតកីឡាតេក្វាន់ដូ ITF ជ្រើសរើសជើងឯកថ្នាក់ជាតិឆ្នាំនេះ មិនអនុញ្ញាតឲ្យក្រុមជម្រើសជាតិឈុតធំចូលរួមឡើយ។ គ្រប់ម្ចាស់ជ័យលាភីនៅឆ្នាំនេះ អាចនឹងទទួលបានឱកាសធ្វើតេស្តសមត្ថភាព ដើម្បីចូលរួមហ្វឹកហាត់ជាមួយក្រុមជម្រើសជាតិឈុតធំ។ ការប្រកួតនឹងប្រព្រឹត្តទៅចាប់ពីថ្ងៃទី១៤-១៦ ខែធ្នូ ឆ្នាំ២០១៨។

ក្រុមជម្រើសជាតិឈុតធំកីឡាតេក្វាន់ដូ ITF មិនអនុញ្ញាតឲ្យចូលរួមប្រកួតប្រជែង ក្នុងការប្រកួតជើងឯកថ្នាក់ជាតិនៅឆ្នាំ២០១៨ ឡើយ។ នេះបើតាមការអះអាងរបស់លោក បួនហ៊ីង សុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជា។ សម្រាប់លោក សុធីយ៉ា ការធ្វើបែបនេះ គឺដើម្បីលើកទឹកចិត្តដល់កីឡាករកីឡាការិនីមកពីតាមបណ្តាខេត្តនានា មានឱកាសច្រើនក្នុងការឈ្នះជើងឯក និងបានបញ្ចេញសមត្ថភាពជាដើម។ ម្យ៉ាងដោយសារក្រុមឈុតធំ ទើបតែត្រឡប់មកពីចូលរួមប្រកួតលក្ខណៈអន្តរជាតិកាលពីពេលថ្មីៗ។

ជាការប្រកួតជើងឯកថ្នាក់ជាតិប្រចាំឆ្នាំក៏ពិតមែន។ ប៉ុន្តែវាជាការប្រកួតស្វែងរកកីឡាករមានទេពកោសល្យ ដើម្បីត្រៀមចូលរួមហ្វឹកហាត់ក្នុងក្រុមជម្រើសជាតិ។ ក្នុងន័យនេះកីឡាករមានទេពកោសល្យល្អ ក៏ដូចជាម្ចាស់ជ័យលាភីក្នុងការប្រកួត អាចមានភាគរយខ្ពស់ក្នុងការក្លាយជាកីឡាករជម្រើសជាតិនៅឆ្នាំក្រោយ។ បច្ចុប្បន្នក្រុមកីឡាករជម្រើសជាតិឈុតធំមានចំនួន១០នាក់ និងយុវជនថ្នាលចំនួន៨នាក់ ខណៈគម្រោងសហព័ន្ធចង់បានឈុតធំ១៥រូបនិងថ្នាល១២រូប។

«ការប្រកួតឆ្នាំនេះយើងមិនអនុញ្ញាតឲ្យក្រុមកីឡាករជម្រើសជាតិឈុតធំចូលរួមប្រកួតនោះទេ ព្រោះយើងចង់ផ្តល់ឱកាសដល់កីឡាករមកពីតាមខេត្តបានបញ្ចេញសមត្ថភាព។ យើងនឹងសម្លឹងមើលកីឡាករមានទេពកោសល្យល្អ ដើម្បីផ្តល់ឱកាសឲ្យពួកគេបានធ្វើតេស្ត ដើម្បីចូលរួមហ្វឹកហាត់ជាមួយក្រុមជម្រើសជាតិ»។ លោក បួនហ៊ីង សុធីយ៉ា បញ្ជាក់ដូច្នេះ ហើយបន្ថែមថា លោកសម្លឹងឃើញកីឡាករថ្នាលពីររូប ដែលត្រូវដំឡើងមកហ្វឹកហាត់ក្នុងឈុតធំនៅឆ្នាំក្រោយ។ តែលោកមិនបានប្រាប់ពីឈ្មោះកីឡាករទាំងពីរឡើយ។

សម្រាប់ការប្រកួតជើងឯកថ្នាក់ជាតិឆ្នាំនេះ មានក្រសួងក្លិប-សមាគមចំនួន១៨ចូលរួម ដោយមានកីឡាករកីឡាការិនីសរុបចំនួន១៣៦នាក់(ស្រី៣១)។ បើធៀបនឹងឆ្នាំកន្លងទៅចំនួននេះហាក់មានការថយចុះ ដោយសារសហព័ន្ធតម្រូវឲ្យក្លិបនីមួយៗចម្រាញ់កីឡាកររបស់ខ្លួនមុនចូលរួមប្រកួត។ ការធ្វើដូច្នេះ ដោយសារសហព័ន្ធជាអ្នកទទួលបន្ទុកក្នុងការរៀបចំ ក្រោមគម្រោងថវិការបស់ក្រសួងអប់រំ យុវជន និងកីឡា។ កីឡាករទាំងនេះត្រូវប្រកួតប្រជែងលើ១៩វិញ្ញាសា៕