លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានអាជ្ញាធរជាតិដោះស្រាយទំនាស់ដីធ្លី បានប្រាប់មន្ត្រីក្រសួងទាំងអស់ ត្រូវតែដោះស្រាយវិវាទដីធ្លីជូនប្រជាពលរដ្ឋឲ្យបានទាន់ពេលវេលា និងយុត្តិធម៌ ដើម្បីធានាបាននូវយុត្តិធម៌សង្គម។ លោក ជា សុផារ៉ា កំណត់ទិសដៅ៣ឆ្នាំទៀត ក្នុងការដោះស្រាយបញ្ហាដីធ្លីរបស់ពលរដ្ឋទូទាំងប្រទេស ឲ្យចប់សព្វគ្រប់។ រដ្ឋមន្ត្រីរូបនេះ បានផ្ដាំមន្ត្រីខ្លួនថា កេរ្តិ៍ឈ្មោះ និងកិត្តិយស កើតចេញពីការដោះស្រាយបញ្ហាពលរដ្ឋ ហើយមិនចាំបាច់ផ្សាយតាមទូរទស្សន៍ឡើយ។
«បើ(អស់លោក)ប្រឹង ខ្ញុំថាតែ២ឆ្នាំទេ អាចដោះស្រាយបញ្ហាដីធ្លីបានហើយ វាមិនដល់៣ឆ្នាំនោះទេ »។ នេះជាការលើកឡើងរបស់លោក ជា សុផារ៉ា ដែលជំរុញឲ្យមន្ត្រីជាង៣ពាន់នាក់របស់ក្រសួង ត្រូវតែគោរពវិជ្ជាជីវៈការងារ និងប្រកាន់ខ្ជាប់នូវឧត្តមគតិរបស់ខ្លួន ក្នុងការដោះស្រាយវិវាទដីធ្លីជូនពលរដ្ឋឲ្យបានចប់ ដោយមិនត្រូវឲ្យប្រជាពលរដ្ឋ បន្តរងទុក្ខលើបញ្ហាដីធ្លីតទៅទៀតទេ។
ក្រៅពីដាក់កំហិតដល់មន្ត្រីឲ្យបំពេញការងារឲ្យបានត្រឹមត្រូវនេះ រដ្ឋមន្ត្រីក្រសួងរៀបចំដែនដី ក៏បានរិះគន់ចំៗថា បញ្ហាដីធ្លីពលរដ្ឋកន្លងមក គឺបណ្ដាលមកពីភាពអសកម្មរបស់មន្ត្រី និងការដោះស្រាយដោយអយុត្តិធម៌លើករណីទំនាស់ដីធ្លីដល់ប្រជាពលរដ្ឋ។ និយាយបែបនេះហើយលោក ជា សុផារ៉ា ក៏បានផ្ដាំឲ្យមន្ត្រីខ្លួន ស្ដារកេរ្តិ៍ឈ្មោះ និងកិត្តិយស តាមរយៈការបំពេញការងារឲ្យបានល្អជូនពលរដ្ឋ ល្អជាងការបង្ហាញមុខតាមតែកញ្ចក់ទូរទស្សន៍ ។
សូមស្តាប់ប្រសាសន៍លោក ជា សុផារ៉ា៖
ថ្លែងក្នុងពិធីសន្និបាតបូកសរុបការងារឆ្នាំ២០១៨ និងលើកទិសដៅថ្មីឆ្នាំ២០១៩របស់ក្រសួង កាលពីថ្ងៃទី២៤ ខែធ្នូ រដ្ឋមន្ត្រីក្រសួងរៀបចំដែនដីរូបនេះ បាននិយាយដូច្នេះថា៖«បំណងប្រាថ្នា និងការទន្ទឹងរង់ចាំរបស់ប្រជាពលរដ្ឋ នៅក្នុងការដោះស្រាយវិវាទនេះ សូមឲ្យលោក-លោកស្រី មេត្តាគិតថា រូបគាត់ដែលមានបញ្ហា សូមឲ្យយើងនេះ បានឆ្លើយតបជាមួយប្រជាពលរដ្ឋទាន់ពេលវេលា នូវអ្វីដែលប្រជាពលរដ្ឋរបស់យើងចង់បាន។ នេះគឺជាបំណងប្រាថ្នារបស់យើង នេះជាសមត្ថភាព នេះជាកិត្តិយសរបស់យើង បើដោះស្រាយវិវាទនេះជូនពួកគាត់បាន គឺគាត់សប្បាយចិត្តណាស់។ កេរ្តិ៍ឈ្មោះ កិត្តិយស និងសមត្ថភាពក្នុងការផ្ដល់សេវាជូនប្រជាពលរដ្ឋ អត់ចាំបាច់ផ្សាយនៅទូរទស្សន៍ CTN ទេ។ អត់ចាំបាច់ទេ។ ឲ្យតែយើងបានដោះស្រាយ(បញ្ហា)ជូនពួកគាត់ គឺល្បីរន្ទឺ»។
