ព្រឹត្តិការណ៍កីឡា«ថ្មើរជើងប្រវត្តិសាស្ដ្រ»នៅអន្លង់វែង រំពឹងមានអ្នកចូលរួមជាង១ពាន់នាក់

ជាតិ

ព្រឹត្តិការណ៍កីឡា«ថ្មើរជើងប្រវត្តិសាស្ដ្រ»នៅអន្លង់វែង រំពឹងមានអ្នកចូលរួមជាង១ពាន់នាក់

30, Dec 2018 , 9:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ គណៈកម្មាធិការជាតិអូឡាំពិកកម្ពុជា សហការជាមួយរដ្ឋបាលខេត្តឧត្តរមានជ័យ និងមជ្ឈមណ្ឌលសន្ដិភាពអន្លង់វែង នៃមជ្ឈមណ្ឌលឯកសារកម្ពុជា នឹងរៀបចំព្រឹត្តិការណ៍កីឡា«ថ្មើរជើងប្រវត្តិសាស្ដ្រ» ទៅកាន់តំបន់ប្រវត្តិសំខាន់ៗក្នុងស្រុកអន្លង់វែង ដែលជាតំបន់តស៊ូចុងក្រោយរបស់របបកម្ពុជាប្រជាធិបតេយ្យ ឬរបបខ្មែរក្រហម។ ព្រឹត្តិការណ៍នេះ គ្រោងធ្វើនៅថ្ងៃទី៥ មករា ឆ្នាំ២០១៩ ។

លោក លី សុខឃាង ប្រធានមជ្ឈមណ្ឌលសន្ដិភាពអន្លង់វែង បានប្រាប់សារព័ត៌មានថ្មីៗថា ព្រឹត្តិការណ៍កីឡានេះធ្វើឡើងក្នុងបំណង ប្រារព្ធខួប២០ឆ្នាំនៃការទទួលសន្ដិភាពពេញលេញនៅកម្ពុជា បន្ទាប់ពីការធ្វើសមាហរណកម្មចុងក្រោយនៅស្រុកអន្លង់វែង ឆ្នាំ១៩៩៨។ ព្រឹត្តិការណ៍នេះ ក៏ជាឱកាសសម្រាប់សាធារណជនធ្វើទស្សនកិច្ច ទៅកាន់អតីតកាល ព្រមទាំងឆ្លុះបញ្ចាំងអំពីអនាគតរបស់ប្រទេសកម្ពុជាផង។ នេះជាការបញ្ជាក់របស់លោក លី សុខឃាង។

ជាព្រឹត្តិការណ៍កីឡាដែលបើកឲ្យចូលរួមដោយសេរី ខណៈអ្នករៀបចំរំពឹងថានឹងមានអ្នកចូលរួមចម្រុះជាតិសាសន៍ប្រមាណ ១១០០នាក់នេះ។ តាមលោក សុខឃាង អ្នកចូលរួមទាំងអស់នឹងតត្រូវដើរលើចម្ងាយផ្លូវចំនួន ៣គីឡូម៉ែត្រ ដោយចេញដំណើរពីសារមន្ទីរប្រវត្តិសាស្ដ្រអន្លង់វែង ឬសារមន្ទីរអតីតផ្ទះតាម៉ុក និងមជ្ឈមណ្ឌលសន្ដិភាពអន្លង់វែង ដែលជាអតីតផ្ទះប្រជុំតាម៉ុកនៅលើភ្នំដងរែក។

គួរបញ្ជាក់ថា ទោះរបបខ្មែរក្រហមត្រូវបានបណ្ដេញចេញពីអំណាចនៅឆ្នាំ ១៩៧៩ យ៉ាងណាក៏ដោយ ក៏សមាជិកខ្មែរក្រហមជាច្រើន នៅបន្តធ្វើសង្គ្រាមទ័ពព្រៃរយៈពេលជិត ២០ឆ្នាំទៀត។ អន្លង់វែង បានបន្សល់ទុកនូវស្លាកស្នាម នៃការគ្រប់គ្រងរបស់ខ្មែរក្រហម ហើយអតីតកម្មាភិបាលជាច្រើន បន្តរស់នៅក្នុងតំបន់អន្លង់វែង រហូតមកដល់សព្វថ្ងៃនេះ៕