អន្តរជាតិ
អារ៉ាប៊ីសាអូឌីត ខឹងព្រឹទ្ធសភាអាមេរិកដែលរិះគន់ខ្លួនក្នុងសង្គ្រាមយេម៉ែន និងឃាតកម្មលោក Kashoggi
× អារ៉ាប៊ីសាអូឌីត បានប្រតិកម្មតបនឹងព្រឹទ្ធសភាអាមេរិកដែលចេញដំណោះស្រាយស្នើឲ្យរដ្ឋបាលប្រធានាធិបតី ដូណាល់ ត្រាំ ឈប់គាំទ្រក្រុងរីយ៉ាដក្នុងយុទ្ធនាការនៅយេម៉ែន និងការចោទរជ្ជទាយាទ Mohammed bin Salman នៅពីក្រោយករណីឃាតកម្មអ្នកសារព័ត៌មាន Jamal Kashoggi ។ ទោះជាដំណោះស្រាយនេះគ្មានអំណាចចាប់ឲ្យអនុវត្តមែន តែជាបង្ហាញថា ការដើរផ្ទុយគ្នារវាងព្រឹទ្ធសភា និងលោក ត្រាំ ក្នុងទំនាក់ទំនងជាមួយសម្ព័ន្ធមិត្តមជ្ឈិមបូព៌ាមួយនេះ។
អារ៉ាប៊ីសាអូឌីត បានហៅដំណោះស្រាយចំនួនពីររបស់ព្រឹទ្ធសភាអាមេរិកជាការលូកលាន់កិច្ចការផ្ទៃក្នុងរបស់ខ្លួន។ ថ្មីៗនេះ ព្រឹទ្ធសភាអាមេរិកបានអនុម័តដំណោះស្រាយពីរដែលមួយបានទាមទារឲ្យអាមេរិកបញ្ចប់ការគាំទ្ររបស់ខ្លួនលើអារ៉ាប៊ីសាអូឌីតក្នុងសង្គ្រាមយេម៉ែន និងមួយទៀតបានចោទរជ្ជទាយាទ Mohammed bin Salman ដោយត្រង់ថា ជាអ្នកទទួលខុសត្រូវការស្លាប់របស់លោក Jamal Kashoggi នៅតួកគី។
នៅថ្ងៃទី១៦ ខែធ្នូ ក្រសួងការបរទេសអារ៉ាប៊ីសាអូឌីតបានចេញសេចក្ដីថ្លែងការណ៍តបវិញដោយថ្កោលទោសជំហររបស់ព្រឹទ្ធសភាអាមេរិក ដែលផ្អែកលើការចោទប្រកាន់ដោយគ្មានមូលដ្ឋាន និងជាការកកូរកកាយផ្ទៃក្នុងខ្លួនដោយឥតលាក់លៀម។ ក្រុងរីយ៉ាដក៏រិះគន់ស្ថាប័ននីតិបញ្ញត្តិអាមេរិកដែលចោទថ្នាក់ដឹកនាំកំពូលអារ៉ាប៊ីសាអូឌីត និងបានប្រាប់ព្រឹទ្ធសភាអាមេរិកវិញថា ខ្លួនមិនអត់ឱនឲ្យការនិយាយមិនគោរពដល់មេដឹកនាំរបស់ខ្លួនឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ការអនុម័តដំណោះស្រាយទាំងពីររបស់ព្រឹទ្ធសភាអាមេរិក ជាការដើរបញ្ច្រាស់ផ្លូវជាមួយប្រធានាធិបតី ដូណាល់ ត្រាំ ដែលចេះតែការពារអារ៉ាប៊ីសាអូឌីតក្នុងសំណុំរឿងយេម៉ែន និងឃាតកម្មលោក Kashoggi ។ ខណៈពិភពលោកថ្កោលទោសខ្លាំងយ៉ាងណា លោក ត្រាំ មិនបានធ្វើតាមឡើយ និងបន្តរក្សាជំហរជិតស្និទ្ធជាមួយថ្នាក់ដឹកនាំក្រុងរីយ៉ាដដដែល។
ក្នុងសំណុំរឿងយេម៉ែន សម្ព័ន្ធមិត្តអារ៉ាប់ដឹកនាំដោយអារ៉ាប៊ីសាអូឌីត រងការប្រតិកម្មជុំទិសទីដោយសារវិនាសកម្មធំធេង។ ការស្នើឲ្យបញ្ឈប់យុទ្ធនាការយោធានេះ បានធ្លាក់ជាបន្តបន្ទាប់ សំដៅបញ្ចប់វិនាសកម្មនៅយេម៉ែន។ អាមេរិកវិញ ទោះជាមិនចូលរួមក្នុងជម្លោះដែលផ្ទុះខ្លាំងក្នុងឆ្នាំ២០១៥ ដោយផ្ទាល់មែន បានជួយផ្គត់ផ្គង់អាវុធឲ្យសម្ព័ន្ធមិត្តចម្រុះ។ យ៉ាងណាក្រោយមក អាមេរិកបានផ្អាកការផ្គត់ផ្គង់សាំងឲ្យក្រុមចម្រុះហើយ។
ឯករណីឃាតកម្មលោក Kashoggi វិញ ម្ដងជាពីរដង លោក ត្រាំ បានការពាររជ្ជទាយាទអារ៉ាប៊ីសាអូឌីត ក្រោមហេតុផលប្រយោជន៍ជាតិ ព្រោះអារ៉ាប៊ីសាអូឌីតជាម៉ូយដុំចាំទិញអាវុធអាមេរិក។ កន្លងមក ទីភ្នាក់ងារចារកម្មកណ្ដាល CIA ក៏បង្ហាញរបាយការណ៍របស់ខ្លួនដែលរកឃើញថា ឃាតកម្មលោក Kashoggi ជាប់ទាក់ទងទ្រង់ Mohammed bin Salman ដែរ៕
Tag:
អាមេរិក
អារ៉ាប៊ីសាអូឌីត
យេម៉ែន
© រក្សាសិទ្ធិដោយ thmeythmey.com