អន្តរជាតិ
កាណាដាថា ចិនចាប់ជនជាតិខ្លួនទី៣ តែចិនថា មិនដឹង នាយករដ្ឋមន្រ្តីកាណាដា ចាស្ទីន ទ្រូដូ (រូបភាព Canadian Press)
× មន្ត្រីកាណាដា នៅថ្ងៃទី១៩ ខែធ្នូ និយាយថា ជនជាតិកាណាដាម្នាក់ទៀត ត្រូវបានអាជ្ញាធរចិនចាប់ខ្លួន។ ជាមួយការចាប់ខ្លួននេះ ចំនួនជនជាតិកាណាដាត្រូវឃាត់ខ្លួនកើនដល់៣នាក់ហើយ បន្ទាប់ពីការចាប់ខ្លួនមន្ត្រីជាន់ខ្ពស់ក្រុមហ៊ុនបច្ចេកវិទ្យាចិន Huawei ដែលបច្ចុប្បន្នត្រូវបានដោះលែងឲ្យនៅក្រៅឃុំបណ្ដោះអាសន្ន។ យ៉ាងណាមិញ អ្នកនាំពាក្យក្រសួងការបរទេសចិនអះអាងថា មិនដឹងពីការចាប់ខ្លួនចុងក្រោយនេះឡើយ។
ជម្លោះការទូតរវាងក្រុងប៉េកាំង និងក្រុងអូតាវ៉ា នៅមិនទាន់ចប់នៅឡើយទេ។ អ្នកនាំពាក្យមន្ត្រីក្រសួងកិច្ចការសាកលកាណាដា Maegan Graveline បានប្រាប់ទីភ្នាក់ងារព័ត៌មាន AFP ថា ជនជាតិកាណាដា ត្រូវបានឃុំខ្លួននៅចិន ប៉ុន្តែមិនបានបញ្ជាក់ឲ្យច្បាស់ពីកំហុសរបស់ជននោះឡើយ។ ប៉ុន្តែប្រភពមន្ត្រីរដ្ឋាភិបាលកាណាដាជឿថា ករណីចុងក្រោយនេះមិនពាក់ព័ន្ធករណីជនជាតិកាណាដាពីរនាក់ទៀត ដែលត្រូវបានចាប់ខ្លួនឡើយ។
ជុំវិញករណីទី៣ នេះ អ្នកនាំពាក្យក្រសួងការបរទេសចិន Hua Chunying និយាយថា លោកស្រីមិនដឹងពីការចាប់ខ្លួននេះទេ។ ក្នុងសន្និសីទសារព័ត៌មានថ្ងៃទី១៩ ខែធ្នូ អ្នកនាំពាក្យរូបនេះបានត្រឹមលើកឡើងពីករណីលោក Michael Kovrig និងលោក Michael Spavor ដែលចាប់ខ្លួនក្រោមការសង្ស័យថា ធ្វើសកម្មភាពប៉ះពាល់សន្តិសុខជាតិ។
សារព័ត៌មានកាណាដា CBC ផ្សាយថា ជនជាតិកាណាដាទី៣ មានឈ្មោះថា Sarah McIver ។ យ៉ាងណាមិញ នាយករដ្ឋមន្ត្រីកាណាដា ចាស្ទីន ទ្រូដូ អះអាងថា ករណីនេះ មិនទាក់ទងករណីពីរលើកមុនឡើយ។ នាសន្និសីទសារព័ត៌មានចុងឆ្នាំ លោក ទ្រូដូ លើកឡើងថា ការចាប់ខ្លួនពីរលើកមុន ជាករណីធ្ងន់ធ្ងរទាក់ទងសន្តិសុខជាតិ និងចារកម្ម តែករណីចុងក្រោយនេះ មិនមានពាក់ព័ន្ធការចោទប្រកាន់អ្វីធ្ងន់ធ្ងរឡើយ។
ខណៈមានការចាប់ខ្លួនជនជាតិកាណាដាជាបន្តបន្ទាប់បែបនេះ លោកនាយករដ្ឋមន្ត្រីកាណាដាក៏ត្រូវបានសួរថា ដល់ពេលទាក់ទងមេដឹកនាំចិនដោយផ្ទាល់ឬនៅដើម្បីស្វែងរកការដោះលែង Kovrig និង Spavor ។ លោក ទ្រូដូ ឆ្លើយវិញថា បីឆ្នាំជានាយករដ្ឋមន្ត្រី សម្រាប់ដោះស្រាយបញ្ហាដែលទាក់ទងកុងស៊ុលឲ្យបានជោគជ័យ បញ្ហាមួយត្រូវមានដំណោះស្រាយមួយ ហើយការលើកឡើងបញ្ហាជាសាធារណៈ អាចដោះស្រាយរយៈពេលខ្លី តែមិនប្រាកដថា អាចមានការដោះលែងជនជាតិកាណាដាឡើយ។
រដ្ឋាភិបាលក្រុងអូតាវ៉ា រងការរិះគន់ខ្លាំងចំពោះការរក្សាជំហរទន់ភ្លន់ចំពោះករណីជនជាតិកាណាដាដែលត្រូវបានអាជ្ញាធរចិនចាប់ខ្លួននោះ។ យ៉ាងណា លោក ទ្រូដូ និយាយថា លោកបានទាក់ទងទៅចិនដើម្បីស្វែងរកព័ត៌មានឲ្យបានច្រើនពីការចាប់ខ្លួននេះ៕
© រក្សាសិទ្ធិដោយ thmeythmey.com