ជាតិ
មន្ទីរពេទ្យកុមារអង្គររៀបចំរាត្រីសប្បុរសធម៌រៃអង្គាសថវិកាជួយទ្រទ្រង់ការព្យាបាលកុមារ
× សៀមរាប៖ មន្ទីរពេទ្យកុមារអង្គរ គឺជាមន្ទីរពេទ្យដែលព្យាបាលកុមារក្រីក្រដោយគិតថ្លៃចាប់ពីឆ្នាំ ១៩៩៩មក។ ដើម្បីប្រមូលមូលនិធិទ្រទ្រង់ការព្យាបាលរបស់ខ្លួន នៅចុងឆ្នាំ ២០១៨នេះ មន្ទីរពេទ្យនឹងរៀបចំកម្មវិធីរាត្រីសប្បុរសធម៌មួយ រៃអង្គាសថវិកាដើម្បីទ្រទ្រង់ការចំណាយនៅក្នុងមន្ទីរពេទ្យ។
លោកស្រី ស៊ិនកេត អារុណ ប្រធានផ្នែកទំនាក់ទំនងសាធារណៈនៃមន្ទីរពេទ្យកុមារអង្គរ បានឱ្យដឹងថា រាត្រីសប្បុរសធម៌របស់មន្ទីរពេទ្យកុមារអង្គរដែលគ្រោងធ្វើនៅថ្ងៃទី២៨ ធ្នូ គឺបានកិច្ចសហការជាមួយក្លិបប្រតិបត្តិករទេសចរណ៍ខេត្តសៀមរាប និងធ្វើឡើងនៅសណ្ឋាគារ មេម៉រ ផាឡេស។ តាមការបញ្ជាក់របស់លោកស្រី អារុណ កម្មវិធីនេះធ្វើឡើងក្នុងបំណងរៃអង្គាសថវិកាដើម្បីបង្ក្រប់ការចំណាយរបស់មន្ទីរពេទ្យក្នុងឆ្នាំ ២០១៨។ ការចំណាយប្រចាំឆ្នាំរបស់មន្ទីរពេទ្យកុមារអង្គរ មានចំនួន ៦,៥លានដុល្លារ ហើយនៅឆ្នាំ ២០១៨នេះ ថវិការៃអង្គាសពីខាងស្រុកមានចំនួនតិចជាងការរំពឹង។ យ៉ាងណា លោកស្រី អារុណ រំពឹងថា ថវិកាពីកម្មវិធីខាងលើនេះ នឹងអាចបង្ក្រប់ការចំណាយក្នុងឆ្នាំ ២០១៨នេះជាក់ជាមិនខាន។
នេះជាលើកទី៣ហើយ ដែលមន្ទីរពេទ្យកុមារអង្គរ សហការជាមួយក្លិបប្រតិបត្តិករទេសចរណ៍ខេត្តសៀមរាប ការរៀបចំរាត្រីសប្បុរសធម៌នេះ ដែលលើកនេះ អ្នករៀបចំរំពឹងថានឹងមានអ្នកចូលរួមចន្លោះពី ២០០ទៅ២៥០នាក់។ អ្នកចូលរួមត្រូវទិញសំបុត្រចូលរួមចូលវិភាគទានចំនួន ៤៥ដុល្លារ។ ក្រៅពីលក់សំបុត្រ ខាងមន្ទីរពេទ្យក៏បាននិងកំពុងរកអ្នកឧបត្ថម្ភក្នុងកម្មវិធីនេះដែរ។ នេះជាការបញ្ជាក់របស់លោកស្រី អារុណ។
គួរបញ្ជាក់ថា មានកុមារក្រីក្រចន្លោះពី ៥០០ទៅ ៦០០នាក់ ដែលមកទទួលការព្យាបាលនៅមន្ទីរពេទ្យកុមារអង្គរជារៀងរាល់ថ្ងៃ។ នៅអំឡុងខែ តុលាកន្លងទៅ មន្ទីរពេទ្យនេះបានប្រកាសពីកង្វះថវិកាប្រចាំឆ្នាំ ហើយត្រៀមកាត់បន្ថយគម្រោងមួយចំនួនសម្រាប់ព្យាបាលកុមារផងដែរ ប្រសិនបើខ្លួនមិនអាចរកថវិកាគ្រប់តាមចំនួនដែលត្រូវចំណាយនៅឆ្នាំបន្ទាប់។ យ៉ាងណា ដោយសារមានការចូលរួមពីពលរដ្ឋក្នុងស្រុកច្រើន ថវិកាដែលខ្វះខាតត្រូវបានបង្ក្រប់ ហើយផែនការចំណាយផ្សេងៗនៅឆ្នាំក្រោយ ក៏មិនបានកែប្រែដែរ៕
© រក្សាសិទ្ធិដោយ thmeythmey.com