Brexit៖ លោកស្រី ម៉េយ៍ កំណត់ពេលបោះឆ្នោតនៅសភាជាថ្មី ខណៈបក្សប្រឆាំងស្នើបោះឆ្នោតមិនទុកចិត្ត

អន្តរជាតិ

Brexit៖ លោកស្រី ម៉េយ៍ កំណត់ពេលបោះឆ្នោតនៅសភាជាថ្មី ខណៈបក្សប្រឆាំងស្នើបោះឆ្នោតមិនទុកចិត្ត

18, Dec 2018 , 7:39 pm

រូបភាព

ដោយ: តន ចាន់រិទ្ធារ៉ា

នាយករដ្ឋមន្ត្រីអង់គ្លេស ថេរ៉េសា ម៉េយ៍ បានកំណត់ពេលបោះឆ្នោតនៅសភាជាថ្មីលើកិច្ចព្រមព្រៀងចាកចេញពីសហភាពអឺរ៉ុប។ ការកំណត់ពេលនេះដែលនឹងរៀបចំនៅដើមឆ្នាំក្រោយ ធ្វើឡើងបន្ទាប់លោកស្រីបានលើកពេលកាលបរិច្ឆេទចាស់ព្រោះដឹងមុនថា មិនអាចទទួលបានការគាំទ្រឡើយ។ ការអូសបន្លាយពេលនេះ ធ្វើឲ្យបក្សប្រឆាំងស្នើបោះឆ្នោតមិនទុកចិត្តប្រឆាំងលោកស្រី ម៉េយ៍ ។ ថ្លែងក្នុងកិច្ចប្រជុំសភាថ្ងៃទី១៧ ខែធ្នូ លោកស្រី ម៉េយ៍ ក៏ប្រកាសដែរថា គ្មានទេប្រជាមតិលើកទីពីរនោះ។

សម្ពាធកាន់ធ្ងន់កំពុងធ្លាក់លើនាយករដ្ឋមន្ត្រីអង់គ្លេស ថេរ៉េសា ម៉េយ៍ ដែលពន្យារពេលបោះឆ្នោតលើកិច្ចព្រមព្រៀងចាកចេញពីសហភាពអឺរ៉ុបរហូតដល់ដើមឆ្នាំ២០១៩ ឯណោះ។ ក្នុងកិច្ចប្រជុំសភាថ្ងៃទី១៧ ខែធ្នូ លោកស្រី ម៉េយ៍ ប្រកាសថា ការបោះឆ្នោតនឹងធ្វើឡើងក្នុងសប្ដាហ៍ថ្ងៃទី១៤ ខែមករា ឆ្នាំ២០១៩ ។ ទាំងអ្នកនយោបាយបក្សប្រឆាំង ទាំងបក្សកាន់អំណាចរបស់លោកស្រី សុទ្ធតែមិនសប្បាយចិត្តនឹងការសម្រេចចិត្តនេះ។

លោកស្រី ម៉េយ៍ ក៏ទើបរួចផុតពីការបោះឆ្នោតមិនទុកចិត្តពីផ្ទៃក្នុងបក្សអភិរក្សកំពុងកាន់អំណាច តែបានបាត់បង់ការគាំទ្រច្រើនពីសំណាក់សមាជិកដែលប្រឆាំងកិច្ចព្រមព្រៀងរបស់រដ្ឋាភិបាលលោកស្រី និងសហភាពអឺរ៉ុប។ ក្នុងចំណោមសមាជិកសភារបស់បក្សនេះ លោកស្រីទទួលបានការគាំទ្រចំនួន២០០ សំឡេង និងសំឡេងប្រឆាំងចំនួន១១៧ ។

ការគ្រោងទុក អង់គ្លេសត្រូវចាកចេញពីអឺរ៉ុបនៅថ្ងៃទី២៩ ខែមីនា ឆ្នាំ២០១៩ ប៉ុន្តែមកទល់ពេលនេះ សភាអង់គ្លេសមិនទាន់ផ្ដល់ភ្លើងខៀវឲ្យកិច្ចព្រមព្រៀងលើការចាកចេញនេះនៅឡើយទេ។ នាយករដ្ឋមន្ត្រី ម៉េយ៍ កំពុងព្យាយាមបញ្ចុះបញ្ចូលសមាជិកឲ្យទទួលយកកិច្ចព្រមព្រៀងរបស់លោកស្រី ដោយលោកស្រីបានអះអាងជារឿយៗថា ជាកិច្ចព្រមព្រៀងល្អបំផុត។ ឯអឺរ៉ុបវិញក៏ព្រមានជាញឹកញយដែរថា គ្មានការចរចាម្ដងទៀតទេ។

