អន្តរជាតិ
វៀតណាម ចង់ធ្វើម្ចាស់ផ្ទះជំនួបត្រាំ-គីម លើកទី២
× ខណៈជំនួបលើកទី២ រវាងប្រធានាធិបតី ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន មិនទាន់មានគម្រោងច្បាស់នៅឡើយនោះ គេឃើញមានការជជែកច្រើនពីទីតាំងដែលត្រូវរៀបចំ។ វៀតណាម ដែលជាមិត្តជិតស្និទ្ធមួយរបស់កូរ៉េខាងជើង បានបង្ហាញបំណងធ្វើម្ចាស់ផ្ទះជំនួបទី២ នេះ។ ប៉ុន្តែគេមិនដឹងថា ជំនួបត្រាំ-គីម លើកនេះ អាចកើតឡើងតាមគម្រោងឬយ៉ាងណាឡើយ ព្រោះត្រូវចាំមើលថា លោក គីម ទៅសេអ៊ូលពេលណាសិន។
តើជំនួបរវាងលោក ដូណាល់ ត្រាំ និងលោក គីម ជុងអ៊ុន អាចធ្វើនៅតំបន់អាស៊ានម្ដងទៀតឬទេ បើជំនួបលើកទី១ ធ្វើនៅសិង្ហបុរីម្ដងហើយនោះ? រដ្ឋសមាជិកអាស៊ានវៀតណាម បានប្រាប់កូរ៉េខាងត្បូងថា ខ្លួនចង់ធ្វើម្ចាស់ផ្ទះជំនួបលើកទី២ នេះ។ នេះបើតាមការផ្សាយរបស់ទូរទស្សន៍អាមេរិក CNN នៅថ្ងៃទី១៣ ខែធ្នូ ដោយស្រង់ប្រភពពីមន្ត្រីកូរ៉េខាងត្បូង។
តាមពិតទៅ វៀតណាម ត្រូវបានប្រព័ន្ធផ្សព្វផ្សាយជាច្រើនរាយការណ៍ថា ស្ថិតក្នុងចំណោមប្រទេសបីដែលមានសក្ដានុពលរៀបចំជំនួបដ៏ធំនេះ។ ប្រទេសពីរទៀត គឺឥណ្ឌូណេស៊ីដែលជាសមាជិកមួយរបស់អាស៊ាន និងម៉ុងហ្គោលី។ កន្លងមក លោកប្រធានាធិបតី ត្រាំ ក៏ធ្លាប់បានបង្ហើបដែរថា មានប្រទេសបីហើយដែលស្ថិតក្នុងការពិចារណា ប៉ុន្តែគេមិនដឹងថា លោកចង់សំដៅប្រទេសណាទាំង៣ នេះយ៉ាងណានោះឡើយ។
យ៉ាងណាមិញ គម្រោងជំនួបនេះនៅមិនទាន់ច្បាស់នៅឡើយទេ ដ្បិតរង់ចាំគម្រោងទស្សនកិច្ចរបស់លោក គីម នៅកូរ៉េខាងត្បូងសិន។ កាលពីខែកញ្ញា ប្រធានាធិបតីកូរ៉េខាងត្បូង មូន ចេអ៊ីន រំពឹងថា លោក គីម នឹងទៅកាន់រដ្ឋធានីសេអ៊ូលនៅក្នុងឆ្នាំ២០១៨ នេះ។ ប៉ុន្តែមន្ត្រីកូរ៉េខាងត្បូងបានប្រាប់ CNN ថា លទ្ធភាពនៃដំណើរទស្សនកិច្ចរបស់ប្រមុខដឹកនាំកូរ៉េខាងជើងនៅមុនដំណាច់ឆ្នាំនេះ ខិតជិតទៅរកសូន្យទៅហើយ។
ក្នុងករណីជំនួបរវាងលោក មូន និងលោក គីម មិនទាន់កើតមាននោះ គម្រោងជំនួបត្រាំ-គីម ក៏ត្រូវលើកពេលតាមនោះដែរ។ ជុំវិញជំនួបលើកទី២ នេះ លោក ត្រាំ និងទីប្រឹក្សារបស់លោកបានអះអាងថា ជំនួបលើកក្រោយអាចកើតឡើងនៅខែមករា ឬកុម្ភៈឆ្នាំ២០១៩ ខាងមុខ។ ប្រធានបទវិញ ក៏ទំនងគ្មានអ្វីក្រៅពីការបន្តជជែកលើការរំសាយនុយក្លេអ៊ែរកូរ៉េខាងជើងដែរ ខណៈការចរចាសព្វថ្ងៃមិនមានលទ្ធផលអ្វីទេ។
សូមបញ្ជាក់ដែរថា ប្រមុខការទូតកូរ៉េខាងជើង រី យ៉ុងហូ ក៏ទើបបញ្ចប់ទស្សនកិច្ចនៅវៀតណាម និងម៉ុងហ្គោលីនៅពេលថ្មីៗនេះ។ ទាំងវៀតណាម ទាំងម៉ុងហ្គោលី ព្រមទាំងឥណ្ឌូណេស៊ីដែរនោះ សុទ្ធតែជាសម្ព័ន្ធមិត្តជិតស្និទ្ធយូរឆ្នាំរបស់កូរ៉េខាងជើង ហើយក៏មានស្ថានទូតនៅតាមប្រទេសរៀងៗខ្លួនដែរ៕
Tag:
វៀតណាម
អាមេរិក
កូរ៉េខាងជើង
© រក្សាសិទ្ធិដោយ thmeythmey.com