ជាតិ
ក្រសួងទេសចរណ៍ ជំរុញឲ្យភោជនីយដ្ឋាន,អាហារដ្ឋាន ចូលរួមយុទ្ធនាការ«ភោជនីយដ្ឋានគ្មានសំរាមក្រោមតុ»
រូបភាពពីក្រសួងទេសចរណ៍
×![]()
ដោយ: ភួង វ៉ាន់ថា
ក្រសួងទេសចរណ៍ បានរៀបចំប្រឡងប្រណាំងភោជនីយដ្ឋានស្អាត ក្រោមយុទ្ធនាការ «ភោជនីយដ្ឋានស្អាត៖ ភោជនីយដ្ឋានគ្មានសំរាមជាក្រដាស» ដើម្បីលើកកម្ពស់គុណភាពសេវាកម្មទេសចរណ៍ ក្នុងប្រទេសកម្ពុជា «ស្អាត និងបៃតង - Clean and Green»។ នេះបើយោងតាមទំព័រហ្វេប៊ុកក្រសួងទេសចរណ៍។ 
បើតាមក្រសួង ក្រសួងទេសចរណ៍ ម្ចាស់អាជីវកម្មភោជនីយដ្ឋាន និងអាហារដ្ឋានទេសចរណ៍ អាចចុះឈ្មោះចូលរួមក្នុងយុទ្ធនាការនេះបាន ដោយអនុវត្តន៍អនុវត្តគោលការណ៍គំរូសំខាន់ៗចំនួន៣ចំណុច រួមមានបញ្ហាអនាម័យនៅតុអាហារ,បង្គន់អនាម័យ,និងបញ្ជីរាយនាមមុខម្ហូប (Menu)។
ក្រសួងទេសចរណ៍ បានបញ្ជាក់ថា ម្ចាស់អាជីវកម្មត្រូវរៀបចំឱ្យមានកន្ត្រក ឬធុងសំរាមដោយឡែក សម្រាប់តុអាហារនីមួយៗ មានថង់ទ្រនាប់ និងត្រូវលាងសម្អាតជារៀងរាល់ថ្ងៃ។ ក្រសួងទេសចរណ៍ បញ្ជាក់ដូច្នេះ៖«ត្រូវបិទសារ ឬពាក្យស្លោក រំលឹកអំពីបញ្ហាអនាម័យ ដល់ភ្ញៀវក្នុងបរិវេណទីតាំងអាជីវកម្ម ឬនៅលើតុអាហារតែម្ដង។ ត្រូវចាត់ឱ្យមានភ្នាក់ងារ សម្រាប់ប្រមូលសំរាមដែលភ្ញៀវចោលក្រៅកន្ត្រក ឬធុង និងត្រូវលើកទឹកចិត្តដល់ភ្ញៀវទេសចរ ក្នុងការផ្ដល់ជូនជាកន្សែងសម្រាប់ជូត ឬកន្សែងត្រជាក់ជំនួសឱ្យការផ្ដល់ជូននូវក្រដាសអនាម័យ»។
ចំណែកឯបង្គន់អនាម័យស្អាត ម្ចាស់អាជីវកម្ម ត្រូវរៀបចំតាមស្ដង់ដារបង្គន់សាធារណៈកម្ពុជា ពុំមានក្លិនមិនល្អ មានការបែងចែករវាងបង្គន់អនាម័យប្រុស និងស្រី មានដាក់សាប៊ូ, ទឹកសម្រាប់លាងដៃ និងត្រូវចាត់ឱ្យមានបុគ្គលិកប្រចាំការដើម្បីលាងសម្អាតជាប្រចាំ។ នេះបើតាមទំព័រហ្វេសប៊ុកក្រសួងទេសចរណ៍ ដោយបញ្ជាក់ទៀតថា ក្នុងបញ្ជីរាយនាមមុខម្ហូប (Menu) ត្រូវសរសេរជា៣ ភាសាយ៉ាងតិច រួមមានភាសាខ្មែរនៅខាងមុខ ឬនៅពីលើ និងភាសាអង់គ្លេសនៅបន្ទាប់ ឬបន្ទាត់ខាងក្រោម និងភាសាបរទេសទីបីនៅបន្ទាប់ទៀត អាស្រ័យតាមស្ថានភាពជាក់ស្ដែងនៃអតិថិជនរបស់អាជីវកម្ម។ ក្រសួងទេសចរណ៍បញ្ជាក់ដូច្នេះ៖«ត្រូវមានដាក់តាំងបង្ហាញនៅបរិវេណខាងមុខ ទីតាំងអាជីវកម្ម ឬកន្លែងងាយមើលឃើញ។ ត្រូវមានបញ្ជាក់ពីគ្រឿងផ្សំ និងព័ត៌មានផ្សេងៗបន្ថែមទៀត ដែលចាំបាច់សម្រាប់ជាមូលដ្ឋាន ឲ្យភ្ញៀវជ្រើសរើស។ ត្រូវមានបញ្ជាក់តម្លៃឱ្យបានជាក់លាក់ និងការប្រើប្រាស់តម្លៃតាមជម្រើសបន្ថែមផ្សេងៗដែលមាន»។
លោក ថោង ខុន រដ្ឋមន្ត្រីក្រសួងទេសចរណ៍ បានប្រគល់ត្រាចំនួន១០ ជូនដល់ម្ចាស់អាជីវកម្មភោជនីយដ្ឋាន អាហារដ្ឋានទេសចរណ៍ ដែលបានចុះឈ្មោះចូលរូមក្នុងយុទ្ធនា និងកូនសៀវភៅ Green passport ចំនួន១១៨ក្បាល ចែកជូនដល់ប្រជាពលរដ្ឋ និងមន្ត្រីរាជការក្នុងខេត្តកោះកុង នាព្រឹកថ្ងៃទី ១៤ ខែធ្នូ ឆ្នាំ២០១៨ផងដែរ៕
Tag:
ទេសចរណ៍
ជាតិ
© រក្សាសិទ្ធិដោយ thmeythmey.com