គ្មានការប្រជាមតិលើកទីពីរ

ខណៈអនាគតនៃអង់គ្លេស និងសហភាពអឺរ៉ុបកំពុងស្ថិតលើផ្លូវទៅរកភាពមិនច្បាស់លាស់នោះ នាយករដ្ឋមន្ត្រី ម៉េយ៍ កំពុងប្រឈមមុខការទាមទារឲ្យរៀបចំប្រជាមតិលើកទីពីរ។ យ៉ាងណាមិញ លោកស្រីប្រឆាំងដាច់ខាតគំនិតនេះ ដោយបកស្រាយថា ដើរផ្ទុយពីប្រជាមតិឆ្នាំ២០១៦ និងធ្វើឲ្យជំនឿចិត្តសាធារណៈលើរដ្ឋាភិបាលធ្លាក់ចុះ។

ប្រមុខរដ្ឋាភិបាលរូបនេះបានប្រាប់សមាជិកសភាថា ប្រជាមតិទីពីរ នឹងប៉ះពាល់ទំនុកចិត្តប្រជាជនអង់គ្លេស ហើយក៏ធ្វើឲ្យសុចរឹតភាពរបស់នយោបាយអង់គ្លេសជាប់ឈ្មោះអាក្រក់រហូតដែរ។ បើតាមទីភ្នាក់ងារព័ត៌មាន AFP លោកស្រី ម៉េយ៍ បន្តថា បើមានប្រជាមិតទីពីរមែន អង់គ្លេសក៏មិនអាចទៅណាឆ្ងាយដែរ។

បក្សប្រឆាំងស្នើបោះឆ្នោតមិនទុកចិត្តប្រឆាំងលោកស្រី ម៉េយ៍

ក្នុងកិច្ចប្រជុំសភាដដែល មេដឹកនាំបក្សពលករ លោក Jeremy Corbyn បានស្នើបោះឆ្នោតបង្ហាញការមិនទុកចិត្តលើលោកស្រីនាយករដ្ឋមន្ត្រី ម៉េយ៍ ។ មេដឹកនាំបក្សប្រឆាំងរូបនេះនិយាយថា សភាលែងទុកចិត្តនាយករដ្ឋមន្ត្រីទៀតហើយ ព្រោះលោកស្រីមិនបានអនុញ្ញាតឲ្យសភាបោះឆ្នោត។ បើតាមលោក Corbyn ការបោះឆ្នោតមិនទុកចិត្តនេះ ជាផ្លូវតែមួយគត់ដែលលោកគិតថា អាចធ្វើឲ្យសភាអាចបោះឆ្នោតលើកិច្ចព្រមព្រៀងជាមួយអឺរ៉ុបនៅត្រឹមសប្ដាហ៍ក្រោយ មិនមែនរង់ចាំដល់ឆ្នាំក្រោយឡើយ។

យ៉ាងណាក្ដី ការបោះឆ្នោតតាមសំណើរបស់មេដឹកនាំប្រឆាំង នឹងមិនមានអំណាចចាប់ឲ្យអនុវត្តឡើយ បើទោះជាសមាជិកភាបោះគាំទ្រលើរបៀបវារៈសម្ដែងការមិនទុកចិត្តលើលោកស្រី ម៉េយ៍ ក្ដី។ មន្ត្រីសភាអង់គ្លេសអះអាងថា រដ្ឋាភិបាលនឹងសម្រេចចិត្តលើសំណើនេះ ប៉ុន្តែវាក៏សិទ្ធិរបស់សភាដែលអនុញ្ញាតឲ្យមានការបោះឆ្នោតតាមសំណើរបស់សមាជិក។

បើមានការបោះឆ្នោតមិនទុកចិត្ត ហើយសមាជិកសភាភាគច្រើនគាំទ្រនោះ វាក៏មានន័យថា ប្រជាប្រិយភាពរបស់លោកស្រី ម៉េយ៍ បានធ្លាក់ចុះក្នុងចំណោមសមាជិកសភា ហើយដែលនឹងជះឥទ្ធិពលដល់ការបោះឆ្នោតលើកិច្ចព្រមព្រៀងជាមួយអឺរ៉ុបដែរ។ ម្យ៉ាងទៀត វាក៏អាចឈានដល់ការបោះឆ្នោតមិនទុកចិត្តលើរដ្ឋាភិបាលទាំងមូល រួចឈានដល់ការបោះឆ្នោតទូទៅក៏ថាបាន៕