កីឡាជាតិ
ជាតិ
NOCC នឹងរៀបចំកម្មវិធីជិះកង់កម្សាន្ត ដើម្បីអបអរពិធីសម្ពោធស្តូបវិមានឈ្នះៗ
× គណៈកម្មាធិការជាតិអូឡាំពិកកម្ពុជា(NOCC) នឹងរៀបចំកម្មវិធីជិះកង់កម្សាន្តលក្ខណៈមហាជន ដើម្បីអបអរពិធីសម្ពោធដាក់ឲ្យប្រើប្រាស់វិមានឈ្នះៗ និងខួបលើកទី២០នៃនយោបាយឈ្នះៗរបស់សម្តេច ហ៊ុន សែន។ កម្មវិធីនេះរៀបចំនៅថ្ងៃទី២៨ ធ្នូ ឆ្នាំ២០១៨ ដោយចេញដំណើរពីពហុកីឡដ្ឋានជាតិទៅវិមានឈ្នះៗក្នុងតំបន់អភិវឌ្ឍន៍របស់អ្នកឧកញ៉ា លី យ៉ុងផាត់។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា អំពាវនាវឲ្យមហាជនចូលរួមជិះកង់កម្សាន្តឲ្យបានច្រើនកុះករនៅថ្ងៃទី២៨ ខែធ្នូ ឆ្នាំ២០១៨។ ក្រៅពីផ្តល់ការកម្សាន្ត និងសុខភាពដល់មហាជន ការជិះកង់កម្សាន្តនេះ ធ្វើឡើងដើម្បីអបអរពិធីសម្ពោធដាក់ឲ្យប្រើប្រាស់ស្តូបវិមានឈ្នះៗ និងខួបលើកទី២០នៃនយោបាយឈ្នះៗរបស់ស្តេចនាយករដ្ឋមន្ត្រី ហ៊ុន សែន ដែលរៀបចំនៅថ្ងៃទី២៩ ខែធ្នូ ឆ្នាំ២០១៨ នៅតំបន់អភិវឌ្ឍន៍របស់អ្នកឧកញ៉ា លី យ៉ុងផាត់ ស្ថិតខណ្ឌជ្រោយចង្វារ ភ្នំពេញ។
ការជិះកង់កម្សាន្តនេះ មានចម្ងាយ២០គីឡូម៉ែត្រ ដោយចេញដំណើរពីពហុកីឡដ្ឋានជាតិឆ្ពោះទៅវិមានឈ្នះៗ។ អ្នកចូលរួមត្រូវមកជួបជុំគ្នានៅពហុកីឡដ្ឋានជាតិនៅម៉ោង៥:១៥នាទី និងចេញដំណើរនៅម៉ោង៦ព្រឹក។ គួរបញ្ជាក់ថា អ្នកចូលរួមអាចប្រើប្រាស់កង់គ្រប់ប្រភេទក្នុងការចូលរួម។
ស្តូបវិមានឈ្នះៗ បានចាប់ផ្តើមសាងសង់ក្នុងអំឡុងខែកុម្ភៈ ឆ្នាំ២០១៦ លាតសន្ធឹងលើទំហំដី៨ហិកតា ដែលជាសម្បទានរបស់អ្នកឧកញ៉ា លី យ៉ុតផាត់។ ការកសាងវិមានឡើង គឺដើម្បីរំឭកគុណូបការៈរបស់បុព្វបុរសខ្មែរគ្រប់សម័យ ដែលបានលះបង់ជីវិត ក្នុងបុព្វហេតុជាតិមាតុភូមិ។ ហើយវាជានិម្មិតរូបនៃសុខសន្តិភាពក្រោយបញ្ចប់សង្គ្រាមស៊ីវិលដ៏រ៉ាំរ៉ៃ ជាច្រើនទសវត្សរ៍កន្លងមក៕
Tag:
ប្រណាំងកង់
វ៉ាត់ ចំរើន
វិមានឈ្នះឈ្នះ
© រក្សាសិទ្ធិដោយ thmeythmey.com