ជាតិ
រដ្ឋាភិបាលកំពុងរៀបចំវត្តអារាម ឲ្យក្លាយជារមណីយដ្ឋានទេសចរណ៍
× រដ្ឋាភិបាលកម្ពុជាកំពុងជំរុញឲ្យវត្តអារាមទាំងអស់ ក្លាយទៅជារមណីយដ្ឋានទេសចរណ៍ ដើម្បីទាក់ទាញភ្ញៀវទេសចរជាតិ អន្តរជាតិ មកទស្សនាកម្សាន្ត ដែលធ្វើឲ្យប្រជាពលរដ្ឋអាចរកចំណូលបាន តាមរយៈពុទ្ធសាសនា។ នេះជាការលើកឡើងរបស់លោក ហ៊ឹម ឆែម រដ្ឋមន្ត្រី ក្រសួងធម្មការ និងសាសនា ក្នុងពិធីអនុសំវច្ចរមហាសន្និបាតមន្ត្រីសង្ឃទូទាំងប្រទេស លើកទី២៧ នាព្រឹកថ្ងៃទី២១ ខែ ធ្នូ ឆ្នាំ២០១៨នេះ។
លោក ហ៊ឹម ឆែម និយាយថា៖« ក្រសួងបានកំពុងជំរុញឲ្យវត្តអារាមនៅទូទាំងប្រទេស ចូលរួមជាមួយរាជរដ្ឋាភិបាល ក្នុងការរៀបចំទីវត្តអារាមឲ្យក្លាយទៅជាតំបន់មរណីយដ្ឋានទេសចរណ៍ ដោយមានការគ្រប់គ្រងល្អ មានបរិស្ថានល្អ ដើម្បីទាក់ទាញភ្ញៀវទេសចរជាតិ អន្តរជាតិ ចូលទស្សនា សិក្សា ឈ្វេងយល់ពីវប្បធម៌ ប្រពៃណី និងបង្កើនចំណូលថវិកាជាតិ ក្នុងទិសដៅកាត់បន្ថយភាពក្រីក្រ តាមរយៈព្រះពុទ្ធសាសនា»។
ព្រះពុទ្ធសាសនា បានដើរតួនាទីយ៉ាងសំខាន់ក្នុងសង្គមកម្ពុជា ផ្នែកអប់រំ សីលធម៌ សុជីវធម៌ ដល់ប្រជាជនកម្ពុជា និងរួមចំណែកអភិវឌ្ឍន៍វិស័យហេដ្ឋារចនាសម្ព័ន្ធសង្គម ដូចជា ស្ពាន ផ្លូវថ្នល់ សាលារៀន មន្ទីរពេទ្យជាច្រើនផងដែរ។ នេះបើតាមលោករដ្ឋមន្ត្រីក្រសួងធម្មការដដែល។
សម្ដេច ហេង សំរិន ប្រធានរដ្ឋសភា បានសំណូមពរដល់ពុទ្ធសាសនិកជនទាំងអស់ មេត្តារួមគ្នាប្រតិបត្តិតាមឱវាទព្រះសម្មាសម្ពុទ្ធបរមគ្រូនៃយើង ឲ្យបានខ្ជាប់ខ្ជួន តាមតួនាទី និងភារកិច្ចរបស់ខ្លួនជាព្រះសង្ឃ ឬជាឧបាក ឧបាសិកា ដើម្បីទ្រង់ទ្រង់ព្រះពុទ្ធសាសនាយើង ឲ្យកាន់តែរីកចម្រើនរហូតដល់ ៥.០០០វស្សា ព្រោះថាព្រះពុទ្ធសាសនាយើងរីកចម្រើន ឬចុះអន់ថយ ដោយសារពុទ្ធបរិស័ទ្ធទាំង៤ជំពួកគឺ ភិក្ខុ ភិក្ខុនី ឧបាសក និងឧបាសិកា៕
Tag:
រមណីយដ្ឋានទេសចរណ៍
វត្តអារាម
ជាតិ
© រក្សាសិទ្ធិដោយ thmeythmey.com