ជាតិ
ក្រោយកម្មករធ្វើកូដកម្ម ស៊ីនទ្រី យល់ព្រមបន្ថែម៩ដុល្លារ លើប្រាក់ខែគោល រូបដោយ៖ សៅ សុខអេង
× ភ្នំពេញ៖ បន្ទាប់ពីមានការធ្វើកូដកម្មពីកម្មករប្រមូលសំរាម ក្រុមហ៊ុនស៊ីនទ្រី បានសម្រេចដំឡើងប្រាក់៩ដុល្លារបន្ថែម លើប្រាក់ខែគោល។ លោក ទួន ស៊ីផេង ប្រធានប្រតិបត្តិការនៃក្រុមហ៊ុនស៊ីនទ្រី បានប្រាប់សារព័ត៌មានថ្មីៗ តាមទូរសព្ទថា ប្រាក់បន្ថែម៩ដុលា្លរនេះ នឹងត្រូវអនុវត្ត ចាប់ពីខែកុម្ភៈ ឆ្នាំ២០១៩។
លោក ទួន ស៊ីផេង បាននិយាយថា ពាក់ព័ន្ធទៅនឹងការធ្វើកូដកម្មនេះ ដោយសារកម្មករទាំងនោះ មិនបានយល់រវាងប្រាក់អតីតភាព និងប្រាក់រង្វាន់អតីតភាពរបស់ក្រសួងការងារ និងបណ្តុះបណ្តាលវិជ្ជាជីវៈ ដែលបានកំណត់។
លោក បានបន្តថា ក្រុមហ៊ុនឬរោងចក្រសហគ្រាសទាំងអស់ ដែលស្ថិតនៅក្រោមឱវាទរបស់ក្រសួងការងារ ត្រូវតែអនុវត្តនូវសកម្មភាពពីរចំណុចនេះ។ ដូច្នេះ កម្មករមិនបាច់នាំគ្នាតវ៉ា ធ្វើកូដកម្ម ក៏ក្រុមហ៊ុនត្រូវប្រគល់ប្រាក់ទាំងពីរចំណុចខាងលើឲ្យដែរ។
ប្រាក់ខែគោលរបស់កម្មករស៊ីនទ្រីបច្ចុប្បន្ន គឺ១៦៨ដុល្លារ។ ជាមួយគ្នានេះ ក៏មានការបូកបន្ថែមលើប្រាក់លើកទឹកចិត្តផ្សេងៗផងដែរ ដែលមានកម្មករសរុប២,១៨០នាក់។ នេះបើតាមលោក ទួន ស៊ីផេង ដដែល។
សូមរម្លឹកថា ក្រុមកម្មករប្រមូលសំរាមរបស់ក្រុមហ៊ុនស៊ីនទ្រីជិត២០០០នាក់ បានប្រមូលផ្ដុំគ្នាធ្វើកូដកម្ម នៅការ៉ាសរថយន្តស៊ីនទ្រី ដែលស្ថិតនៅសង្កាត់ដង្កោ ខណ្ឌដង្កោ កាលពីថ្ងៃទី២៧ធ្នូ ដើម្បីសុំដំឡើងប្រាក់១២ដុល្លារបន្ថែម។ ប៉ុន្តែ ជាលទ្ធផល ក្រុមហ៊ុនស៊ីនទ្រី បានយល់ព្រមដំឡើងឲ្យតែ៩ដុល្លារប៉ុណ្ណោះ៕
Tag:
ជាតិ
សេដ្ឋកិច្ច
ប្រាក់ខែ
សំរាម
កូដកម្ម
© រក្សាសិទ្ធិដោយ thmeythmey.com