ជាតិ
សេដ្ឋកិច្ច
រូបពីរដ្ឋសភាកម្ពុជា
×![]()
ដោយ: ភួង វ៉ាន់ថា
ពាណិជ្ជកម្មរវាងកម្ពុជានិងបារាំង បានកើនដល់ជាង១ពាន់លានដុល្លារ។ នេះជាការលើកឡើងរបស់សម្តេច ហេង សំរិន ប្រធានរដ្ឋសភាកម្ពុជា ក្នុងជំនួបជាមួយលោក សីវ៉ង់ វ៉ាសឺម៉ង់ (Sylvain WASERMAN) អនុប្រធានសភាបារាំង ដែលកំពុងដឹកនាំគណៈប្រតិភូ មកបំពេញទស្សនកិច្ចនៅកម្ពុជា។ 
បើតាមសម្តេច ហេង សំរិន កម្ពុជា ជាប្រទេសនាំចេញអង្ករច្រើនក្នុងលំដាប់ទី២ ទៅកាន់ប្រទេសបារាំង ដែលមានប្រមាណជិត៨ម៉ឺនតោន។ ប្រធានរដ្ឋសភាកម្ពុជា បន្តថា ក្រៅពីទំហំទឹកប្រាក់វិនិយោគ ប្រទេសបារាំងក៏បានផ្តល់ជំនួយសំខាន់ៗដល់កម្ពុជា ពិសេសបារាំងបានដើរតួនាទីយ៉ាងសកម្មនៅក្នុងការស្វែងរកសន្តិភាពឲ្យកម្ពុជា រហូតបង្កើតបានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១។
ប្រធានរដ្ឋសភាកម្ពុជា លើកឡើងថា៖«រហូតមកដល់ពេលនេះ កម្ពុជា-បារាំង បានផ្លាស់ប្តូរដំណើរទស្សនកិច្ចពីគ្នាទៅវិញទៅមកទាំងក្នុងក្របខ័ណ្ឌនីតិប្រតិបត្តិនិងនីតិប្បញ្ញតិ»។
ចំណែក អនុប្រធានរដ្ឋសភាបារាំង កោតសរសើរលើកិច្ចសហប្រតិបត្តិការនិងចំណងមិត្តភាពរវាងប្រទេសកម្ពុជា-បារាំង ដោយភាពជិតស្និទ្ធ ជឿជាក់ និងបើកចំហ ដែលបានជំរុញឲ្យមានគម្រោងនិងជំនួយជាច្រើនរបស់បារាំងមកកាន់កម្ពុជា។ លោក ក៏បានវាយតម្លៃខ្ពស់លើកិច្ចសហប្រតិបត្តិការផ្នែកវប្បធម៌នៃប្រទេសទាំងពីរផងដែរ។ លោក និយាយថា៖«នៅកម្ពុជាមានពលរដ្ឋនិងមន្ត្រីរាជការជាច្រើន នៅតែប្រើប្រាស់ភាសាបារាំង»។
សម្តេច ហេង សំរិន ជំរុញអ្នកវិនិយោគ និងអ្នកទេសចរបារាំង មកវិនិយោគ និងទស្សនានៅកម្ពុជាឲ្យកាន់តែច្រើនបន្ថែមទៀត៕
Tag:
កម្ពុជា-បារាំង
ពាណិជ្ជកម្ម
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
