អន្តរជាតិ
ក្រុមសកម្មជនឃើដស៊ីរី (រូបភាព AFP)
×![]()
ដោយ: តន ចាន់រិទ្ធារ៉ា
ទាហានរដ្ឋាភិបាលស៊ីរី នៅថ្ងៃទី២៨ ខែធ្នូ បានចូលទៅដល់ទីក្រុង Manbij ភាគខាងជើងប្រទេស តាមការអំពាវនាវរបស់ក្រុមឃើដ ដែលប្រឈមមុខនឹងការគំរាមកំហែងយោធារបស់តួកគី។ សម្ព័ន្ធភាពថ្មីរបស់ស៊ីរី និងក្រុមឃើដ កើតឡើងក្រោយការប្រកាសដកទ័ពអាមេរិករបស់ប្រធានាធិបតី ដូណាល់ ត្រាំ ។ បន្ទាប់ពីការប្រកាសនេះ តួកគី ក៏បង្កើនកម្លាំងយោធានៅក្បែរព្រំដែនជាមួយស៊ីរី និងត្រៀមបើកប្រតិបត្តិការប្រឆាំងក្រុមឃើដ។
ជិតចូលឆ្នាំទី៨ ជម្លោះស៊ីរីបានឈានដល់ចំណុចរបត់ថ្មី។ ការប្រកាសដកទ័ពរបស់អាមេរិក ធ្វើឲ្យស្ថានការណ៍សឹកនៅស៊ីរីប្រែប្រួលយ៉ាងខ្លាំង។ ដោយបារម្ភពីការគំរាមកំហែងរបស់តួកគី ដែលប្រមូលផ្ដុំកងទ័ពយ៉ាងច្រើននៅក្បែរព្រំដែន ក្រុមកម្លាំងឃើដស៊ីរីនៅទីក្រុង Manbij បានស្នើសុំជំនួយពីរដ្ឋាភិបាលប្រធានាធិបតី បាសា អាល់អាសាដ ។
ក្រោយក្រុមឃើដស្នើដូចនេះ រដ្ឋាភិបាលក្រុងដាម៉ាស់ ក៏បញ្ជូនទ័ពទៅទីក្រុងភាគខាងជើងនេះតែម្ដង។ កងទ័ពស៊ីរីនៅថ្ងៃទី២៨ ខែធ្នូ ប្រកាសថា ខ្លួនបានដោតទង់ជាតិនៅទីក្រុង Manbij ដែលជាទីក្រុងយុទ្ធសាស្ត្រមួយនៅក្បែរព្រំដែនជាមួយតួកគី។ ទីក្រុងនេះ ជាមូលដ្ឋានរឹងមាំរបស់ក្រុមឃើដតាំងពីឆ្នាំ២០១៦ មក និងជាមូលដ្ឋានរបស់កម្លាំងចម្រុះដឹកនាំដោយអាមេរិក។ អ្នកនាំពាក្យយោធាស៊ីរីនិយាយថា បេសកកម្មរបស់ខ្លួន គឺកម្ទេចភេរវកម្ម និងពួកឈ្លានពានទាំងអស់។
យ៉ាងណាមិញ គេមិនដឹងថា យោធាស៊ីរីចូលដល់កណ្ដាលក្រុងឬយ៉ាងណាឡើយ។ លោក Nura al-Hamed អនុប្រធានអាជ្ញាធរមូលដ្ឋាននៃទីក្រុង Manbij បានប្រាប់ទីភ្នាក់ងារព័ត៌មាន AFP ថា ការពង្រាយទ័ពរបស់របបលោក អាសាដ ធ្វើឡើងដោយមានការដឹកនាំចរចាផ្ដើមគំនិតដោយរុស្ស៊ី។ មន្ត្រីដដែលបន្តថា កងទ័ពស៊ីរី ត្រូវពង្រាយនៅត្រឹមខ្សែបន្ទាត់ខណ្ឌចែករវាងក្រុមឃើដនឹងក្រុមឧទ្ទាមដែលគាំទ្រដោយតួកគី។
តួកគីឯណោះវិញ ក្ដៅស្លឹកត្រចៀកខ្លាំង និងបានព្រមានគ្រប់ភាគីទាំងអស់ ត្រូវនៅឲ្យឆ្ងាយពីសកម្មភាពបង្ករឿង។ នៅថ្ងៃកងទ័ពស៊ីរីចូលទីក្រុង Manbij ក្បួនរថយន្តរបស់ក្រុមឧទ្ទាមដែលគាំទ្រដោយតួកគី បានធ្វើដំណើរទៅកៀកភាគខាងលិចរបស់ Manbij ។
សូមបញ្ជាក់ថា ក្រុមឃើដស៊ីរី ជាកម្លាំងងស្នូលរបស់សម្ព័ន្ធចម្រុះអន្តរជាតិក្នុងយុទ្ធនាការបោសសម្អាតក្រុមជ្រុលនិយមរដ្ឋរដ្ឋឥស្លាម ដែលសព្វថ្ងៃបាក់ទ័ពអស់ទៅហើយ តែមិនរងបរាជ័យទាំងស្រុងនៅឡើយទេ។ បច្ចុប្បន្ន ក្រុមឃើដ YPG កំពុងប្រយុទ្ធនឹងក្រុមរដ្ឋឥស្លាមនៅមូលដ្ឋានសេសសល់ក្បែរព្រំដែនអ៊ីរ៉ាក់ ប៉ុន្តែការដកខ្លួនរបស់អាមេរិក អាចបង្កគ្រោះថ្នាក់សម្រាប់ពួកគេ ពិសេសការគំរាមកំហែងរបស់តួកគីតែម្ដង៕
Tag:
ស៊ីរី
អាមេរិក
តួកគី
ឃើដ
© រក្សាសិទ្ធិដោយ thmeythmey.com
