ជាតិ
សេដ្ឋកិច្ច
EU គ្រោងផ្តល់ជំនួយជាង១៣០លានដុល្លារដល់កម្ពុជា សម្រាប់អនុវត្តកម្មវិធីចំនួន៣ លោក អូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយលោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា ក្នុងជំនួបពិភាក្សាការងារ នៅទីសី្តការក្រសួង កាលពីថ្ងៃទី១៧ធ្នូ ឆ្នាំ២០១៨
× ភ្នំពេញ៖ សហភាពអឺរ៉ុប(EU) កំពុងរៀបចំផ្តល់ហិរញ្ញប្បទានឥតសំណង ចំនួន១១៥លានអឺរ៉ូ (ប្រមាណជាង១៣០លានដុលា្លរអាមេរិក) ដល់កម្ពុជាសម្រាប់បន្តអនុវត្តកម្មវិធីសំខាន់ៗចំនួន៣។ លោក ច្សច អេដហ្គា (George Edgar) ឯកអគ្គរដ្ឋទូតសហភាពអឺរ៉ុបប្រចាំកម្ពុជា បញ្ជាក់ប្រាប់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុដូច្នេះ ក្នុងជំនួបពិភាក្សាពីកម្មវិធីកិច្ចសហប្រតិបត្តិការកម្ពុជា-សហភាពអឺរ៉ុប កាលពីថ្ងៃទី១៧ ខែធ្នូ។
ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានឲ្យដឹងទៀត តាមសេចក្តីប្រកាសព័ត៌មានរបស់ក្រសួងសេដ្ឋកិច្ចកម្ពុជាថា ហិរញ្ញប្បទានឥតសំណងនេះ នឹងត្រូវអនុវត្តលើកម្មវិធីចំនួន៣ គឺទី១.កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ចំនួន២២លានអឺរ៉ូ (ជាង២៤លានដុល្លារអាមេរិក) បន្ថែម។ ទី២. កម្មវីធីជំរុញកំណើនសេដ្ឋកិច្ច វិស័យជលផលប្រកបដោយចីរភាព និងបរិយាប័ន្ន(ផ្នែកនេសាទ) ចំនួន៨៧លានអឺរ៉ូ (១០០លានដុល្លារអាមេរិក) និងទី៣. កម្មវីធីសម្ព័ន្ធភាពប្រែប្រួលអាកាសធាតុ ដំណាក់កាលទី៣ ចំនួន៦លានអឺរ៉ូ (ប្រមាណ៦,៨លានដុល្លារអាមេរិក)។
ក្នុងជំនួបនោះ អូន ព័ន្ធមុនីរ័ត្ន បានអរគុណការគាំទ្ររបស់សហភាពអឺរ៉ុប និងការពង្រឹងកិច្ចសហប្រតិបត្តិការជាមួយរាជរដ្ឋាភិបាលកម្ពុជាមួយកម្រិតទៀត ទន្ទឹមនឹងការប្តេជ្ញាធ្វើការជាមួយក្រសួងជំនាញដើម្បីពន្លឿនការចុះហត្ថលេខាលើកិច្ចព្រមព្រៀងផ្តល់ និងទទួលជំនួយនេះ ឲ្យទាន់ដើមឆ្នាំ២០១៩ ៕
Tag:
សេដ្ឋកិច្ច
ជំនួយ
នេសាទ
EU
© រក្សាសិទ្ធិដោយ thmeythmey.com