ប្រធានាធិបតីពូទីន ៖ លោកខាងលិចបង្ករឿងដាក់រុស្ស៊ី ព្រោះរុស្ស៊ីជាមហាអំណាចរះត្រដែត

អន្តរជាតិ

ប្រធានាធិបតីពូទីន ៖ លោកខាងលិចបង្ករឿងដាក់រុស្ស៊ី ព្រោះរុស្ស៊ីជាមហាអំណាចរះត្រដែត

21, Dec 2018 , 5:19 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីរុស្ស៊ី វ្ល៉ាឌីមៀ ពូទីន បាននិយាយរិះគន់លោកខាងលិចដែលព្យាយាមដាក់សម្ពាធ និងបង្កើតរឿងចោទរុស្ស៊ីមិនចេះចប់មិនចេះហើយ។ នាសន្និសីទសារព័ត៌មានប្រចាំឆ្នាំ លោក ពូទីន អះអាងថា អ្វីដែលបស្ចិមលោកបានធ្វើ គឺជាការព្យាយាមទប់ស្កាត់ការងើបឡើងរបស់រុស្ស៊ីជាមហាអំណាចពិភពលោក។ យ៉ាងណាមិញ សេដ្ឋកិច្ចរបស់រុស្ស៊ីនៅតែអាចស៊ូទ្រាំនឹងទណ្ឌកម្មរបស់លោកខាងលិច ទោះមានផលអវិជ្ជមានខ្លះក្ដី។

ទំនាក់ទំនងរវាងរុស្ស៊ី និងលោកខាងលិច គឺជាប្រធានបទសំខាន់មួយក្នុងសន្និសីទសារព័ត៌មានប្រចាំរបស់ប្រធានាធិបតីរុស្ស៊ី វ៉ា្លឌីមៀ ពូទីន នៅថ្ងៃទី២០ ខែធ្នូ។ ទំនាក់ទំនងរុស្ស៊ី និងលោកខាងលិច បានធ្លាក់ចុះខ្លាំង ដោយរុស្ស៊ីរងការចោទថា បានលូកលាន់កិច្ចការផ្ទៃក្នុងប្រទេសជាច្រើន ក៏ដូចជាធ្វើសកម្មភាពចារកម្មដែរ ហើយនេះក៏នាំឲ្យមហាអំណាចមួយរងទណ្ឌកម្មជាច្រើនដែរពិសេសពីសំណាក់អាមេរិក ទោះរុស្ស៊ីប្រឹងបដិសេធក្ដី។

ឆ្លើយនឹងសំណួរពីឥទ្ធិពលរបស់ទណ្ឌកម្មរបស់បស្ចិមប្រទេស លោក ពូទីន និយាយថា បញ្ហានេះទាក់ទងនឹងកំណើនឥទ្ធិពលរបស់រុស្ស៊ី។ បើតាមទីភ្នាក់ងារព័ត៌មាន AFP មេដឹកនាំរុស្ស៊ីរូបនេះពន្យល់ថា ប្រទេសមហាអំណាចតែងមានគេធ្វើឲ្យអំពល់ទុក្ខរហូតទាល់តែចុះខ្សោយវិញ។

បន្ថែមពីនេះ លោកប្រធានាធិបតីរុស្ស៊ីក៏ទាត់ចោលការចោទប្រកាន់របស់លោកខាងលិចជុំវិញសកម្មភាពចារកម្មដែរ។ លោក ពូទីន បានលើកយកករណីប៉ុនប៉ងធ្វើឃាតលោក Sergey Skripal ដែលអង់គ្លេសចោទរុស្ស៊ីថា នៅពីក្រោយខ្នងតែម្ដង ខណៈអាមេរិកឯណោះដែលជឿសម្ដីអង់គ្លេសនោះ ក៏ដាក់ទណ្ឌកម្មលើរុស្ស៊ីមួយជាន់ទៀត។ លោក ពូទីន អះអាងថា បើគ្មានករណី Skripal ក៏លោកខាងលិចបង្កើតរឿងផ្សេងដែរ។

សំណុំរឿងចារកិច្ចរុស្ស៊ីដែលធ្វើការឲ្យអង់គ្លេសរូបនេះ ធ្វើឲ្យទំនាក់ទំនងអង់គ្លេស និងរុស្ស៊ីធ្លាក់ដល់កម្រិតមួយដែលលោក ពូទីន ហៅថា ដល់ចំណុចទ័លច្រក។ សម្រាប់ប្រធានាធិបតីរុស្ស៊ី ការណ៍ដែលអង់គ្លេសបង្ករឿងឃាតកម្មនេះ មានគោលដៅតែមួយគត់ គឺទប់ស្កាត់ការអភិវឌ្ឍរបស់រុស្ស៊ី និងបំបាក់មុខរុស្ស៊ីតែម្ដង។

ក្នុងសន្និសីទសារព័ត៌មានដដែលនេះ លោក ពូទីន បាននិយាយដល់ប្រធានបទជាច្រើនតាំងពីរឿងផ្ទាល់ខ្លួន នយោបាយ រហូតដល់បញ្ហាសេដ្ឋកិច្ចជាដើម។ គោលដៅរបស់លោក គឺធ្វើយ៉ាងណាដឹកនាំរុស្ស៊ីឲ្យក្លាយជាមហាអំណាចសេដ្ឋកិច្ចទី៥ ។ តាមទិន្នន័យរបស់អង្គការមូលនិធិរូបិយវត្ថុអន្តរជាតិ សេដ្ឋកិច្ចរុស្ស៊ីកំពុងស្ថិតក្នុងលំដាប់ទី១២ ខណៈអាមេរិកស្ថិតនៅលំដាប់ទី១ តាមពីក្រោយដោយចិន ជប៉ុន អាល្លឺម៉ង់ និងចក្រភពអង់គ្លេស៕