អន្តរជាតិ
×![]()
ដោយ: តន ចាន់រិទ្ធារ៉ា
សហរដ្ឋអាមេរិក នៅថ្ងៃទី១៧ ខែធ្នូ បានប្រកាសថា ខ្លួនអស់បំណងបណ្ដេញលោក បាសា អាល់អាសាដ ចេញពីតំណែងប្រធានាធិបតីស៊ីរីទៀតហើយ ប៉ុន្តែចង់ឲ្យមានការផ្លាស់ប្ដូររបៀបរបបដឹកនាំបច្ចុប្បន្ន។ សម្រាប់អាមេរិក បើគ្មានការផ្លាស់ប្ដូរជាមូលដ្ឋានទេ គ្មានឡើយការផ្ដល់ជំនួយសម្រាប់ស្ថាបនាប្រទេសដ៏ខ្ទេចខ្ទាំនេះឡើងវិញ។ 
ប្រធានាធិបតីស៊ីរី បាសា អាល់អាសាដ អាចបន្តស្ថិតក្នុងតំណែង តែស៊ីរីត្រូវតែមានការផ្លាស់ប្ដូរ។ នេះជាការលើកឡើងរបស់លោក James Jeffrey តំណាងពិសេសរបស់អាមេរិកសម្រាប់ស៊ីរី។ អនាគតរបស់លោក អាសាដ ជាចំណុចខ្ទាស់ក្នុងការស្វែងរកដំណោះស្រាយដើម្បីបញ្ចប់ជម្លោះដែលអូសបន្លាយតាំងពីឆ្នាំ២០១១ មក។ សម្ព័ន្ធមិត្តលោក អាសាដ មានរុស្ស៊ី និងអ៊ីរ៉ង់ជាដើមចង់ឃើញលោកបន្តដឹកនាំស៊ីរី តែអាមេរិកធ្លាប់ចង់ឲ្យលោកចាកចេញ។
ក្នុងកម្មវិធីមួយនៅថ្ងៃទី១៧ ខែធ្នូនៅស្ថាប័ន Atlantic Council លោក Jeffrey អះអាងថា អាមេរិកចង់ឃើញរបបថ្មីមួយនៅស៊ីរី ដែលមានលក្ខណៈសម្បតិ្តខុសពីរបបសព្វថ្ងៃ តែអាមេរិកមិនបានព្យាយាមកម្ចាត់លោក អាសាដ ឡើយ។ ទោះជាយ៉ាងណានេះ អាមេរិកចង់ឲ្យលោក អាសាដ ធ្វើសម្បទានខ្លះមកវិញ ដ្បិតលោកក៏មិនទាន់ទទួលបានជ័យជម្នះនៅឡើយក្នុងសង្គ្រាម៨ឆ្នាំមកនេះ ខណៈគេឃើញមានសកម្មប្រយុទ្ធជាង១សែននាក់ បន្តប្រយុទ្ធនឹងងទាហានរដ្ឋាភិបាលដដែល។
ការផ្លាស់ប្ដូរនៅស៊ីរី ជាលក្ខខណ្ឌដែលអាមេរិកចង់បាន បើប្រទេសនេះចង់ទទួលជំនួយដើម្បីកសាងជាតិឡើយងវិញ។ តំណាងពិសេសខាងលើបានប៉ាន់ស្មានថា ស៊ីរីត្រូវការលុយចំនួនចន្លោះ៣០០ពាន់លានដុល្លារទៅ៤០០ពាន់ដុល្លារដើម្បីអភិវឌ្ឍជាថ្មី ប៉ុន្តែអាមេរិក និងសហគមន៍អន្តរជាតិ នឹងមិនឲ្យមួយកាក់មួយសេនឡើយ បើគេមិនឃើញមានការផ្លាស់ប្ដូរជាវិជ្ជមានណាមួយនោះ។ ពោល គឺរបបលោក អាសាដ ត្រូវតែផ្លាស់ផ្លូវដើរសព្វថ្ងៃ និងធានាថា នឹងមិនមានវិនាសកម្មនៅពេលខាងមុខឡើយ។
តាមពិតទៅ វត្តមានអាមេរិកនៅស៊ីរី មានគោលដៅបោសសម្អាតក្រុមជ្រុលនិយមរដ្ឋឥស្លាមដែលអុកឡុកតំបន់មជ្ឈិមបូព៌ា ដោយគាំទ្រក្រុមឧទ្ទាមប្រឆាំងរដ្ឋាភិបាលលោក អាសាដ ។ ការគាំទ្ររបស់អាមេរិក ធ្វើឲ្យរបបដឹកនាំក្រុងដាម៉ាសទន់ដៃខ្លាំង រហូតធ្វើឲ្យរុស្ស៊ីសម្រេចចិត្តលូកដៃដែរ។ អន្តរាគមន៍របស់រុស្ស៊ី និងសម្ព័ន្ធមិត្តមួយទៀត គឺអ៊ីរ៉ង់ធ្វើឲ្យលោក អាសាដ រឹងមាំជាថ្មី និងក៏រំពឹងថា អាចបន្តដឹកនាំស៊ីរីទៀតដែរ។
យ៉ាងណាមិញ បើតាមទីភ្នាក់ងារព័ត៌មាន AFP លោក Jeffrey ចង់ឲ្យអ៊ីរ៉ង់ ដែលជាសត្រូវស៊ីសាច់ហុតឈាមរបស់អ៊ីស្រាអែលដកខ្លួនចេញពីស៊ីរី តែក្រុងតេហេរ៉ង់អាចបន្តមានទំនាក់ទំនងការទូតខ្លះជាមួយក្រុងដាម៉ាស់។ ក្រៅពីនោះ ក្រុងវ៉ាស៊ីនតោនក៏ចង់ឃើញស៊ីរីមួយដែលគ្មានអាវុធប្រល័យលោកដូចជាអាវុធគីមីជាដើម ដែលទុកប្រើសម្រាប់សម្លាប់ជីវិតប្រជាជនខ្លួនឯងដែរ៕
Tag:
អាមេរិក
ស៊ីរី
© រក្សាសិទ្ធិដោយ thmeythmey.com
