ធនាគារកូរ៉េ ផ្ដល់ថវិកាជាង៦៣លានដុល្លារដល់កម្ពុជា សម្រាប់គម្រោងអភិវឌ្ឍប្រព្រឹត្តកម្មទឹកកខ្វក់នៅក្រុងតាខ្មៅ

ជាតិ

សេដ្ឋកិច្ច

ធនាគារកូរ៉េ ផ្ដល់ថវិកាជាង៦៣លានដុល្លារដល់កម្ពុជា សម្រាប់គម្រោងអភិវឌ្ឍប្រព្រឹត្តកម្មទឹកកខ្វក់នៅក្រុងតាខ្មៅ

26, Dec 2018 , 9:59 pm

រូបភាព

រូបភាព ពីក្រសួងសាធារណការ និងដឹកជញ្ជូន

ដោយ: អ៊ូ សុខមាន (OU Sokmean)

ភ្នំពេញ៖ រាជរដ្ឋាភិបាលកម្ពុជា បានទទួលឥណទានសម្បទាន ជាង៦៣លានដុល្លារ ពីធនាគារនីហរ័ណ អាហរ័ណកូរ៉េ សម្រាប់គម្រោងអភិវឌ្ឍប្រព័ន្ធប្រព្រឹត្តកម្មទឹកកខ្វក់ នៅទីក្រុងតាខ្មៅ ខេត្តកណ្តាល។ នេះបើយោងតាមសេចក្តីប្រកាសព័ត៌មានរបស់ក្រសួងសាធារណការ និងដឹកជញ្ជូន នៅថ្ងៃទី២៦ធ្នូ ឆ្នាំ២០១៨។

ក្រសួងសាធារណៈ បានបញ្ជាក់ថា ទឹកប្រាក់ជាង៦៣លានដុល្លារនេះ នឹងត្រូវប្រើប្រាស់លើការសាងសង់ស្ថានីយប្រព្រឹត្តកម្មទឹកកង្វក់ ដែលមានសមត្ថភាពចម្រោះ ៧,៦០០ម៉ែត្រគូស ក្នុងមួយថ្ងៃ។ ក្រៅពីនេះ ក្រសួង ក៏អាចសាងសង់ស្ថានីយបូម១០ទីតាំង ដែលមានសមត្ថភាពបូម២៩.៩៥២ម៉ែត្រគូប ក្នុងមួយថ្ងៃ រួមទាំងសាងសង់បណ្តាញលូ ស្តារស្ទឹងប្រវែងជាង១៦គីឡូម៉ែត្រ និងស្តារស្ថានីយបូមទឹកដែលមានស្រាប់ផង។

ជាមួយគ្នា ក្រសួងសាធារណការ បានចុះហត្ថលេខាលើកិច្ចសន្យាសេវាទីប្រឹក្សានៃគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅនេះ ជាមួយក្រុមហ៊ុនទីប្រឹក្សាបច្ចេកទេស Dohwa Engineering Co., Ltd។

កិច្ចសន្យានេះ ជាប្រភេទការងារសិក្សាប្លង់លម្អិត និងត្រួតពិនិត្យការសាងសង់គម្រោង ក្នុងរយៈពេល៤៨ខែ ជាមួយនឹងតម្លៃ ៤.៧៣០.៧៥០ដុល្លារ៕