អន្តរជាតិ
ត្រាំ ចេញបញ្ជាឲ្យបង្កើតទីបញ្ជាការអវកាស ខណៈអង្គភាពទ័ពអវកាសមិនទាន់ចេញរូបរាង
× ប្រធានាធិបតីអាមេរិក ដូណាល់ ត្រាំ នៅថ្ងៃទី១៨ ខែធ្នូ បានចេញបញ្ជាឲ្យមន្ទីរបញ្ចកោណបង្កើតទីបញ្ជាការអវកាស (Space Command) ដើម្បីគ្រប់គ្រងប្រតិបត្តិការយោធានៅទីលម្ហ។ ទីបញ្ជាការថ្មីនេះ នឹងប្រមូលយកអង្គភាពយោធាទាំងអស់ដែលទទួលបន្ទុករាល់ប្រតិបត្តិការនៅអវកាស បង្កើតគោលនយោបាយ ក៏ដូចជាយុទ្ធសាស្ត្រផ្សេងៗដើម្បីការពារសន្តិសុខអាមេរិកក្នុងយុគសម័យថ្មី។ យ៉ាងណាមិញ អង្គភាពថ្មីនេះ ខុសពីកម្លាំងអវកាសដែលលោក ត្រាំ ចង់បាន។
ខ្ញុំបញ្ជាឲ្យបង្កើតទីបញ្ជាការអវកាស ធ្វើជាទីបញ្ជាការប្រយុទ្ធរួមតាមរដ្ឋធម្មនុញ្ញអាមេរិក។ នេះជាបញ្ជារបស់ប្រធានាធិបតី ដូណាល់ ត្រាំ ទៅកាន់រដ្ឋមន្ត្រីការពារជាតិ ជេម ម៉ាធីស នៅថ្ងៃទី១៨ ខែធ្នូ។ ទីបញ្ជាការថ្មីនេះ នឹងស្ថិតចំណុះក្រសួងការពារជាតិអាមេរិក និងទទួលខុសត្រូវរាល់ប្រតិបត្តិការយោធានៅទីអវកាស។ ទីបញ្ជាការដ្ឋានមួយ នឹងត្រូវបង្កើតឡើង ដោយមានទាហានថ្នាក់ឧត្តមសេនីយ៍ផ្កាយ៤ ជាមេបញ្ជាការ ហើយដែលត្រូវមានការយល់ព្រមពីព្រឹទ្ធសភា។
ជុំវិញដំណើរការ និងការប្រព្រឹត្តទៅរបស់ទីបញ្ជាការថ្មីនេះ អនុប្រធានាធិបតីអាមេរិក ម៉ៃ ផេន និយាយថា ទីបញ្ជាការអវកាសនឹងរួមបញ្ចូលសមត្ថភាពការពារអវកាសពីគ្រប់អង្គភាពមកពីស្ថាប័នយោធាទាំងអស់។ ថ្លែងពីមជ្ឈមណ្ឌលអវកាស Kennedy នៅថ្ងៃទី១៨ ខែធ្នូ លោកបន្តថា អង្គភាពថ្មីនេះនឹងអភិវឌ្ឍទ្រឹស្តីអវកាស កលយុទ្ធ បច្ចេកទេស និងដំណើរការនានា ដែលអនុញ្ញាតឲ្យយោធាអាមេរិកអាចការពារខ្លួនបាន។
ទីបញ្ជាការអវកាសនេះ នឹងក្លាយជាទីបញ្ជាការទី១១ ចំណុះមន្ទីរបញ្ចកោណ។ កន្លងមក អាមេរិកបានបែងចែកផែនទីពិភពលោកជាតំបន់ជាច្រើន និងមានទីបញ្ជាការប្រយុទ្ធមួយដើម្បីទទួលខុសត្រូវ។ នៅតំបន់មជ្ឈិមបូព៌ាមានទីបញ្ជាការកណ្ដាល នៅអាស៊ីប៉ាស៊ីហ្វិកមានទីបញ្ជាការឥណ្ឌូ-ប៉ាស៊ីហ្វិក នៅអាហ្វ្រិកមានទីបញ្ជាការអាមេរិក-អាហ្វ្រិកជាដើម។
យ៉ាងណាមិញ ទីបញ្ជាការអវកាស មិនមែនដូចអង្គភាពទ័ពអវកាសដែលលោក ត្រាំ ប្រកាសបង្កើតឡើយ។ កាលពីខែមិថុនា លោក ត្រាំ បានបញ្ជាឲ្យបង្កើតអង្គភាពកងទ័ពថ្មីទី៦ ដែលមានឋានៈស្មើកងទ័ពជើងគោក ជើងអាកាស ជើងទឹក ទ័ពម៉ារីន និងកងឆ្មាំការពារឆ្នេរដែរ។ ប្រធានាធិបតីអាមេរិករូបនេះអះអាងថា អង្គភាពទ័ពអវកាសមួយនេះនឹងដោះស្រាយបញ្ហានៅអវកាស និងពង្រឹងអំណាចអាមេរិកនៅទីលម្ហដែរ។
យ៉ាងណាក្ដី គម្រោងនេះមិនទាន់ទទួលបានភ្លើងខៀវពីស្ថាប័ននីតិបញ្ញត្តិអាមេរិកនៅឡើយទេ។ គំនិតនេះរងការសង្ស័យពីសភា និងមន្ត្រីការពារជាតិអាមេរិកមួយចំនួន ព្រោះត្រូវចំណាយច្រើន និងបង្កើតការិយាធិបតេយ្យកាន់តែច្រើនដែរ។ ម្យ៉ាងទៀត វាក៏នឹងបង្កើតជាទំនាស់ក្នុងមន្ទីរបញ្ចកោណដែរ ពិសេសជាមួយទ័ពអាកាសអាមេរិក ដែលកំពុងទទួលខុសត្រូវប្រតិបត្តិការលម្ហអាកាសស្ទើរទាំងស្រុងទៅហើយនោះ៕
Tag:
អាមេរិក
ដូណាល់ ត្រាំ
អវកាស
© រក្សាសិទ្ធិដោយ thmeythmey.com