អន្តរជាតិ
លោកមហាធៀ ៖ បើប្រជាជនម៉ាឡេមិនឈប់ខ្ជិលទេ បរទេសនឹងត្រួតត្រាមិនខាន
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ បានរិះគន់ប្រជាជនម៉ាឡេស៊ី ដែលមិនផ្លាស់ប្ដូរអាកប្បកិរិយា និងគុណតម្លៃរបស់ខ្លួន។ លោក មហាធៀ អះអាងថា បើប្រជាជនម៉ាឡេស៊ីបន្តទង្វើបែនេះ គោលនយោបាយរបស់រដ្ឋាភិបាល ក៏គ្មានថ្ងៃជោគជ័យដែរ ហើយជនបរទេសនឹងដណ្ដើមការងាររបស់ពួកគេមិនខាន។ លោកកាន់តែមិនពេញចិត្តនៅពេលពួកគេខឹងលោក ពេលលោករិះគន់ពួកគេថា ជាមនុស្សខ្ជិល។
មេដឹកនាំវ័យចំណាស់របស់ម៉ាឡេស៊ី មហាធៀ មហាម៉ាត់ នៅចុងសប្ដាហ៍មុន អះអាងថា រដ្ឋាភិបាលរបស់លោកបានដាក់គោលនយោបាយជាច្រើនគោលដៅគាំទ្រប្រជាជនម៉ាឡេស៊ី និងផ្ដល់ឱកាសឲ្យពួកគេមានជីវភាពប្រសើរឡើង។ យ៉ាងណាមិញ លោកព្រមានថា គោលនយោបាយអំណោយផលបែបនេះ នឹងមិនជោគជ័យឡើយ បើប្រជាជនម៉ាឡេស៊ីមិនព្រមកែប្រែអាកប្បកិរិយា និងប្រព័ន្ធគុណតម្លៃសព្វថ្ងៃរបស់ពួកគេចេញទេនោះ។
ក្នុងកិច្ចសម្ភាសមួយនៅការិយាល័យនាយករដ្ឋមន្ត្រី លោក មហាធៀ ប្រាប់អ្នកសារព័ត៌មានថា គោលនយោបាយមិនទៅមុខ ព្រោះប្រជាជនម៉ាឡេស៊ីជាមនុស្សបរាជ័យ។ ជាអតីតនាយករដ្ឋមន្ត្រីធ្លាប់កាន់តំណែង២៣ឆ្នាំរួចម្ដងហើយនោះ លោកសារភាពថា លោកមិនចង់និយាយបែបនេះអំពីជនជាតិខ្លួនឯងឡើយ តែលោកត្រូវតែនិយាយថា ពួកគេកំពុងធ្វើខុស។ លោកប្រាប់ប្រជាជនម៉ាឡេស៊ីឲ្យបោះបង់អាកប្បកិរិយាមិនល្អ និងនាំរកទៅអន្តរាយ។
«បើយើងមិនធ្វើការ យើងគ្មានចំណូល។ បើមិនប្រឹងប្រែង ក៏មិនរីកចម្រើនដែរ។ នៅពេលខ្ញុំនិយាយថា ជនជាតិម៉ាឡេខ្ជិល ប្រជាជនខឹងខ្ញុំ ប៉ុន្តែវាជាការពិត។ បើយើងមិនចង់ធ្វើការទេ អ្នកផ្សេងត្រៀមខ្លួនរួចហើយ។ ចុងក្រោយ ជនបរទេសនឹងត្រួតត្រាប្រទេសនេះ ខណៈបច្ចុប្បន្ន មានជនបរទេស៧លាននាក់ធ្វើការនៅម៉ាឡេស៊ី។» នេះជាសម្ដីដាស់តឿនរបស់លោក មហាធៀ ដែលកំពុងកាន់តំណែងនាយករដ្ឋមន្ត្រីលើកទីពីរ និងផ្សាយដោយសារព័ត៌មាន Bernama ។
ជាមួយនឹងការមិនពេញចិត្តចំពោះទង្វើរបស់ប្រជាជនខ្លួនឯងបែបនេះ នាយករដ្ឋមន្ត្រីវ័យ៩៣ឆ្នាំរូបនេះក៏សង្ឃឹមថា ប្រជាជនម៉ាឡេស៊ីនឹងលែងរស់នៅដោយពឹងផ្អែកលើរដ្ឋាភិបាលទៀតក្នុងពេលខ្លីខាងមុខ។ សម្រាប់រូបនេះ កត្តានាំឲ្យជោគជ័យ ឬបរាជ័យ គឺវប្បធម៌ និងប្រព័ន្ធគុណតម្លៃរបស់ប្រជាជនតែម្ដង។
លើសពីនោះ លោក មហាធៀ ក៏ប្រាប់ឲ្យប្រជាជនម៉ាឡេស៊ីរៀនសូត្រឲ្យបានច្រើនមុខ ដោយមិនត្រឹមតែលើសាសនារបស់ខ្លួនតែមួយមុខឡើយ។ គណិតវិទ្យា វិទ្យាសាស្ត្រ ភូមិវិទ្យា និងប្រវត្តិសាស្ត្រ ជាមុខវិជ្ជាដែលត្រូវប្រឹងសិក្សា ឯការបង្រៀនគណិតវិទ្យា និងវិទ្យាសាស្ត្រ ត្រូវតែបង្រៀនជាភាសាអង់គ្លេស។ នេះជាការបន្ថែមរបស់លោក មហាធៀ ៕
Tag:
ម៉ាឡេស៊ី
មហាធៀ មហាម៉ាត់
© រក្សាសិទ្ធិដោយ thmeythmey.com