ដើម្បីបំពេញការងារនេះឲ្យបានល្អ លោក ជា សុផារ៉ា ស្នើឲ្យមន្ត្រីថ្នាក់ខេត្តទាំងអស់ ធ្វើបច្ចុប្បន្នភាពពីបញ្ហាទំនាស់ដីធ្លីឲ្យបានញឹកញាប់ ដើម្បីដោះស្រាយវិវាទដីធ្លីទាំងនោះ ឲ្យទាន់ពេលវេលា ពោលគឺមិនត្រូវឲ្យប្រជាពលរដ្ឋរត់ចុះរត់ឡើងនោះទេ។ «មើលអង្គហេតុឲ្យច្បាស់ ដីរបស់គាត់ ហេតុអ្វីថាជាដីរបស់អ្នកនោះ។ ហើយអ្នកនោះអត់មានដីទេ ចុះហេតុអ្វីបានជាយើងធ្វើសេចក្ដីសន្តិដ្ឋាន នៅក្នុងអង្គហេតុ ថាអ្នកនោះមានដីទៅវិញ នេះជាអំពើអយុត្តិធម៌ មួយដែលប្រជាពលរដ្ឋ ទាំងយើង ទាំងគេ ចងចាំតត្រកូល មិនអាចបំភ្លេចបានទេ នូវអំពើអយុតិធម៌របស់យើងចំពោះប្រជាពលរដ្ឋ។ ខ្ញុំសុំឲ្យមន្ត្រីជាង៣ពាន់នាក់នៅក្នុងក្រសួងដែនដីនគរូបនីយកម្ម និងសំណង់ ចាត់ទុកថា មិនចាំបាច់ទៅហែរកឋិន ដាក់បិណ្ឌដាក់បាត្រអីនោះទេ ព្រោះខាងសាសនាគឺត្រូវអ៊ីចឹងហើយ ខ្ញុំមិនបដិសេធនោះទេ ប៉ុន្តែដែលបានបុណ្យជាងគេនោះ គឺអំពើល្អរបស់យើង ដែលតាមរយៈឧត្តគតិ និងគោរពវិជ្ជាជីវៈ សម្រាប់ឲ្យបងប្អូនប្រជាពលរដ្ឋដែលរងគ្រោះ»។ នេះជាការជំរុញរបស់រដ្ឋមន្ត្រីក្រសួងដែនដី។
បច្ចុប្បន្ននេះក្រសួងដែនដី បានទទួលពាក្យបណ្តឹងចំនួន ៨,៣២២ករណី ដោយក្នុងនោះក្រសួងបានដោះស្រាយបពា្ចប់ចំនួន ៣,៩៣៨ករណី ដែលមាន ២០,៩៣៧គ្រួសារ ស្មើនឹងផ្ទៃដីចំនួន ៦,៣០៤.៨៤ហិកតា។ ជាមួយគ្នានេះក្រសួងក៏បានច្រានចោលពាក្យបណ្តឹង ដែលខុសពីការស៊ើបអង្កេតរបស់សមត្ថកិច្ចចំនួន ២,៦៨៩ករណី, សុំដកពាក្យបណ្តឹងចំនួន ៨៦៩ករណី និងកំពុងដោះស្រាយចំនួន ៨២៦ករណី។
ក្រៅពីនេះក៏មានលទ្ធផលក្រុមដោះស្រាយវិវាទដីធ្លីចល័ត ចំនួន៣,២៦០ករណី ដែលក្នុងនោះមានការដោះស្រាយបញ្ចប់ចំនួន ១,៦៨៧ករណី, ច្រានចោលចំនួន ៨៨១ករណី, ដកពាក្យចំនួន ៤២១ករណី និងបញ្ជូនទៅគណៈកម្មការសុរិយោដីថ្នាក់ខេត្តចំនួន ២៧១ករណី។ នេះបើយោងតាមរបាយការណ៍បូកសរុបការងារឆ្នាំ២០១៨ និងលើកទិសដៅថ្មីឆ្នាំ២០១៩របស់ក្រសួង។
របាយការណ៍បានបង្ហាញទៀតថា ក្រសួងបានធ្វើការសម្រុះសម្រួលដោះស្រាយវិវាទរវាងប្រជាពលរដ្ឋ និងក្រុមហ៊ុនទទួលបានសិទ្ធិសម្បទានដីសេដ្ឋកិច្ចដំណាំអំពៅ ផលិតស្ករនាំចេញ ក្នុងខេត្តកោះកុង ៩៦០គ្រួសារ, ព្រះវិហារ ៥៧សលាកបត្រ, ឧត្តរមានជ័យ ៤១២គ្រួសារ, និងខេត្តកំពង់ស្ពឺ ៩ករណី៕