ជាតិ
២៥ខេត្ត/រាជធានី
ស្ពានឫស្សីកោះប៉ែន សាងសង់ថែម១០០ម៉ែត្រទៀត ដើម្បីត្រៀមខ្លួនទទួលកំណើនភ្ញៀវទេសចរ
× កំពង់ចាម៖ ស្ពានឫស្សី(ប្រដឹស)ឆ្លងទៅឆ្នេរខ្សាច់កោះប៉ែន នឹងបើកសម្ភោធនៅមុនថ្ងៃទី២៥ខែធ្នូ ឆ្នាំ២០១៨ខាងមុខនេះ។ ស្ពានឫស្សីដែលធ្វើសម្រាប់ឲ្យភ្ញៀវឆ្លងទៅលេងឆ្នេរខ្សាច់នេះ មានប្រវែងរហូតទៅដល់៨០០ម៉ែត្រ ពោលគឺមានការសាងសង់បន្ថែម១០០ម៉ែត្រទៀត បើធៀបនឹងឆ្នាំ២០១៧។
លោក ប៊ុន តារ៉ា ជាប្រធានសមាគមនៃរមណីយដ្ឋានឆ្នេរខ្សាច់កោះប៉ែន បាននិយាយថា ស្ពានឫស្សីនឹងបើកឲ្យភ្ញៀវទេសចរធ្វើដំណើរឆ្លងកាត់ដោយកង់ និងថ្មើរជើង នាថ្ងៃបុណ្យណូអែលខាងមុខនេះ។ថ្លែងប្រាប់អ្នកសារព័ត៌មានThmeyThmey 25 លោក តារ៉ា បាននិយាយថា ស្ពានឫស្សីដែលមានសាងសង់នៅឆ្នាំនេះ មានប្រវែងរហូតទៅដល់៨០០ម៉ែត្រ ហើយត្រូវចំណាយដើមទុនអស់ប្រមាណជាង៣ម៉ឺនដុល្លារជារៀងរាល់ឆ្នាំ ព្រោះស្ពាននេះ អាចប្រើប្រាស់បានត្រឹមតែមួយរដូវប្រាំងប៉ុណ្ណោះ ពោលគឺចន្លោះពីខែធ្នូរហូតទៅដល់ខែឧសភា ។
ប្រធានសមាគមដដែល បានបញ្ជាក់ថា «ឆ្នាំនេះលោកបានពង្រីកស្ពានថែម១០០ម៉ែត្រទៀតដើម្បីផ្តល់ភាពងាយស្រួលដល់ភ្ញៀវទេសចរ និងបញ្ចៀសការកកស្ទះ នៅពេលចំនួនភ្ញៀវទេសចរកើនឡើង ខណៈដែលមានបុណ្យទាន ដូចជាឆ្លងឆ្នាំសកល,ពិធីបុណ្យចូលឆ្នាំខ្មែរ,ថ្ងៃសម្រាកចុងសប្តាហ៍ និងពិធីបុណ្យជាតិផ្សេងៗ »។
ភ្ញៀវទេសចរ ដែលចូលមកលេងនៅទីនេះ អាចមានជម្រើសពីរក្នុងការធ្វើដំណើរ ដោយជម្រើសទីមួយ ភ្ញៀវទេសចរអាចធ្វើដំណើរតាមស្ពានកោះប៉ែនថ្មីចូលមកតាមភូមិ ឬ អាចផ្ញើរយានជំនិះនៅលើច្រាំងទន្លេ រួចក៏បន្តដំណើរដោយថ្មើរជើង ឬជិះកង់តាមស្ពានឫស្សីក៏បាន។
បើតាមលោក តារា ការជួលតង់សម្រាប់បោះជំរំស្នាក់នៅជាក្រុម ក្នុងតង់មួយតម្លៃ១០ដុល្លារ និងមានអាហារ២ពេល គឺអាហារថ្ងៃត្រង់និងអាហារពេលល្ងាច ដែលបានបូកបញ្ចូលរួចជាស្រេចជាមួយថ្លៃតង់។ «សូមធានាទៅលើតម្លៃសេវាកម្មនឹងមិនប្រែប្រួលទាំងថ្ងៃបុណ្យនិងថ្ងៃធម្មតា។ ក្នុងនោះដែរសមាគមរបស់លោកក៏មានបញ្ជាក់ពីតារាងតម្លៃសេវាកម្មនានារបស់រមណីយដ្ឋាននេះដើម្បីផ្ដល់ភាពងាយស្រួលដល់ភ្ញៀវដែលចូលមកកំសាន្តនៅរមណីយដ្ឋានធម្មជាតិមួយ»។ នេះបើតាមប្រធានសមាគមរមណីយដ្ឋានឆ្នេរខ្សាច់កោះប៉ែន ៕
Tag:
ស្ពានឫស្សី
ឆ្នេរខ្សាច់
ទេសចរណ៍
កំពង់ចាម
ThmeyThmey25
© រក្សាសិទ្ធិដោយ thmeythmey.com